Kan yézisidiki déhqanlar yézidiki parixorluqni metbu'atlargha ashkarilap adalet telep qilidighanliqini bildürdi

Radi'omiz chapchal nahiyisi kan yézisidiki tebi'iy toqayliqning buzghunchiliqqa uchrighanliqi heqqidiki weqening tepsilatini bilish üchün, kan yézisidiki déhqanlar hem yéza kadirlirigha téléfon qilghinimizda, déhqanlar yéza kadirlirining parixorluq qilmishlirining éghir ikenlikini inkas qildi. Yéza kadirliri bolsa mesilidin özini qachurup, ziyaritimizni qobul qilishni ret qildi.

Kan yézisidiki déhqanlarning inkas qilishiche, kan yézisidiki yéza kadirlirining parixorluq qilmishi chapchal nahiyiside ular bilidighan bashqa yézilardin éghir bolup, bu ehwal uzundin buyan déhqanlarning naraziliqini qozghap kelgen.

Kan yézisidin ziyaritimizni qobul qilghan bir déhqan birnechche yildin buyan yézida yüz bériwatqan déhqanlarning naraziliqini qozghighan birnechche qétimliq parixorluq qilmishini emili misallar arqiliq bayan qildi.

Bu déhqanning bayani hem yézidiki bashqa déhqanlardin igiligen uchurlardin melum bolushiche, kan yézisida 2010-yildin buyan yüz bergen parixorluq qilmishliridin, déhqanlardin mexpiy sétiwétilgen toqayliqtin kirgen xelq pulining sani mexpiy tutulushi, 2010-yili hem 2011-yili döletning déhqanlarning shal we bughday térish üchün bergen yardem pulining déhqanlargha bérilmesliki, 2010-yili namrat a'ililerge bérilgen 1200 tonna kömürdin 20 tonnisiningla bu ishtin xewerdar bolghan birnechche déhqan'gha teqsim qilinip, qalghinining sétiwétilishi, 2011-yili döletning yer tewreshke chidamliq öy qurulushi üchün ajratqan namrat a'ililerge 24 ming yüendin, adettiki a'ililerge 14 ming yüendin bergen yardem pulidin kan yézisida namratlargha 9000 yüendin, adettiki a'ililerge 7000 yüendin tarqitilip, qalghan pulning yéziliq hökümettiki kadirlar arisida ghayib bolushi, 2011-yili yil axirida yüz bergen 183 ming yüen pulning yézidiki 20 déhqanning banka hésab nomurigha uruwétilip, bir kün ötkendin kéyin déhqanlardin qayturuwélish weqesi, yézida doxturxana qurulushi hem yol yasash namida sétiwétilgen nechche yüz ming yüen qimmitidiki yaghach matériyalliri qatarliq mesililerni kan yézisidiki déhqanlar yéza kadirliridin sürüshtürgen. Déhqanlar yene bu ishlarda jawabkarliqi bar dep qaralghan wang shilung, déng yichang, polat, éziz exmet, ekrem qatarliq yéza kadirlirini nahiyilik hökümet hem oblastqa erz qilghan.

Radi'omiz kan yézisi déhqanlirining yéza kadirlirining parixorluq qilmishi heqqidiki erzige nisbeten yéziliq hökümettiki kadirlarning qandaq inkas qayturidighanliqini bilish üchün, yéza bashliqi yézining partkom sékrétari jéng xong ying, sadiqjan qatarliqlargha téléfon qilghinimizda, téléfonimizni alghan her ikki kadir muxbirning yézigha bérip emili ehwalni tekshürüshini éytip, ziyaritimizni qobul qilishni ret qildi.

Déhqanlardin igiligen ehwallardin melum bolushiche, déhqanlarning erzi seweblik yézidiki parixorluq qilmishini tekshürüsh üchün yézigha ewetilgen intizam tekshürüsh guruppisi bir qisim ehwallarni éniqlighan. Emma nahiyilik hökümet hem oblastliq hökümetning parixorluq qilmishliri toluq ispati bilen éniqlan'ghan bu kadirlargha héchqandaq chare körülmesliki déhqanlarning naraziliqini kücheytip, déhqanlarda yerlik da'irilerning déhqanlarning erzini qobul qilip, mesilini adil bir terep qilishigha bolghan ümidining üzülüshige seweb bolghan.

Yézidiki déhqanlargha wekil bolup, erz üchün béyjinggha barghan dilmurat muslin 3 aydin buyan munasiwetlik hökümet da'irilirining déhqanlarning erzini qobul qilmasliqi, yéziliq hökümet qatarliq yerlik da'irilerning béyjinggha adem ewetip, uni zorluq wasitisi bilen qayturup kétishke urunushi qatarliq ehwallarning, özini déhqanlarning erzini metbu'at orunlirigha ashkariliwétish arqiliq, yézidiki déhqan qérindashlirining derdini anglitishqa mejbur qilghanliqini bildürüp, hökümet da'irilirining ularning derdini anglighandin kéyin mesilini adil bir terep qilishigha yenila ümidi barliqini tekitlidi.

Kan yézisidiki naheqchilikler üstidin shikayet qilghan bu déhqanlar yenila hökümet da'irilirining déhqanlarning derdige qulaq sélip, mesilini adil bir terep qilishini ümid qilidighanliqini ipadilimekte idi.