Куча наһийисидә аталмиш қанунсиз диний тәшвиқат буюмлирини йоқитиш һәрикити елип берилмақта

Куча наһийиси чимән йезилиқ һөкүмити йеқинда, җәмийәт муқимлиқи вә милләтләр иттипақлиқиға зиянлиқ дәп қаралған, қанунсиз тәшвиқат буюмлирини тәкшүрүп бир тәрәп қилиш сиясий һәрикити елип барған. Уйғур кишилик һоқуқ тәшкилатлири бу һәрикәтниң муқимлиқ вә иттипақлиқни қолға кәлтүрүш әмәс, әксичә уйғур хәлқиниң наразилиқини мәйданға кәлтүридиғанлиқини билдүрмәктә.
Мухбиримиз әқидә
2010-06-10
Share
Xitay-Uyghur-ayallarni-dinniy-xurapiliqqa-qarshi-turush-wedisini-almaqta-305 Куча наһийисидә аталмиш қанунсиз диний тәшвиқат буйумлирини йоқитиш һәрикити елип бериливатқан болуп, сүрәттә, куча наһийиси йақа йезиси айаллири өз вәдинамисини амма вә йеза кадирлири алдида оқуватқан көрүнүш.
www.xjkcdj.gov.cn Дин елинди.

Куча партийә қурулуши торида елан қилинған хәвәргә асасән, куча наһийиси чимән йезилиқ һөкүмитиниң 6 ‏- айда пүтүн йеза миқясида қанунсиз диний гезит, журнал, китаб, ун - син вә електронлуқ нәшр буюмлири қатарлиқларни йиғиш һәрикити қозғиғанлиқи ашкариланди.

Бу һәқтә толуқ мәлуматқа игә болуш үчүн, биз чимән йезилиқ һөкүмитиниң нөвәтчи ишханисиға телефун урдуқ. Телефунимиз уланғандин кейин нөвәтчи хадим билән қисқа бир сөһбәттә болдуқ. Нөвәтчи хадим өзиниң хизмәткә йеңи киргәнликини ейтип, бу һәрикәттин хәвири йоқ икәнликини билдүрди.

Дуня уйғур қурултийиниң шветсийидә турушлуқ баянатчиси дилшат решит әпәндиниң билдүрүшичә, һөкүмәт куча наһийисидә бир айдин буян җәмийәт муқимлиқи вә милләтләр иттипақлиқини қоғдаш шоари астида, аталмиш "диний радикалчилар"ға зәрбә бериш сиясий һәрикитини қозғиған.

Бу һәрикәт җәрянида куча райони бойичә 534 баш яғлиқи, 142 қур кийим, 104 тор ромал һәмдә ислам диниға аит 600 дин артуқ китаб көйдүрүп ташланған.

Биз чимән йезилиқ һөкүмитиниң йеза башлиқи миҗит қеюм билән сөзләштуқ, миҗит қеюм бизниң бир қанчә соаллиримизға җаваб бәргәндин кейин өзиниң деһқанчилиқ хизмитигә мәсул икәнликини билдүрди. Униң билән сөзлишиш җәрянида чимән йезисида йәнила һашар әмгики йолға қоюлуватқанлиқидин хәвәрдар болдуқ.

Дуня уйғур қурултийиниң баянатчиси дилшат ришит йәнә, куча наһийиси чимән йезисидин алған учурлириға асасән, мәзкур сиясий һәрикәттә 64 кишиниң иқтисадий җазаға тартилғанлиқини, буларниң ичидә 22 нәпәр әрниң сақал - бурут қойғанлиқи сәвәблик җәриманә төлигәнликини билдүрди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт