Канада қанун мақуллап сиясий панаһлиқ тилигүчиләргә техиму кәң қучақ ачидиғанлиғини билдүрди

Сүрәт, 2008 - йили 13 - ийун, канаданиң мәдәнийәт вә көчмәнлик ишлири министири җейсон кенний рабийә ханим вә д у қ ниң сабиқ муавин рәиси мәмәт тохтиларни қобул қилип қизғин сөһбәтлишиватқан көрүнүшләрдин бири.

Бу мунасивәт билән мухбирларниң соаллириға җаваб бәргән канада вәтәндашлиқ вә көчмәнләр ишлири министири җасон кәнни дуняда милйонлиған кишиләрниң зулум вә зиянкәшлик қилиш сәвәбидин хатирҗәм һаятқа еришәлмәйватқанлиқини, канаданиң һәр йили хатирҗәм бир һаятқа еришишни күтүп турған 10 кишидин биригә қучақ ечип келиватқанлиқини билдүрүш билән биргә, әлвәттә дунядики һәммә сиясий панаһлиқ тилигүчигә ярдәм қилип кетәлмәймиз әмма қолимиздин келишичә уларниң йенида болушқа тиришиватимиз. Канада,йеңидин канадаға келип маканлишидиған сиясий панаһлиқ тилигүчиләрниң еһтияҗлири үчүн керәк болидиған әслидики 45 милйон долларни йүздә 20% ашуруп 54 милйон долларға чиқарди дегән.

Җасон кәнниниң билдүрүшичә, канада бу йил 2500 нәпәр сиясий панаһлиқ тилигүчини артуқ қобул қилидиған болуп, йиллиқ сиясий панаһлиқ тилигүчиләр санини 14 миң 500 гә йәткүзүдикән.

Игиләшләргә асасланғанда, канаданиң сиясий панаһлиқ тилигүчиләргә техиму кәң қучақ ечиш программиси 2 басқучқа бөлүп елип берилидиған болуп 1 - басқучта сиясий панаһлиқ тилигәнләрниң қобул қилиниш вақтини тизләштүрүш. Сиясий панаһлиқ тәлипи 1 - қетимда рәт қилинғанларниң 2 - қетим илтимас қилиши вә йеңи пакитлар билән тәминлишигә шараит яритип бериш вә бу арқилиқ канадаға қанунсиз киришниң алдини елиш қатарлиқлар икән.

Канада тәрәпниң билдүрүшичә, йеңидин қобул қилинидиған сиясий панаһлиқ тилигүчиләрниң тил өгиниш вә билим ашуруши үчүнла 9 милйон канада доллириға еһтияҗи бар икән.

Йәкшәнбә күни к т в телевизийисиниң зияритини қобул қилған җасон кенни һазир өз министирлиқида 60 миң сиясий панаһлиқ тилигүчиниң материяли барлиқини, буларниң алдиниң сахлаватқиниға 19 ай болғанлиқини, канаданиң бундин кейин бу хил ишләмләрниң сүритини тезлитиш арқилиқ қанунсиз йоллар арқилиқ канадаға киришниң алдини алидиғанлиқини билдүргән.

Дуняниң һәр қайси җайлиридин бирләшкән дөләтләр тәшкилати мусапирлар мәһкимисигә сиясий панаһлиқ үчүн илтимас қилип, сиясий панаһлиқ тәлипиниң қобул қилинишини күтүп турған уйғурларму сиясий панаһлиқ ишләмлириниң интайин аста икәнликидин нарази икән. Өткән йилиниң ахирида хитайдин камбоджаға қечип чиққан 20 нәпәр уйғур сиясий панаһлиқ тилигүчи камбоджа һөкүмити тәрипидин хитайға қайтуруп берилгән болуп, уйғур тәшкилатлири вә кишилик һоқуқ тәшкилатлири б д т мусапирлар мәһкимилирини сиясий панаһлиқ тилигүчиләрниң ишләмлиригә җиддий қаримиди дәп әйиблигән иди.

Уйғур көзәткүчиләрниң билдүрүшичә, канаданиң сиясий панаһлиқ тилигүчиләргә техиму кәң қучақ ачидиғанлиқини елан қилиши дуняниң һәр қайси җайлирида сиясий панаһлиқ тәлипиниң қобул қилинишини сақлаватқан уйғурлар үчүнму йеңи үмид елип келидикән.

Канада вәтәндашлиқ вә көчмәнләр ишлири министирлиқи канадаға келип маканлашқан сиясий панаһлиқ тилигүчиләрниң әһвалиға қарап 1 йилдин 2 йилғичә маарип, йемәк - ичмәк вә турмуш пули қатарлиқ җәһәтләрдә ярдәм қилидиған болуп давалиниш һәқсиз, дора чиқимлирини һөкүмәт атчот қилиду.

Юқиридики аваз улинишидин, бу һәқтики мәлуматимизниң тәпсилатини аңлайсиләр.