Америка: 'аяллар вә балиларға ярдәм бериш муһим истратегийимиз '
Мухбиримиз әқидә
2010.01.20
2010.01.20

RFA Photo / Jume
Вашингтон почтиси гезитини өз ичигә алған америкиниң һәр қайси мәтбуатлирида, америка ташқи ишлар министири һиларий клинтон ханимниң, аялларни худди техи ечилмиған байлиқ ғәзинисигә охшатқанлиқи, аялларниң һәр хил талантқа мунасип болуштин сирт, җәмийәтни идарә қилиш күчигә игә икәнлики, шуңа аялларни йетиштүрүш саһәсигә көп мәбләғ салғанда үнүмлүк нәтиҗигә еришкили болидиғанлиқи тоғрисидики баяни елан қилинди.
Һиларий ханим сөзидә йәнә, билим сәвийисигә игә аялларда пәрзәнтлирини қоғдаш җасаритиниң алаһидә күчлүкликини билдүрүп, уқумушлуқ аниларниң балилириниң асанлиқчә кесәлгә гириптар болмайдиғанлиқини вә ач қалмайдиғанлиқини тәкитлиди.
Дуня банкиси, бирләшкән дөләтләр тәшкилати, дуня иқтисад мунбири қатарлиқ хәлқара органларниң тәтқиқатидин ашкарилинишичә, техиму чоң иқтисадий тәрәққиятқа, яхши идраә қилиш вәзийитигә һәмдә демократик илгириләшләргә еришиш, аяллар үчүн селинған мәбләғ билән бивастә мунасивәтлик икән.
Нөвәттә, америкиниң аялларни һәр қайси саһәләр буйичә тәрбийиләшкә алаһидә әһмийәт бериватқанлиқини тилға алған клинтон ханим йәнә мундақ дәйду" :биз аяллар үчүн елип берилидиған хизмәт лайиһилирини түзгәндә, аялларниң еһтияҗини алдинқи шәрт қилишимиз керәк, бу арқилиқ техиму көп аял кәсип игилирини йетиштүрүш, һәтта деһқан аялларниң сәвийисини юқири көтүрүш, аяллиримизни қериндаш дөләтләрдә тәрбийиләш пүрситигә ериштүрүш, болупму уларниң тәрәққиятни илгири сүрүш ролини җари қилдуруш мәқситигә еришәләймиз."
Клинтон ханим сөзидә дөләттин қәрз елип өзини тәрбийиләш чарисиниң, нөвәттә дуняниң һәммила җайлирида алқишқа еришиватқанлиқини тәкитләп": аяллар мәбләғ селишқа болидиған ишәнчлик обикт, улар қәрз алған пулни мәбләғ селиш арқилиқ, өзини һәтта аилисидики әзаларниң турмушини яхшилашқа тиришиду, буниңдин башқа, адәттә аялларниң дөләттин алған қәрзини қайтуруш нисбити"100% дәп көрсәтти.
Америка ташқи ишлар комитетиниң доклатиға асасланғанда, адәттә әрләрниң тапқан пулиниң йеримидин көпрәкини өзи үчүн хираҗәт қилидиғанлиқи, бирақ аялларниң болса, тапқан пулини аилиси үчүн яки әтрапидики кишиләрниң һузурлиниши үчүн сәрп қилидиғанлиқи мәлум болған .
Клинтон ханим бу һәқтә йәнә мундақ бир охшитишни мисал кәлтүрүп" :ачлиқ азави чекиватқан кишигә бир данә белиқ бәрсиңиз, униңға пәқәт бир күнла ярдәм бәргән болисиз, әгәр сиз униңға белиқ тутушни өгитип қойсиңиз, у бир өмүр қорсиқини бақалайду, һалбуки бу усулни бир аял кишигә өгәтсиңиз, у һалда униң әтрапидики барлиқ инсанларниң ачлиқ мәсилиси һәл қилинған болиду," дәйду.
Юқиридики аваз улинишидин, бу һәқтики мәлуматимизниң тәпсилатини аңлайсиләр.