"Li péngning 4 - iyun xatirisi" dégen kitabta némiler bayan qilin'ghan?

4 ‏ - Iyun tyenenmén weqesi uyushmisining logoliridin biri.

Sherqi jenubi asiya döletliride xitayche chiqidighan gézitlerde, bügünmu "li péngning 4 - iyun xatirisi" dégen kitabning xongkongda neshr qilin'ghanliqi heqqide yézilghan xewer we obzorlar élan qilindi.

Amérika, en'gliye, kanada we awstraliye qatarliq döletlerdiki in'glizche uchur wastilirimu bu heqte xewer obzorlar élan qildi. "Tüwitér", "féysbuk" dep atilidighan tor sehipiliride bolsa, bu heqtiki baha we pikir almashturush pa'aliyetliri téximu köp. Emma xitayning shinxu'a agéntliqi "li péngning 4 - iyun xatirisi" xongkongda neshr qilin'ghanliqi heqqide ya xitayche, ya in'glizche sehipiliride héchqandaq xewer yaki obzor élan qilmidi. Kommunist xitayning xongkongda tesis qilghan hökümitimu buninggha masliship, "tyen'enmén" dégen tor bétini tosuwetti.

"Li péngning 4 - iyun xatirisi" xongkongda sétilishqa bashlidi

Xongkongda in'glizche chiqidighan "jenubiy xitay seher pochtisi" gézitide bayan qilinishiche, "li péngning 4 - iyun xatirisi" dégen 279 betlik xitayche kitab hazir xongkongda sétilishqa bashlidi.

Robért saygét: li péng emdi 81 yashqa kirgende kitab yézish arqiliq özining obrazini yaxshiliyalmaydu

Fransiye yazghuchisi robért saygétning "li péngning 4 - iyun xatirisi " dégen kitabning tyen'enmén weqesidiki qarangghu tereplerni körüshke yardimi bar" serlewhilik obzori makawda élan qilindi. Aptorning qarishiche, 1989‏ - yili tyen'enmén meydanida démokratik heriketni qanliq basturghan xitay rehberlirining biri bolghan li péng, emdi 81 yashqa kirgende kitab yézish arqiliq özining obrazini yaxshiliyalmaydu.

Xu jintaw "bu kitabning ashkara neshr qilinishigha qoshulmaymen" dep jawab bergen

Erkin asiya radi'osining obzorchisi chén pokong "li péngning 4 - iyun xatirisi" dégen kitabning tuluq tékistini oqughandin kéyin yazghan obzorida bayan qilishiche, li péng deslepte "hel qilghuch peyt" dep nam qoyup yazghan bu kitabini, 2004‏ - yili xongkongda neshr qildurmaqchi bolup, kitab tékistini merkizi komitét siyasiy byurogha yollighan. Xu jintawdin "bu kitabning ashkara neshr qilinishigha qoshulmaymen" jawab kelgen.

Bu kitab aptorning pikrini élish üchün ewetilgende intérnétte tarqilip ketken

Aptorning bayan qilishiche, xelqning pikir bayan qilish erkinlikini qattiq chekligen li péng özi kitab neshr qilmaqchi bolghanda, pikir bayan qilish hoquqi cheklinip qélip, kitabini alte yilghiche neshr qilduralmighan. Xongkongdiki yéngi esir neshriyati axir, bashqilar teripidin "li péngning 4 - iyun xatirisi" dep nam qoyulup neshrge teyyarlan'ghan bu kitabning tuluq tékistini, aptorning pikrini élish üchün ewetkende intérnétte tarqilip ketken.

Bu kitab rast, emma uningda bayan qilin'ghan pakitlarning hemmisi rast bolushi natayin

Aptorning bayan qilishiche, "li péngning 4 - iyun xatirisi" dégen bu kitabni, eyni waqitta li péngning esheddiy siyasiy reqibi bolghan bash sékrétar jawziyangning katipi bawtongning oghli neshrge teyyarlighan. Li péng gerche özining düshmini bolsimu, uning söz qilishigha yol qoyghan. Bu kitab rast, emma uningda bayan qilin'ghan pakitlarning hemmisi rast bolushi natayin. Chünki li péng bu kitabida, tyen'enmén weqesining sirini yoshurush üchün jang zémin türmige soliwetken eyni waqittiki béyjingning sheher bashliqi chén shitongning ismini peqet tilgha almighan.

Herbiy halet yürgüzüsh we basturushni déng shawpingghila artip qoyghan

Özini "tarixning guwahchisi" dep atighan li péng bu kitabida, gerche heqiqiy ehwalni ashkarilaydighanliqini jakarlighan bolsimu, emma weqening pakitlirining bezilirini bayan qilip, bezilirini, bolupmu özining obrazigha munasiwetlik mesililerni yoshurghan. Herbiy halet yürgüzüshni déng shawpingla otturigha qoyghan we basturushni békitken dep körsitip, sheherni qan'gha boyighan jawabkarliqning özige tewe qismini yuyup tashlimaqchi bolghan.

Jang zémin, xu jintaw, wén jyabawlargha "héchkim qéchip qutulalmaydu" dep signal bérilgen

Li péng 150 ming xetlik bu kitabida, déng shawping herbiy halet yürgüzüsh buyruqi chiqarghan we herbiy qisimlarni béyjinggha yötkep kelgendin kéyin, her qaysi ölke, sheher, ministirliq bashliqlirining qandaq pozitsiye bildürgenlikini bayan qilish arqiliq, béyjing shehirini qan'gha boyashni qollighan jang zémin, xu jintaw we eyni waqitta merkizi komitét katibat ishxanida ishleydighan wén jawbawlargha " '4 - iyun weqesi'ni aqlashqa yol qoyma, bolmisa alliqachan bir kémige chüshüp qalghan hemmimiz biraqla gherq bolimiz, héchkim qéchip qutulalmaydu" dep signal bergen.

Eyni waqitta sheherni qan'gha boyashni terghib qilishta xizmet körsetken, emma sheher qan'gha boyalghandin kéyin wijdan azabi tartqan merkizi xelq radi'o istansisi, merkizi téléwiziye istansisining déktorlirighimu "weqedin kéyin qariliq tutqini bikar" dep tehdit salghan. Emeliyette, bu kitabtiki bayanlar bir ghaljir ademning özgiche awaz bilen kapshighanliqidinla ibaret.

Yuqiridiki awaz ulinishidin, bu heqtiki melumatimizning tepsilatini anglaysiler.