хитайниң 19 өлкиси уйғур аптоном районини парчилап булайдиған йеңи сиясәт
тәйвәндә туруватқан мәшһур сиясий мулаһизичи лин бавхуа йеқинда, хитайниң уйғурларға қаратқан йеңи сиясити һәққидики мәхсус тәтқиқатини әркин асия радиосиға тәқдим қилди. униң қаришичә, хитайниң һазир уйғурларға қаратқан йеңи сиясити әмәлийәттә барчә һелә - микрини муҗәссәмләп қайтидин пәдәзләп йеңи нам қойған кона мустәмликичи сиясәт.
партком секритариниң қатил образини рәһимдил образға алмаштурғанлиқи бир һелә
лин бавхуа ниң баян қилишичә, хитай уйғур аптоном райониға қаратқан сияситини, һелә - микрлириниң һәммисини муҗәссәмләп, қайтидин пәдәзләп чиқип, уни йеңи сиясәт дәп атап, үрүмчи вәқәсиниң бир йиллиқ хатирә күнлиридә толуқ ашкарилиди. хитай уйғур аптоном райониға қаратқан сияситини өзгәрткәнликини испатлаш үчүн, бу йил 4 - айдила партком секритариниң қатил образини рәһимдил образға алмаштурди. әмма қатил ваң лечуән һазир йәнила бейҗиңдики сиясий қанун комитетида туруп, аз санлиқ милләт районлирида муқимлиқни сақлаш дегән намдики қирғинчилиққа йетәкчилик қиливатиду. һазир рәһимдил дегән марка чапланған җаң чүншән болса, хунәндә силиқ вастә билән қаттиқ сиясәт йүргүзгән әмәлдар иди. у һазир хитайниң тибәттә қоллиниватқан силиқ сияситини уйғур аптоном районида йолға қоюватиду. әмәлийәттә, хитайниң тибәт сиясити, тибәттә ақмайватқан сиясәт.
19 өлкә уйғур аптоном райониға нишанлиқ иқтисадий ярдәм бериш дегән йеңичә булаң - талаң
лин бавхуа ниң баян қилишичә, хитай уйғур аптоном райониға қаратқан сияситини өзгәрткәнликини испатлаш үчүн, иккинчи қәдәмдә бейҗиңда мәркизи комитетниң шинҗаң хизмити йиғини ни ечип, 19 өлкә уйғур аптоном райониға нишанлиқ иқтисадий ярдәм бериш дегән шуарни оттуриға қойди. бу сиясәтни, дең шавпиңниң сиясий мәсилини иқтисадни тәрәққи қилдуруш арқилиқ, йәни пул билән һәл қилиш нәзирийисигә асасән түзүлгән дәп җакарлиди. әмәлийәттә, буниңдин бурун җаң земинниң, бу нәзирийигә асасән түзгән уйғурларға җан сақлаш һоқуқинила бериш, мустәқиллиқ дәвасини йоқ қилиш дегән сиясити мәғлуп болған иди. хитай бу қетим уйғурларға қарита түзгән он тоққуз өлкә иқтисадий ярдәм бериш дәп аталған сиясәт, тоғрисини ейтқанда, чиң сулалисиниң ахирқи йиллирида, мустәмликичи дөләтләр хитайға қолланған өзигә ишик ачқузуш, парчилап тала - тараҗ қилиш сияситиниң көчүрүлмиси. йәни хитайниң 19 өлкси уйғур аптоном районини парчилап бөливелип, талан - тараҗ қилидиған сиясәт. бу сиясәт буйичә уйғур аптоном райониға ярдәм қилдуқ дегән пул, йәнила хитайларниң янхуқиға кириду.
санға қарап баҗ төләш дегәнни баһасиға қарап баҗ төләш кә өзгәрткәнлик ислаһат елип барғанлиқ әмәс
лин бавхуа ниң баян қилишичә, уйғураптоном райониниң тәбиий байлиқлири мол болғанлиқи, мәсилән, көмүр записи хитайдики пүтүн көмүр записиниң 40% ни, нефит записи 31%ни, тәбиий газ записи 34% ни тәшкил қилидиғанлиқи, бу ениргийә йетишмәйдиған хитай үчүн интайин әһмийәтлик. хитай бу қетим уйғур аптоном райониға қаратқан йеңи сиясти дә баҗ ислаһати қилдуқ дәп, пәқәт санға қарап баҗ төләш дегән гәпни баһасиға қарап баҗ төләш дегәнгә өзгәртти, халас.
бу, ислаһат елип барғанлиқ әмәс, чүнки баһани хитай өзи бәлгиләйду, йәнила тәбиий байлиқ игилиригә һечнемә тәгмәйду. бу йәнә бирхил булаңчилиқ. хитай уйғур аптоном райониниң әң чоң мәнпәәтини булап кетип, бу қәрзниң әң кичиклирини төлимәкчи. әмәлийәттә, бу бир мустәмликичилик.
уйғурлар билән хитайлар оттурисидики һазирқи өчмәнликни пәсәйтишкә аз дегәндә 40 йил кетиду
лин бавхуа ниң баян қилишичә, хитай уйғур аптоном райониға қаратқан сияситини өзгәрткәнликини җакалиғандин кейин, 10 нәпәр террорчи қолға елинди, партлитиш әслиһәлири олҗа елинди дәп җакарлиди, камбоджада җенини бақалмиған бу мусапирлар, шу җайда туруп бомба ясаптикәнму? буниң пакити қени? хитай мушундақ ялған гәп билән уйғур аптоном районида йәнә қаттиқ зәрбә бериш һәрикитини башлиди. хитайниң мәқсити уйғурларни зулумни көрмәйдиған, аңлимайдиған, паш қилмайдиған қилиш. уйғур юртлириға көчүрүп келингән хитай көчмәнлириниң қаришичә, уйғурлар билән хитайлар оттурисидики һазирқи өчмәнликни пәсәйтишкә, аз дегәндә 40 йил кетиду.
юқиридики улиништин бу прогирамминиң тәпсилатини аңлиғайсиләр.