Shwétsiyide dangliq muzikant küresh küsen'ge atap mexsus yighin chaqirildi

5-Ayning 27-28-künliri shwétsiyining paytexti stokholmda ötküzülgen bu yighin'gha shwétsiyidiki herqaysi uniwérsitétlardin kelgen muzika tetqiqatchiliri, oqutquchi-oqughuchilar, muzéy mudirliri, merhum küresh küsenning dostliri we Uyghurlardin bolup 200 etrapida kishi qatnashqan.

Yighinda küresh küsenning naxshiliri toplimi, yeni ikki tilda chiqqan CD plastinkisi bilen küresh küsenning hayati bayan qilin'ghan kitab tonushturulghan.

Ikki tilda neshr qilin'ghan bu CD plastinkisigha küresh küsenning 10 naxshisi kirgüzülgen bolup, buni shwétsiye döletlik awaz arxipi muzéyi bashliqi, dangliq muzikant dan lundbérg, CD layihiligüchi andérs hammarlund, merhum küresh küsenning naxsha-tékistlirini shwétchige we in'glizchigha terjime qilghuchi meshhur yipek yoli medeniyiti tetqiqatchisi patrik halzon, dangliq fotograf rogér pédérsén qatarliq kishiler ortaqliship teyyarlighan.

Bu CD plastinkisi küresh küsen ependining wapatining 5 yilliq xatirisige ülgürtüp neshr qilin'ghan bolup intayin muhim ehmiyetke ige. Biz bu yighin heqqide téximu tepsiliy melumat élish üchün bu yighin'gha qatnashqan merhum küresh küsenning ayali bextigül xanim bilen söhbet élip barduq.