Türkiyidiki Uyghurlar sherqiy türkistan jumhuriyetlirini xatirilesh murasimi ötküzdi

Süret, 2010 ‏- yili 11 ‏- ayning 12 ‏- küni sherqiy türkistan maarip we hemkarliq jemiyitining uyushturushidiki paaliyette, jemiytining bash naziri ablikimxan mexsum söz qiliwatqan körünüsh.

Murasimgha istanbulda yashawatqan Uyghurlardin köp sanda kishi qatnashti. Murasimgha yene sa'adet partiyisidin 5 kishilik bir hey'et qatnashti. Murasim bashlinishtin burun 30 pare qur'an kerim toluq oquldi we sherqiy türkistan jumhuriyetlirini qurush yolida hayatini pida qilghan pütkül shéhidlerning rohigha atap du'a qilindi.

Murasimgha sherqiy türkistan ma'arip we hemkarliq jem'iyitining bash katipi doktur alimjan atawullah riyasetchilik qildi. Murasimda jem'iyet re'isi hidayetullah oghuzxan échilish notiqi sözlidi.
 
Murasimda sa'adet partiyisning tashqi ishlar mes'uli zekiriya ependi söz qilip mundaq dédi: "biz silerning qérindishinglar bolghanliqimiz üchün, silerni yaxshi körgenlikimiz üchün, bu murasimgha qatnashtuq. Hemminglargha semimiy salam yollaymen. Siler bilen mushundaq semimiy bir orunda uchrashqanliqimizdin nahayiti söyünduq. Aldi bilen sa'adet partiyisining re'isi proféssur nejmidin erbakan ustazning we istanbul shöbe bashliqimiz selman ependilerning salamini yetküzimen. Biz her zaman her qachan silerning yéninglarda ikenlikimizni xatirilitish üchün bu murasimgha qatnashtuq."
 
Murasimda sherqiy türkistan ma'arip we hemkarliq jem'iytining bash naziri ablikimxan mexsum söz qilip, tarixta qurulghan sherqiy türkistan jumhuriyetlirining tarixtiki ehmiyiti heqqide toxtaldi. Murasimda yene, wetenperwer pa'aliyetchi abdul'eziz ependi söz qilip sherqiy türkistan jumhuriyetlirining aldi ‏- keynidiki weqeler heqqide toxtaldi.

Ötken hepte sherqiy türkistan köchmenler jem'iyitining merkizide, sherqiy türkistan jumhuriyetlirini xatirilesh murasimi ötküzülgen idi. 11 ‏- Ayning 12 ‏- küni yene merkizi türkiyining qeysiri shehirige jaylashqan sherqiy türkistan medeniyet we hemkarliq jem'iyitining uyushturushi bilen qeysiride yashawatqan Uyghurlar sherqiy türkistan jumhuriyetlirini xatirilesh murasimi ötküzdi.

Murasimda sherqiy türkistan medeniyet we hemkarliq jem'iyitining re'si shundaqla dunya Uyghur qurultéyining mu'awin re'isi siyit tumtürk ependi söz qilip mundaq dédi: "yérim esir ilgiri ejdadlirimiz ömiri qisqa bolsimu, ikki qétim musteqil dölet qurghan bolsa, bügünki künde biz ularning ejdadliri bolush süpitimiz bilen oxshash iman we oxshash pikir bilen yashawatimiz."
 
Syit tumtürk sözide yene, sherqiy türksitanning hazirqi kommunist xitay rijimidin qutulidighanliqini, buning pütkül sherqiy türksitan türklirining ortaq arzusi we ghayi'isi ikenlikini bildürup mundaq dédi: "bu kün munasiwiti bilen 1933 ‏- yili qeshqerde qurulghan sherqiy türkistan islam jumhuriyiti bilen 1944 ‏- yili ghuljide qurulghan sherqiy türkistan jumhuriyitining qurghuchilirini, bu döletlerni qurush yolida janlirini we qanlirini erkinlik, musteqilliq yolida pida qilghan pütkül shéhidlirimizni esleymiz, allahtin ulargha rehmet we meghpiret tileymiz. Bügün musteqilliq eqidimiz qelbimizde téximu mustehkemleshti. Bir küni ay yultuzluq kök bayraqni sherqiy türkistan asminida lepiliditimiz."
 
Bu heqte biz sherqiy türkistan medeniyet we hemkarliq jem'iyitining re'isi siyit tümtürk ependi bilen söhbet élip barduq.

Yuqiridiki awaz ulinishidin, bu heqtiki melumatimizning tepsilatini anglaysiler.