Kucha nahiyiside atalmish qanunsiz diniy teshwiqat buyumlirini yoqitish herikiti élip bérilmaqta

Kucha nahiyiside atalmish qanunsiz diniy teshwiqat buyumlirini yoqitish herikiti élip bériliwatqan bolup, sürette, kucha nahiyisi yaqa yézisi ayalliri öz wedinamisini amma we yéza kadirliri aldida oquwatqan körünüsh.

Kucha partiye qurulushi torida élan qilin'ghan xewerge asasen, kucha nahiyisi chimen yéziliq hökümitining 6 ‏- ayda pütün yéza miqyasida qanunsiz diniy gézit, zhurnal, kitab, un - sin we éléktronluq neshr buyumliri qatarliqlarni yighish herikiti qozghighanliqi ashkarilandi.

Bu heqte toluq melumatqa ige bolush üchün, biz chimen yéziliq hökümitining nöwetchi ishxanisigha téléfun urduq. Téléfunimiz ulan'ghandin kéyin nöwetchi xadim bilen qisqa bir söhbette bolduq. Nöwetchi xadim özining xizmetke yéngi kirgenlikini éytip, bu herikettin xewiri yoq ikenlikini bildürdi.

Dunya Uyghur qurultiyining shwétsiyide turushluq bayanatchisi dilshat réshit ependining bildürüshiche, hökümet kucha nahiyiside bir aydin buyan jem'iyet muqimliqi we milletler ittipaqliqini qoghdash sho'ari astida, atalmish "diniy radikalchilar"gha zerbe bérish siyasiy herikitini qozghighan.

Bu heriket jeryanida kucha rayoni boyiche 534 bash yaghliqi, 142 qur kiyim, 104 tor romal hemde islam dinigha a'it 600 din artuq kitab köydürüp tashlan'ghan.

Biz chimen yéziliq hökümitining yéza bashliqi mijit qéyum bilen sözleshtuq, mijit qéyum bizning bir qanche so'allirimizgha jawab bergendin kéyin özining déhqanchiliq xizmitige mes'ul ikenlikini bildürdi. Uning bilen sözlishish jeryanida chimen yézisida yenila hashar emgiki yolgha qoyuluwatqanliqidin xewerdar bolduq.

Dunya Uyghur qurultiyining bayanatchisi dilshat rishit yene, kucha nahiyisi chimen yézisidin alghan uchurlirigha asasen, mezkur siyasiy herikette 64 kishining iqtisadiy jazagha tartilghanliqini, bularning ichide 22 neper erning saqal - burut qoyghanliqi seweblik jerimane töligenlikini bildürdi.

Yuqiridiki awaz ulinishidin, bu heqtiki melumatimizning tepsilatini anglaysiler.