Ghuljidiki mejburiy öy köchürüshke qarshiliq qilip yarilan'ghan abdukérim xeter basquchidin ötti

• Muxbirimiz gülchéhrening bu heqtiki toluq melumati
• Download story audio

Hazirgha qeder ghulja xitay bazirigha jaylashqan tére bazarda yüz bergen mejburiy öy köchürüsh sewebidin yüz bergen paji'elik weqe heqqide ige bolghan melumatlirimizgha asaslan'ghanda, nur'exmet hoshur, abdukérim hoshurlar bilen exmet abduréhim a'ilisidikiler ottursidiki zémin talishish majirasi, hökümet hemde qanun orunlirining yaxshi bir terep qilmighanliqi shundaqla ariliqta bezi qanun ijra qilish xadimlirining parixorliqi seweblik ziddiyetlik chong bir weqege aylan'ghan.

Erz qobul qilin'ghandin kéyinki zorluq

Ikki hepte ilgiri ghulja öy ‏- zémin bashqurush, qanun ijra qilish tarmaqliri ziyan'gha uchrighuchi terep bolghan exmet abduréhimning erzini aptonum rayonluq yuqiri sot qobul qilip téxi qaytidin höküm chiqirilmighan peytte, exmetler a'ilisining naraziliqigha qarimay ularni öyni boshitishqa zorlighan.

Exmet bilen ayali meryem qanun ijra qilish tarmaqlirigha naraziliq bildürüp Uyghur aptonom rayonluq yuqiri sotning erzni qobul qilghanliq ispatini körsetkende, saqchilar ularning qollirini kishenlep élip ketken. Etisi exmet abduréhimning yigirme yashlardiki oghli abdukérim ularni mejburiy köchürüshke kelgenlerge "eger yene mejburlisanglar öygimu, özümgimu ot qoyimen" dep qarshiliq qilghan. Buning bilen qoralliq saqchi qisim ularning öyini qorshighan hemde abdukérimni agahlandurghan, abdukérim dawamliq qarshiliq bildürgende, saqchilar abdukérimge qaritip oq chiqarghan. Bu chaghda özige hemde öyge chéchilghan bénzin derhal ot alghan. Öy köygen, abdukérimmu éghir yarilan'ghan.

Otni kim qoydi?

Biraq meyli weqede ziyan'gha uchrighan abdukérimning a'ilidikiliri bolsun we yaki saqchi terep bolsun abdukérimge hemde öyge tutashqan ot uchqunining zadi néme ikenliki heqqide söz échishtin özini tartmaqta, ot kétish sewebining hemde abdukérimning salametlik ehwalining mexpi tutulushi bu weqege téximu sirliq tüs bermekte . Emma shu paji'elik weqeni öz közi bilen körgüchi bezi kishilerning éytishigha qarighanda, gerche abdukérim özi we öyge bénzin chachqini bilen ot tutashturmighan. Saqchilar oq chiqarghandila ot uchqunidin bénzin'ge ot tutashqan iken.

Qutquzunglar!!!

Bezi körgüchilerning éytishigha qarighanda, ot alghan peytte abdukérim qutquzunglar dep shunche nale qilghan bolsimu, öyni qorshighan qoralliq qisim saqchiliri buyruqni kütüp ot öchürüshke, abdukérimni qutquzushqa heriket qilmay turghan we qarap turghan bashqa kishilergimu ruxset qilmighan.

Abdukérimning nalisige chidimighan ayali éghir ayaghliqigha qarimay abdukérimni qutquzush üchün özini ot alghan öyge atqan. Netijide abdukérimning ayaliningmu bilekliri oxshimighan derijide yarilan'ghan.

Abdukérimning anisi meryem hede ziyaritimizni qobul qilghanda, özi weqe yüz bergen peytte tutup turiliwatqan bolghachqa emeliy ehwallardin xewersiz ikenlikini emma nöwette adwokatlarni teklip qilip bu weqening aydinglishishi üchün heriket qiliwatqanliqini bildürdi.

"Abdukérimning ehwali zadi qandaq ?"

Meryem hedining bildürüshiche, abdukérim ghulja sheherlik herbiy doxturxanida jiddiy qutquzuluwatqan iken. Emma abdukérim gerche qutquzush öyide bolsimu, saqchi terepning nazaritide bolghanliqi üchün bu anining weqe yüz bérip hazirgha qeder oghlini körüshi cheklenmekte iken.

Biz abdukérimning emeliy ehwalini bilish üchün ghulja sheherlik herbiy doxturxanining köyük bölümige téléfon uliduq, bir séstra xéli ikkilen'gendin kéyin, abdukérimning ehwalini qisqiche chüshendürüp berdi: ‏ ‏"‏uning ehwali turaqlashqili téxi bir nechche kün boldi, yarisi xéli éghir, yüzliri, bedini, hemme yéri köyüp yarilan'ghan. Üchinchi derijide köygen. Biz barliq amallarni ishlitip qutquzuwatimiz. Men peqetla bir séstra, eslide bashliqlardin yaki doxturdin sorisingiz bolatti, méning bu heqte bir néme déyish hoquqummu yoq. Bashqisini ete bashliqlardin sorang". Nöwette abdukérimning a'ilisi uning éghir'ayagh ayali abdukérimning salametlikining eslige kélishini teqezzaliq bilen kütmekte, oghlining halidin endishe qilip köz yéshi qurimighan meryem ana "bu paji'edin kéyin bizning puchulan'ghan qelbimizdiki azabliq yarilar saqiyarmu ?" dep ulugh tindi. (Gülchéhre)