Kanada beshér asad hakimiyitige téximu qattiq jazalash yürgüzidighanliqini jakarlidi

Bu tedbirler süriyege yémeklik mehsulatliridin tartip téléfon - intérnét alaqilishish wastilirini éksport qilishni toxtitish we herxil shekildiki yéngi meblegh sélish türlirini cheklesh qatarliqlarni öz ichige alidu.Buningdin ilgiri,kanada da'irliri süriye prézidénti beshér asadni öz ichige alghan 22 neper yuquri derijilik emeldarning kanadadiki mal - mülkini tonglatqan we süriyeni herbiy qoral - yaraq bilen teminleshni chekleydighanliqini élan qilghan idi.
Ixtiyari muxbirimiz kamil
2011.12.25
suriye-namayish-jeset-305.jpg Süriyidiki namayishchilar hökümet tereptin öltürülgen sepdishining jesitini kötürüp namayish qilmaqta. 2011-Yili 8-may.
AFP

Kanada tashqi ishlar ministiri john ba'ird jüme küni, kanada parlaméntida élan qilghan bayanatida, kanada hökümiti yolgha qoymaqchi bolghan yéngi jazalash tedbirlirining béshir asad hökümranliqidiki mustebit hakimiyetke bésim ishlitish ikenlikini,buning hergizmu süriye xelqighe qaritilmighanliqi,shundaqla kanadaning mustebit béshir asadning süriye xelqini basturushini dawamlashturishigha yene süküt qilalmaydighanliqini eskertti.

John ba'irdning bayanatigha qarighanda,kanada hökümitining bu jazalash layihisi süriye hökümitining kanadadiki mal - mülkini tonglitish,süriyege qilinidighan yémekliktin tartip üskine - saymanlarghiche,bolupmu süriye hökümitining namayishchilarni küzitish - nazaret qilishta ishlitidighan téléfon - intérnét alaqilishish üskinilirini éksport qilishni toxtitish,yéngidin meblegh sélish türlirini cheklesh,diplomatik munasiwetning derijisini chüshürüsh qatarliqlarni öz ichige alidu.

Ministir john ba'ird bayanatida yene,bu jazalash tedbirlirining démokratiye we erkinlik telep qilghan xelqning,naraziliq namayishlirini qanliq shekilde basturiwatqan süriye hökümitini yétim qaldurush we prézidént beshér asadni hoquqtin chüshüshke mejburlashni meqset qilghanliqini tilgha élip:

Bu barghanséri yétim qéliwatqan mustebit hakimiyetke bir signal shundaqla asad üchün ködi - köpengni köter dégen bisharetni béridu.Asad hoquqni derru ötküzüshi,uning hökümiti hoquqni ötküzishi kérek,dédi.

Kanada tashqi ishlar ministiri john ba'ird bayanatida yene süriyidiki kishilik hoquq depsendichiliklirige süküt qilip jiddi bir qarar maqullimighan,birleshken döletler teshkilati xewpsizlik kéngishini tenqit qildi.

Xewpsizlik kéngishidiki mustebit hakimiyetlerning qollighuchisi bolghan xitay bilen rusiyining tosqunluq qilishi tüpeylidin süriye heqqide liwiyidikige oxshash bir qararning maqullinishi arqigha sürülmekte.

Birleshken döletler teshkilatining melumatigha qarighanda,süriyide démokratiye we erkinlik telep qilghan namayishlar bashlan'ghan 9 aydin béri, 5000 namayishchi hökümet qoralliq küchliri teripidin öltürülgen.

Buningdin ilgiri,kanada da'iriliri süriyidin néfit we néfit mehsulatlirini import qilishni we bu döletning néfit sahesini meblegh bilen teminleshni chekligenidi.

Kanada metbu'atlirining xewirige qarighanda,ereb ittipaqi sabiq liwiye diktatori kazafi bilen oxshash tragédiyige yoluqmasliq üchün, béshir asadqa süriyini terk étish tewsiyiside bolun'ghan shundaqla bu teklip gherb döletliri teripidin süriye mesilini tinch yol bilen hel qilishning yoli,dep qaralghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.