Liwandiki hizbullahchilarning jinayetliri

Melumki, hizbullahchilar iranning ereb dunyasidiki ikkinchi yüzi bolup, ular mundin ilgiri isra'iliyige qarshi mewqesi bilen ereblerni we musulmanlarni qayil qilip kelgen bolsimu, süriye mesiliside beshshar esedni qollash we inqilabchi xelqni öltürüsh ishlirigha yardem qilishtin ibaret qilmishliri seweblik musulmanlarning neziridin chüshüp ketti. Ular ottura sherqte her qaysi islam döletliri teripidin yaqturulmighan bir jama'et haligha kélip qalghan.

Se'udi erebistanida chiqidighan “El weten” gézitining 2012-yili 3-noyabir sanida, “Hizbullahchilarning chümperdisi échilip boldi” dégen témida bir maqale élan qilin'ghan bolup, maqalide mundaq dep yézilghan: “Hizbullahchilarning beshshar el esedni közini yumup turup axirighiche qollash niyitidin yanmighanliqi ereb we islam ellirining ghezep-nepritini ashuruwetkendek, amérika we en'gliye qatarliq chong döletlernimu heyran qaldurdi. Chünki hizbullahchilarning tügishish aldida turuwatqan esed hakimiyitini qollashta ching turuwatqanliqi ularning eqliyitining we siyasiy iqtidarining qanchiliklikini körsitip béridu. Bu xuddi örülüp chüshüsh aldida turghan tamni tutuwalimen dep özini halak qilghan'gha oxshash bir exmeqliqtur. Shunga amérikining ‛washin'gton post‚ géziti bilen en'gliyining ‛sanday télégraf‚ gézitining hizbullahchilarning ichide esedni qollash mesiliside bölünüsh barliqini, dunya siyasitidin az-tola xewiri bar ademlirining kéyinki ziyan-zexmetni oylap esedni qollashni ret qilidighanliqi we köp sanliqni igiligen iranchi küchlerning esedni axirighiche qollashta ching turuwatqanliqini, shundaqla hizbullahchilarning xelqning neziridin chüshkenlikini élan qilghanliqi ejeblinerlik emes. Bu ikki gézitte yene hizbullahchilarning beshshar esedni qurban qilish bedilige süriyini qutquzup qélish dégen pikirde chong ixtilap ichide ikenliki bayan qilin'ghan.”

Hizbullahchilarning teqdiri süriyige baghliq

Maqalide yene mundaq dep yézilghan:
“Iranning we hizbullahchilarning siyasetchiliri özlirining sünni musulmanlar bilen tirkishish aldida turuwatqanliqini we dunyadiki köpligen musulman xelqning nepritige yoluquwatqanliqini obdan bilidu. Emma ular süriyidin waz kéchelmeydu. Chünki hizbullahchilarning teqdiri süriyige baghliq. Ular liwanni idare qilghanning sirtida süriyide melum nupuzgha ige bolushni teme qilmaqta. Hizbullahchilar shundaq bir patqaqqa kirdiki, uningdin chiqay désimu chiqalmaydu. Chünki ular 2006-yili isra'iliye küchliri bilen urushup qoyup, dunyache shöhret qazan'ghan bilen bu qétim süriye mesiliside ilgiriki shöhretlirining hemmisini yoqqa chiqardi. Hizbullahchilar özlirining diniy rehbiri hesen nesrullani ulughlap ilah derijisige chiqiriwalghan. Buning sewebimu shu waqittiki urush ata qilghan shöhret yüzisidin idi. Shunga deymizki, hizbullahchilar esed bilen birlikte tügishish aldida turghan bir saye.”