Казафийниң муһапизәтчилирини аял сақчилардин таллишиниң сири

Ливийиниң каттиси муәммәр казафий өзини дунядики дөләт башлиқлириға охшатмаслиққа тиришип кәлгән бир шәхсийәт. Униң муһапизәтчилириниң аял сақчилардин таллиниши вә барған йәрлиридә чедир қуруп олтуруши буниң мисали.
Ихтиярий мухбиримиз өмәрҗан
2011.09.06
kazafiy-ayal-muhapizetchiliri-305.jpg Казафий аял муһапизәтчилири билән бруссәлда зиярәттә. 2004-Йили 27-апрел.
AFP

Казафийниң муһапизәтчилириниң пәқәт аял сақчилардин таллинидиғанлиқи вә униң әр сақчилардинму аял сақчиларға бәкрәк ишәнч қилидиғанлиқи тәшвиқат васитилиридә пат-пат сөзлинип туратти. Телевизийә хәвәрлиридиму казафий һәмишә аял сақчиларниң оттурисида көрүнәтти. Бу казафийниң башқа дөләт башлиқлириға бирдинбир охшимайдиған тәрипи иди.

Ливийә дөләт армийиси тәркибидики аяллар қошуниниң қомандани вә казафийни қоғдайдиған мәхсус сақчиларниң мәсули аишә абдусалам йеқинда ливийидики инқилабчиларниң қолиға чүшкәндин кейин, казафийниң бәзи сирлирини тәшвиқат васитилиригә аңлитишқа башлиған. У 2011-йили 5-сентәбир күни һиндистанниң “дина” гезитигә бәргән баянатида, казафийниң муһапизәтчилирини аял сақчилардин таллишидики сәвәб вә аял сақчиларни таллаш принсипи һәққидә тохтилип мундақ дегән: “мән ливийиниң җәнуби районидин болуп, 1984-йилидин бири ливийә армийисидә ишләп келиватқан бир аял қоманданмән. Мән һазирғичә өйләнгиним йоқ. Ливийә армийиси сепидики вә казафийниң муһапизәтчилири қатаридики аяллар әргә тегәлмәйду. Казафийниң муһапизәтчилирини аяллардин таллишидики асаслиқ сәвәб дуняға ливийә аяллирини әрләр билән охшаш һәқ-һоқуққа игә вә әрләр ишлигән вәзипиләрниң һәммисини ишлийәләйду дәп көрситиш үчүн иди. Шуңа у тәшвиқат васитилиригә һәмишә аяллар билән көрүнүшни яқтуратти.”

Казафийниң йенида һәмишә 3 аял сақчи болатти

Аишә абдусалам мәзкур гезиткә йәнә мундақ дәп баянат бәргән: “казафий 3 нәпәр аял сақчиниң һәмишә йенида болушини халайтти. У ливийә территорийиси ичидә қандақла җайға барса 3 нәпәр аял сақчини елип маңатти. Әмма, чәтәлләргә чиққинида 4 аял сақчиниң һәмишә униң йенида болуши шәрт иди. Казафийға һәмраһ болидиған аял сақчиларни таллаш һоқуқи маңа берилгән иди. Казафийниң сәпәрлиридә униңға һәмраһ болушқа талланған аял сақчилар өзлирини толиму бәхтлик һес қилишатти.”

Казафийниң аял сақчиларни таллаш өлчими

Аишә абдусалам казафийниң аял сақчиларни таллаш өлчими һәққидә мундақ деди: “казафий аял сақчиларни таллашта уларниң чирайини асас қилмайтти. Пәқәт уларниң бойини өлчәм қилатти. Муһим болғини казафийға муһапизәтчи болуп талланған аял сақчиниң казафийниң арқа тәрипидә казафийниң бойидин егиз болуп көрүнүши иди. Шуңа у бойи пакар аялларни муһапизәтчиликкә таллимайтти. Казафийни қоғдайдиған аял сақчиларниң азрақ гирим қилишиғила йол қоюлатти. Әмма башқа аялларға охшаш ясинишиға йол қоюлмайтти.”

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.