Хитай сақчилири ғулҗида мәҗбурий көчүрүлүшкә қарши чиққан бир уйғурға оқ чиқарди


2006-05-30
Share

Терә базирида әхмәтләр аилисидә мәҗбурий көчүрүлүш сәвәбидин йүз бәргән еғир паҗиә нөвәттә ғулҗидики кишиләр арисида тарқилип йүргән мурәккәп бир вәқәгә айланған.

Паҗиәлик вәқә

Ғулҗидики мәзкур вәқәдин хәвири бар кишиләрниң билдүрүшигә қариғанда, буниңдин икки һәптә илгири йәни 14 - май күни, хитай базириға җайлашқан терә базирида чоң қоро җайи һәм дуканлири бар әхмәд абдурәһим билән аяли мәрйәм сақчилар тәрипидин сәвәбсизла қолға елинған. Әтиси һөкүмәт даирилири уларниң өйини бошитишқа кәлгәндә әхмәд абдуреһимниң балилири қаршилиқ билдүргән. Әмма, һөкүмәт тәрәп сақчи һәмдә қораллиқ сақчи қисимларни ишқа селип өйни дәрһал бикар қилишқа мәҗбурлиған. Дәталаш җәрянида ғәзәпкә кәлгән өй игисиниң 20 яшлардики оғли абдукерим, әгәр йәнә мәҗбурлисаңлар өйгә һәм өзүмгиму от қойимән дегән. Қораллиқ сақчи қисим хадимлири туюқсиз униң путиға қаритип оқ чиқарғанда бензингә от тутушуп абдукерим билән тәң өйниму от алған.

Биз бу паҗиәниң сәвәб, нәтиҗә тәпсилатини һәмдә әхмәд абдуреһим аилисиниң һазирқи әһваллири һәққидә ениқрақ мәлумат елиш үчүн хитай базири сақчиханисиға телефон қилдуқ әмма телефонни алған хадим бизни бу һәқтә толуқ учур билән тәминлийәлмәйдиғанлиқини билдүрди.

Биз йәнә хитай базири әтрапида олтурушлуқ кишиләрдин бу һәқтә әһвал игиләшкә тириштуқ. Әмма, сапла муҗимәл җаваблар бу вәқәни техиму мурәккәп бир көринишкә игә қилмақта иди.

Биз ахири мәзкур вәқәгә бивастә мунасивәтлик йәни көйгүчиниң аниси, өй игиси мәрйәм ханим билән алақилишиш пурситигә игә болдуқ. Әмма биринчи қетим мәрйәм ханим наһайити җиддийләшкән һалда зияритимизгә қисқила җаваб қайтурди.

Мәрйәм ханимниң җиддий ейтқан сөзлириниң урамиға қариғанда, биз телефон қилған пәйттә униң сақчи хадимлириниң назаритидә икәнлики мәлум.

Вәқәниң сәвәблири

Вәқәниң сәвәби асасән ярқин көрүнүшкә башлиди. Демәк бу мәсилиниң негизи шундақла паҗиәниң йүз бериши әхмәдләр аилиси билән абдукерим һошур вә нурәхмәт һошур исимлик ака ‏- иниләр оттурсидики йәр мүлүк һоқуқи дәталиши билән мунасивәтлик болған икән. Ундақта қанун орунлири бир тәрәп қилишқа тегишлик адди бир мал мүлүк һоқуқи мәсилиси қандақ болуп сақчи һәтта қораллиқ қисимларму арилашқидәк мурәккәп бир мәсилигә айланди ? вәқәдә зиянға учриғучи мәрйәм ханим бундақ болушидики сәвәбниң йәнила қанун һәмдә һөкүмәт органлирида бивастә иш беҗиридиған хадимлардики парихорлуқ мәсилилиригә четилидиғанлиқини көрсәтти:

Терә базирида олтурушлуқ бәзи кишиләрниң етираз билдүрүшигә қариғанда, гәрчә ғулҗа шәһәрлик телевизийә истансиси әхмәтләр аилисидә йүз бәргән вәқәни телевизорда қисқа хәвәр қилип бәргән болсиму, әмма вәқәни бурмилап зиянға учриғучи йәни қораллиқ қисим тәрәптин яриландурулған абдукеримни 38 яшлиқ хероин чекидиған бир йолсиз муттәһәм қилип көрситип, вәқәниң әмәлий әһвалини йошурған һәмдә абдукерим өзигә һәмдә өйгә от қойған дәп хәвәр бәргән. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт