Күрәш билән өткән һаят (1)

Қәдирлик оқурмән достлар, инсанниң һаяти чәклик болиду, әмма һаят қәдирләнсә униңдин тилларда дастан болғидәк чәксиз қиммәт яритилиду. Буниңдин икки йил авалқи 29 - өктәбир күнидә аримиздин худди туюқсиз сақиған юлтуздәк ғайип болған мәрһум күрәш күсән әпәндиниң шанлиқ һаяти мана шундақ қәдир - қиммитини тапқан һәқиқий һаят иди.
Мухбиримиз айгүл йүсүп
2008-10-28
Share
Kuresh-kosen-rfada-305 Талантлиқ музикант мәрһум күрәш көсән әпәндиниң радомизни 2006 - йили 4 - йанварда зийарәт қилғанда музика орундап қалдурған хатирә сүрити.
RFA Photo

Униң өлүми шәрқий түркистан күрәш тарихиға бир бошлуқ қалдуруп кәткән,уни сөйгән, қәдирлигән кишиләрниң қәлбини мәңгүлүк җудалиққа чөмдүргән һәсрәтлик бир өлүм иди. 1959 - Йили үрүмчидики зиялий аилисидә туғулған күрәш көсән әпәндиниң һаят тарихи балилиқ чағлиридин тартип таки вапат әткүчә һаят, илим вә вәтән азадлиқи үчүн издиниш,тиришиш,тохтимай күрәш қилиш вә нәтиҗә яритиш билән толған җәңгивар вә мәзмунлуқ һаят иди.

Мәрһум һаят чеғида вәтән ичидә өзиниң сәнәттики аҗайип таланти билән хәлқимиз қәлбидин чоңқур орун елип нам чиқарған болсиму, лекин у өзиниң сәнәт саһәсини вәтән үчүн күрәш қилишниң җәң мәйданиға айландуруп, уйғур хәлқини һәр минут әркинлик үчүн болидиған күрәшкә тәйяр болушқа чақириқ қилған иди. У явропаға сиясий көчмән болуп кәлгәндин кейинму, өзиниң вәтәнниң һөрлүк вә азадлиқи үчүн күрәш қилиш, әркинликкә еришиш арзусини рояпқа чиқириш үчүн бир минутму тохтап қалмиған иди. У илгири - ахири болуп дуня уйғур яшлири қурултийиниң муавин рәиси вә кейин баш рәиси, дуня уйғур қурултийиниң баш тәптиши, шиветсийә уйғур комитетиниң рәиси қатарлиқ вәзипиләрни өз үстигә елип ишлигәндин башқа, ғәрб шамили журнилини нәшр қилиш, һөр уйғур радиосини аңлитиш, шиветсийә уйғур комитетиниң тор бити вә өзиниң шәхси тор бити болған дуттар тор бетини әтрапидики истедатлиқ ярдәмчилири билән һәмкарлишип ясаш қатарлиқ түрлүк илмий вә техникилиқ хизмәтләрниму вайиға йәткүзүп орундиған иди.

Мәрһум күрәш күсән әпәнди йәнә, дуня қәләмкәшләр җәмийитигә әза болуп кириш үчүн йиллап издинип,америка,канада қатарлиқ дөләтләргичә зиярәттә болуп уйғур қәләмкәшләр җәмийити учун иқтисади мәнбәгә еришиш пурситини яратқан болсиму, әпсуски мәрһумниң өмри өзи зор әҗир қилип қолға кәлтүргән әмгәк мивисини көрүшкә яр бәрмиди.

Мәрһум күрәш күсән әпәнди шиветсийиниң әскулистуна шәһиридә яшаватқан мәзгилидә бир яқтин вәтән дәваси елип барса, йәнә бир тәрәптин өзиниң йүксәк пәллигә йәткән композиторлуқ маһаритини ишқа селип барлиқ долан,қумул муқамлирини йеңидин рәтләп нотиға елиш, қәшқәр, атуш, или, турпан қатарлиқ җайлардики уйғур хәлқ нахшилирини қайтидин ейтип йеңидин үнгә елиш қатарлиқ хизмәтлирини башливәткән вә буниңдин 3 үн CD линтисиниң тәйярлиқ хизмитини пүттүргән иди.

Униң 12 томлуқ уйғур нахша - музика қамуси тәйярлап шиветсийә дөләтлик мозийиға тәқдим қилиштәк зор пилани бар иди. Униң йәнә шиветсийә дөләтлик оркестири билән бирлишип орундиған шәрқий туркистан истиқлал марши дәвир бөлгүч әһмийәткә игә болуп, биз үчүн әң зор музика байлиқи сүпитидә мирас болуп қалди. Мәрһум өмриниң ахирқи йиллирида шиветсийә дөләтлик нахша - усул өмики тәрипидин муқим хизмәтчиликкә тәклип қилинған болуп, униңға уйғур музика тәтқиқати үчүн йетәрлик шәрт ‏ - шараит яритип берилгән вә зор диққәт етибарға еришкән иди.

Худди күрәш күсән әпәнди һаят чеғида ейтқинидәк, күрәш өлмәйду! у таки шәрқий түркистанниң асминида ай - юлтузлуқ көк байрақ җәвлан қилғанға қәдәр, һәр бир уйғурниң қәлбини күрәш марши билән ойғитип туриду!

Юқиридики аваз улинишидин, күрәш күсән әпәндиниң һазир шиветсийидә яшаватқан сиңлиси мунәввәр ханим билән болған телефон зияритимизни көпчиликкә сунимиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт