Amérika: 'ayallar we balilargha yardem bérish muhim istratégiyimiz '

Washin'gton pochtisi géziti qatarliq metbu'atlarda, amérika tashqi ishlar ministiri hilariy kélinton xanimning, tereqqiyatning amérika tashqi siyasitidiki roli toghrisidiki nutqi élan qilin'ghan bolup, klinton xanim "ayallar hemde balilargha yardem bérish muhim yéngi istratégiye, chünki ular jem'iyet, iqtisad shuningdek siyasetni ilgiri sürüshte halqiliq küch " dep otturigha qoyghan.
Muxbirimiz eqide
2010.01.20
Klinton-xanim-10262009-sozde-305.jpg Süret, 26 - öktebir amérika tashqi ishlar ministirliqi 2009 - yilliq xelqara diniy erkinlik doklatini élan qilish munasiwiti bilen échilghan muxbirlarni kütüwélish yighinida amérika tashqi ishlar ministiri hilariy klinton xanim sözde.
RFA Photo / Jume

Washin'gton pochtisi gézitini öz ichige alghan amérikining her qaysi metbu'atlirida, amérika tashqi ishlar ministiri hilariy klinton xanimning, ayallarni xuddi téxi échilmighan bayliq ghezinisige oxshatqanliqi, ayallarning her xil talantqa munasip bolushtin sirt, jem'iyetni idare qilish küchige ige ikenliki, shunga ayallarni yétishtürüsh sahesige köp meblegh salghanda ünümlük netijige érishkili bolidighanliqi toghrisidiki bayani élan qilindi.

Hilariy xanim sözide yene, bilim sewiyisige ige ayallarda perzentlirini qoghdash jasaritining alahide küchlüklikini bildürüp, uqumushluq anilarning balilirining asanliqche késelge giriptar bolmaydighanliqini we ach qalmaydighanliqini tekitlidi.

Dunya bankisi, birleshken döletler teshkilati, dunya iqtisad munbiri qatarliq xelq'ara organlarning tetqiqatidin ashkarilinishiche, téximu chong iqtisadiy tereqqiyatqa, yaxshi idra'e qilish weziyitige hemde démokratik ilgirileshlerge érishish, ayallar üchün sélin'ghan meblegh bilen biwaste munasiwetlik iken.

Nöwette, amérikining ayallarni her qaysi saheler buyiche terbiyileshke alahide ehmiyet bériwatqanliqini tilgha alghan klinton xanim yene mundaq deydu" :biz ayallar üchün élip bérilidighan xizmet layihilirini tüzgende, ayallarning éhtiyajini aldinqi shert qilishimiz kérek, bu arqiliq téximu köp ayal kesip igilirini yétishtürüsh, hetta déhqan ayallarning sewiyisini yuqiri kötürüsh, ayallirimizni qérindash döletlerde terbiyilesh pürsitige érishtürüsh, bolupmu ularning tereqqiyatni ilgiri sürüsh rolini jari qildurush meqsitige érisheleymiz."

Klinton xanim sözide dölettin qerz élip özini terbiyilesh charisining, nöwette dunyaning hemmila jaylirida alqishqa érishiwatqanliqini tekitlep": ayallar meblegh sélishqa bolidighan ishenchlik obikt, ular qerz alghan pulni meblegh sélish arqiliq, özini hetta a'ilisidiki ezalarning turmushini yaxshilashqa tirishidu, buningdin bashqa, adette ayallarning dölettin alghan qerzini qayturush nisbiti"100% dep körsetti.

Amérika tashqi ishlar komitétining doklatigha asaslan'ghanda, adette erlerning tapqan pulining yérimidin köprekini özi üchün xirajet qilidighanliqi, biraq ayallarning bolsa, tapqan pulini a'ilisi üchün yaki etrapidiki kishilerning huzurlinishi üchün serp qilidighanliqi melum bolghan .

Klinton xanim bu heqte yene mundaq bir oxshitishni misal keltürüp" :achliq azawi chékiwatqan kishige bir dane béliq bersingiz, uninggha peqet bir künla yardem bergen bolisiz, eger siz uninggha béliq tutushni ögitip qoysingiz, u bir ömür qorsiqini baqalaydu, halbuki bu usulni bir ayal kishige ögetsingiz, u halda uning etrapidiki barliq insanlarning achliq mesilisi hel qilin'ghan bolidu," deydu.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.