Xelq'ara jinayi ishlar mehkimisi qazafiyni tutush qarari chiqardi

Shuning bilen kazafiy sudan re'isi ömer beshirdin kéyinki hakimiyet üstide turup heqqide tutush buyruqi chiqirilghan ikkinchi dölet bashliqi hésablinidiken.

Londonda chiqidighan “Ottura sherq” gézitining 2011-yili28-iyun seyshenbe künidiki sanida, “Kazafiyni tutush buyruqi heqqidiki inkaslar” dégen témida bir maqale élan qilin'ghan bolup, uningda mundaq dep yézilghan: “27-Iyun küni lahayda kazafiy, seyful islam we abdulla senusiy qatarliq üch kishini tutush heqqide qarar élan qilghan bolup, bu qarar xelq'arada köpligen siyasiyonlarning, teshkilat we jem'iyetlerning qizghin qarshi élishigha we qollishigha érishti. Qarar élan qilin'ghan haman liwiyidiki inqilabchilar teripidin qurulghan milliy komitétning re'isi mustafa abduljélil bu qararning nahayiti toghra bolghanliqi bildürgen. Shimaliy atlantik ehde teshkilatining bash katipi andiri emdi kazafiyning ishi tügidi dégen. En'gliye we gérmaniye tashqi ishlar ministirlirimu bu qararni küchlendürgen we kazafiy yéqinlirini uningdin wazkéchishke chaqirghan. Xelq'ara jinayi ishlar mehkimisining qarilighuchisi lowis morinu okambu kazafiy, uning oghli we abdulla senusiy qatarliq üch kishining 15-féwral künidin biri liwiyide eng wehshiy shekilde adem öltürüsh jinayetliri seweblik ularni tutush heqqidiki telepni 16-may küni mehkimge sun'ghan idi. Okambugha köre, kazafiy liwiyide élip adem öltürüsh, qiynash we tutqun qilish qatarliq wehshiy jinayetlerni sadir qilghanliq jinayiti bilen, kazafiyning 39yashliq chong oghli seyful islam liwiyige chet'ellerdin pulgha sétilghanlarni élip kélip, namayishchilargha qarshi ularni qorallandurghanliq jinayiti bilen,  liwiye dölet mexpiyetlik idarisining bashliqi abdulla senusiy kazafiyning yan tayiqi bolup, uning jinayi qilmishlirigha yardem bergen we namayishchilarni étish buyruqini bergen jinayiti bilen eyiblenmekte iken.”

Tünügün 27-iyun küni qatarning “El jezire” téléwiziye qaniligha xelq'ara jinayi ishlar mehkimisining merkizi lahaydin abdulwahid qudus mundaq bayanat bergen idi: “Bügün kazafiy we uning ikki neper yandishi heqqide xelq'ara jinayi ishlar mehmisi tutush qararini chiqardi. Qarardin kéyin her tereptin alqishlar yaghdi. Chünki bu minglarche bigunah insanning qénini tökken jinayetchiler heqqidiki höküm idi.”

Kazafiy özi heqqidiki tutush qararini emelge ashmaydighan qarar dédi

“Ottura sherq” gézitining 28-iyun sanida, qahire shehiridin xalid mehmudning “Kazafiy heqqidiki tutush qararini emelge ashmaydighan qarar dédi” dégen témidiki bir maqalisi élan qilin'ghan bolup, mundaq dep yézilghan: “Kazafiy xelq'ara jinayi ishlar mehkimisining qararini közge élip qoymidi we uni hergiz emelge ashmaydighan qarar dep sanidi. Liwiyilik bir mes'ulning bildürüshiche kazafiyni özining yandashlirigha nutuq sözleshke hazirlanmaqta. Liwiyilik yene bir mes'ul kazafiy tutush qararini qeghez yüzidiki qara siyadin bashqa nersige erzimeydu, kazafiyni qoghdash yolida jénini pida qilidighan milyonlighan liwiyilikler barliqini sözlidi. Ehwaldin qarighanda liwiyidiki kazafiy yandashliri kazafiyni tutush qararidin héch chöchümigen.”