Уйғурлар канаданиң ванковер шәһиридә намайиш өткүзди

7-Айниң 5-күни чүштин кейин, канаданиң ванковер шәһиридики уйғурлар мәзкур шәһәрдики хитай консулханисиниң алдида, 5-июл үрүмчи қирғинчилиқиниң икки йиллиқи мунасивити билән наразилиқ намайиши өткүзүп, мәзкур вәқәдә өлгән қериндашлирини әслиди вә хитай һөкүмитиниң зораванлиқлириға болған наразилиқини ипадилиди.

Биз бу мунасивәт билән ванковердики намайишқа қатнашқан уйғурларни зиярәт қилғинимизда, сиясий паалийәтчи өмәрҗан бүгүнки намайиш һәққидә мәлумат бәрди вә 5-июл үрүмчидики намайишниң сиясий характери һәққидә тохталди.

Өмәрҗан әпәнди 5-июл қирғинчилиқиниң чәтәлдики көплигән уйғурниң сиясий һаятиға тәсир қилғанлиқини, вәтән вә шәрқи түркистан оқумлири һәққидә уларни ойғитиш ролини ойниғанлиқини баян қилди.

Намайишқа қатнашқан имам әпәнди болса, хитай даирилириниң вәтән ичидә, 5-июл қирғинчилиқиниң һәқиқий характерини бурмилап, тәтүр тәшвиқат қиливатқанлиқини, буниң вәтән ичидики бәзи уйғурларни қаймуқтуруватқанлиқини тилға алди. Имам әпәнди сөзидә йәнә, хитай даирилириниң һакимийәттин айрилип қалмаслиқ үчүн һәдәп хитай милләтчиликини қутритиватқанлиқини әскәртти.