Ғулҗидики мәҗбурий өй көчүрүшкә қаршилиқ қилип яриланған абдукерим хәтәр басқучидин өтти


2006-05-31
Share

Һазирға қәдәр ғулҗа хитай базириға җайлашқан терә базарда йүз бәргән мәҗбурий өй көчүрүш сәвәбидин йүз бәргән паҗиәлик вәқә һәққидә игә болған мәлуматлиримизға асасланғанда, нурәхмәт һошур, абдукерим һошурлар билән әхмәт абдуреһим аилисидикиләр оттурсидики земин талишиш маҗираси, һөкүмәт һәмдә қанун орунлириниң яхши бир тәрәп қилмиғанлиқи шундақла арилиқта бәзи қанун иҗра қилиш хадимлириниң парихорлиқи сәвәблик зиддийәтлик чоң бир вәқәгә айланған.

Әрз қобул қилинғандин кейинки зорлуқ

Икки һәптә илгири ғулҗа өй ‏- земин башқуруш, қанун иҗра қилиш тармақлири зиянға учриғучи тәрәп болған әхмәт абдуреһимниң әрзини аптонум районлуқ юқири сот қобул қилип техи қайтидин һөкүм чиқирилмиған пәйттә, әхмәтләр аилисиниң наразилиқиға қаримай уларни өйни бошитишқа зорлиған.

Әхмәт билән аяли мәрйәм қанун иҗра қилиш тармақлириға наразилиқ билдүрүп уйғур аптоном районлуқ юқири сотниң әрзни қобул қилғанлиқ испатини көрсәткәндә, сақчилар уларниң қоллирини кишәнләп елип кәткән. Әтиси әхмәт абдуреһимниң йигирмә яшлардики оғли абдукерим уларни мәҗбурий көчүрүшкә кәлгәнләргә "әгәр йәнә мәҗбурлисаңлар өйгиму, өзүмгиму от қойимән" дәп қаршилиқ қилған. Буниң билән қораллиқ сақчи қисим уларниң өйини қоршиған һәмдә абдукеримни агаһландурған, абдукерим давамлиқ қаршилиқ билдүргәндә, сақчилар абдукеримгә қаритип оқ чиқарған. Бу чағда өзигә һәмдә өйгә чечилған бензин дәрһал от алған. Өй көйгән, абдукеримму еғир яриланған.

Отни ким қойди?

Бирақ мәйли вәқәдә зиянға учриған абдукеримниң аилидикилири болсун вә яки сақчи тәрәп болсун абдукеримгә һәмдә өйгә туташқан от учқуниниң зади немә икәнлики һәққидә сөз ечиштин өзини тартмақта, от кетиш сәвәбиниң һәмдә абдукеримниң саламәтлик әһвалиниң мәхпи тутулуши бу вәқәгә техиму сирлиқ түс бәрмәктә . Әмма шу паҗиәлик вәқәни өз көзи билән көргүчи бәзи кишиләрниң ейтишиға қариғанда, гәрчә абдукерим өзи вә өйгә бензин чачқини билән от туташтурмиған. Сақчилар оқ чиқарғандила от учқунидин бензингә от туташқан икән.

Қутқузуңлар!!!

Бәзи көргүчиләрниң ейтишиға қариғанда, от алған пәйттә абдукерим қутқузуңлар дәп шунчә налә қилған болсиму, өйни қоршиған қораллиқ қисим сақчилири буйруқни күтүп от өчүрүшкә, абдукеримни қутқузушқа һәрикәт қилмай турған вә қарап турған башқа кишиләргиму рухсәт қилмиған.

Абдукеримниң налисигә чидимиған аяли еғир аяғлиқиға қаримай абдукеримни қутқузуш үчүн өзини от алған өйгә атқан. Нәтиҗидә абдукеримниң аялиниңму биләклири охшимиған дәриҗидә яриланған.

Абдукеримниң аниси мәрйәм һәдә зияритимизни қобул қилғанда, өзи вәқә йүз бәргән пәйттә тутуп туриливатқан болғачқа әмәлий әһваллардин хәвәрсиз икәнликини әмма нөвәттә адвокатларни тәклип қилип бу вәқәниң айдиңлишиши үчүн һәрикәт қиливатқанлиқини билдүрди.

"Абдукеримниң әһвали зади қандақ ?"

Мәрйәм һәдиниң билдүрүшичә, абдукерим ғулҗа шәһәрлик һәрбий дохтурханида җиддий қутқузулуватқан икән. Әмма абдукерим гәрчә қутқузуш өйидә болсиму, сақчи тәрәпниң назаритидә болғанлиқи үчүн бу аниниң вәқә йүз берип һазирға қәдәр оғлини көрүши чәкләнмәктә икән.

Биз абдукеримниң әмәлий әһвалини билиш үчүн ғулҗа шәһәрлик һәрбий дохтурханиниң көйүк бөлүмигә телефон улидуқ, бир сестра хели иккиләнгәндин кейин, абдукеримниң әһвалини қисқичә чүшәндүрүп бәрди: ‏ ‏"‏униң әһвали турақлашқили техи бир нәччә күн болди, яриси хели еғир, йүзлири, бәдини, һәммә йери көйүп яриланған. Үчинчи дәриҗидә көйгән. Биз барлиқ амалларни ишлитип қутқузуватимиз. Мән пәқәтла бир сестра, әслидә башлиқлардин яки дохтурдин сорисиңиз болатти, мениң бу һәқтә бир немә дейиш һоқуқумму йоқ. Башқисини әтә башлиқлардин сораң". Нөвәттә абдукеримниң аилиси униң еғираяғ аяли абдукеримниң саламәтликиниң әслигә келишини тәқәззалиқ билән күтмәктә, оғлиниң һалидин әндишә қилип көз йеши қуримиған мәрйәм ана "бу паҗиәдин кейин бизниң пучуланған қәлбимиздики азаблиқ ярилар сақиярму ?" дәп улуғ тинди. (Гүлчеһрә)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт