Kroran qedimiy shehirining buzghunchiliqqa uchrawatqanliqi heqqide‏


2007-12-07
Share

Gérmaniyining bérlinda élip bériliwatqan, 2007 -yili 14 - öktebirdin tartip 2008 - yili 14 - yanwarghiche dawamlishidighan, "yipek yolining esli qiyapiti" namliq körgezmide körsitiliwatqan, Uyghur élindin tepilghan, 4000 yilliq tarixqa ige, xurum ötuk. AFP Photo

Xitay xelq géziti muxbiri kroran heqqide élan qilghan ziyaret xatiriside, kroran qedimiy yadikarliq ornigha sayahetchilerning qalaymiqan kirip ‏- chiqiwatqanliqini, ularning hetta bu qedimiy sheherge exletlerni tashlap, teret qilip, asare ‏- etiqe ornini buzghunchiliqqa uchritiwatqanliqini ispatliq süretler bilen körsetken hemde buningda kroran qedimiy shehirini bashqurush hem qoghdashqa mes'ul bolghan chaqiliq nahiyilik medeniyet idarisining bashliqi ming xen'gawning chet ellik ziyaretchilerdin on ming yüen élipla ularning qedimiy sheher ichide xalighanche ziyaret qilishigha yol qoyuwatqanliqini yazghan.

Biz bu melumatlargha asasen ming xen'gawni ziyaret qilghinimizda, kroran qedimiy shehirining buzghunchiliqqa uchrawatqanliqini inkar qilghandin bashqa, xitay xelq gézitide muxbirning üch élish meqsitide shundaq bir toqulma xewerni élan qilghanliqini bildürgen idi.

Buning bilen kroran shehirining tertiplik bashqurulmaywatqanliqi hem muwapiq qoghdalmaywatqanliqi seweblik buzghunchiliqqa uchrawatqanliqidek mesile yenimu bir murekkep basquchqa kötürüldi.

" Kiroranni kim yighlitiwatidu"

Nöwette xitay xelq gézitide muxbir jaw yaxuy élan qilghan " kiroranni kim yighlitiwatidu" namliq maqale xitaydiki nechche yüzligen asasliq munazire tor betlirige qoyilip bu heqte élan qilin'ghan maqaliler nechche ming parchigha yetti.

Biz, kroran qedimiy shehirining buzghunchiliqqa uchrawatqanliqi heqqidiki axbaratining, chaqiliq nahiyilik medeniyet idarisi bashliqi ming xen'gaw teripidin pütünley inkar qilin'ghanliqi toghrisida xitay xelq géziti muxbiri jaw yaxuyni ziyaret qilishqa tirishqan bolsaqmu, hazirche alaqe ornitalmiduq. Emma xitay xelq géziti tehrir bölümi arqiliq, jaw yaxuyning mezkur gézitning eng iqtidarliq yash muxbirining biri ikenliki, uning hetta 2007 - yili xitay buyiche 10 munewwer yashning biri bolup bahalan'ghanliqi hemde memliketlik munewwer axbaratchi namigha érishkenlikini bilduq. U yene mezkur gézitning ma'arip pen -medeniyet uchur bölümining bash tehriri iken.

Gerche biz méng xen'gaw teripidin yalghanchigha chiqirilghan bu dangliq xitay muxbir jaw yaxuy bilen biwaste alaqe ornitalmighan bolsaqmu, uning shexsi tor bétini ziyaret qilduq.

" Kimning kirish ‏- kirmeslikini ming jüyjang belgileydu "

Gérmaniyining bérlinda élip bériliwatqan, 2007 -yili 14 - öktebirdin tartip 2008 - yili 14 - yanwarghiche dawamlishidighan, "yipek yolining esli qiyapiti" namliq körgezmide körsitiliwatqan, Uyghur élindin tepilghan, 4000 yilliq tarixqa ige, adem ewrishkisi (mamisi) . AFP Photo

Intérnéttin jaw yaxuy bilogi (shexsi mulahize) tor béti échilishi bilenla eng köp mulahize qatnashturulghan témilar qatarida "kiroranni kim yighlitiwatidu" dégen téma alahide közge chéliqidu.

Jaw yaxuy mezkur ziyaret xatirisi heqqide bu shexsi mulahize tor bétide yene qayta tepsiliy maqale élan qilghan bolup u maqalisini mundaq bashlighan: "men -12ayning -4 küni xelq kündilik gézitide " kiroranni kim yighlitiwatidu" namliq ziyaret xatiremni élan qilghandin buyan bu maqale bir nechche yüz tor bette "chet ellik sayahetchiler kiroranni weyran qilmaqta", " bizning ghururimiz 10 ming yüen'ge yaramdu", " kroran mushundaq qoghdilishi kérekmu"," kroran yer sharidin menggülük yoqitilmaqchi" dégendek témilarda qizghin mulahizilerning meydan'gha chiqishigha sewebchi boptu, bu heqte yézilghan inkas hem mulahiziler nechche ming parchigha baridiken. Tordashlar hem pikirdashlar méning kiroranda körgenlirim, anglighanlirim hemde xatirligenlirim heqqide yenimu tepsiliy melumatlargha érishishni xalaydiken. Shu munasiwet bilen men kiroranning buzghunchiliqqa uchrashtiki heqiqiy seweb hem ré'al ehwallarni yenimu tepsiliy bayan qilishni muwapiq kördüm, silerning méning kroran qedimiy shehiridiki neq meydan xatirem arqiliq téximu éniqraq xulasige kélidighanliqinglargha ishinimen."

Muxbir kroran qedimiy shehiride élip barghan bir qanche künlük ziyaret xatirisi hemde shu jayda tartqan süretlerni bu mulahize torigha tepsiliy qoyghan bolup, bu heqte qisqiche tonushturush bérip ötmekchimen.

-22 Séntebir küni, xelq kündilik géziti muxbiri jaw yaxuy lopnurni késip ötüsh tetqiqat guruppisi bilen lopnurning merkizi rayonigha kelgende, tasadipiy halda sherq néfit qédirish dep belge qoyulghan töt aptomobilning qedimiy sheherge qarap kirip kétiwatqanliqini körgen. Ular kroran qedimiy shehirini qoghdash ponkitige kelgende bu töt aptomobilgha tosalghusiz qedimiy sheher xarabisi ichige kirishke yol bérilgen.

Muxbir punkitidiki xizmetchilerdin néme üchün bu mashinilarning kroran qedimiy shehirige kirishige ruxset bergenlikini sorighanda, ular " ming jüyjang téléfonda ruxset berdi, kimning kirish ‏- kirmeslikini ming jüyjang belgileydu" dégen.

Néfit qédirish xadimliri qedimiy sheherde néme qilidu dep guman bilen egeshken muxbir, kroran qedimiy sheher xarabisigha kelgende, 12 neper yaponluq sayahetchining bir nechche xitay yol bashlighuchi bilen kroran qedimiy yadikarliq ornida xalighanche dessep ‏- cheylep yürginini hetta ularning yerdin sapal qacha sunuqliri qatarliq buyumlarni éliwalghanliqini süretke tartiwalghan, muxbir bérip ularni ziyaret qilmaqchi bolghanda ular yaponche bir némilerni dep özlirini qachurghan.

" Sayahetchiler 10 ming yüen bilenla tosaqtin öteleydu "

Muxbirning tepsiliy bayan qilishiche, bu sayahetchiler chaqiliq nahiyilik medeniyet idarisining bashliqi ming xen'gawning biwaste testiqi bilen kroran qedimiy sheher ichide ziyarette bolush ruxsitige érishken bolup buning üchün ularning her biri 10 ming yüendin asare ‏- etiqe qoghdash puli tapshurghan iken.

Bulardin bashqa, muxbir yene kroran qedimiy shehirining kirish éghizida besh jayda exlet döwisi, yene xarabe ichidimu üch jayda ademlerning teret hem exlet döwilirini uchratqan bolup, tepsiliy süretlerni tartiwalghan.

Muxbir maqalisining axirida "kiroren'ge töt etraptin kirgili bolidu. Emma mashiniliq qedimiy sheherge kiridighanlar choqum 30 kilométir yiraqta hem 18 kilométir yiraqta qurulghan ikki tosaqtin yeni kroran medeniy yadikarliqlarni qoghdash ponkitidin ötüsh kérek,sayahetchiler 10 ming yüen bilenla bu tosaqtin öteleydu, biraq, qedimiy sheher ichide birmu qoghdighuchi yoq, peqet qalaymiqan dessimeng dégen bir kichik belgila bar, kishiler qedimiy sheher ichide néme qilghusi kelse shuni qilalaydu. Bu jay mushundaq muwapiq qoghdalmay kétiwerse bir nechche yilgha qalmayla, tarixtin yene bir qétim ghayip bolidu shundaqla menggü eslige kelmeydu" deydu. (Gülchéhre)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet