Liwiyide hökümetke qarshi namayish dawamlashmaqta

Washin'gtondiki liwiye kishilik hoquq pa'aliyetchisi aliy ebuzakuk, liwiyide téximu köp qan tökülüshining aldini élish üchün, amérikining köp küch chiqirishi kéreklikini otturigha qoyup: “Amérika alahide bir küch, biz buni bilimiz, eger amérika bu mesilini hel qilishni xalisa, buni choqum hel qilidu” deydu.

Amérika tashqi ishlar ministiri hilariy klinton xanim, liwiyide yüz bériwatqan zorawanliqlarni xelq'ara jama'et bilen birlikte heriket élip bérish arqiliq hel qilish teshebbusini bildürmekte.

Washin'gtondiki mutexessis i'an lézzér, amérikining liwiye ichide saghlam bir munasiwet da'irisi bolmighanliqi üchün, liwiyining hazirqi weziyitini özgertish üchün köp xizmet körsitelmeydighanliqini, lékin kazafiyning hoquqidin ayrilishi muqerrer ikenlikini, iraqqa oxshash, oxshimighan qoralliq küchler liwiyidiki kontrolluqni qolgha élish üchün tirishchanliq körsitidighanliqini otturigha qoydi.

Bu arida liwiye rehbiri kazafiyning namayishchilargha oq chiqirish buyruqini bérishi bilen, paytext tripoli kochilirida adem uchratqili bolmaydighan halgha kelgen. Neq meydanni körgüchilerning metbu'atlargha ashkarilishiche, kazafiy terepdarliri we afriqidin élip kélin'gen eskerler, kochigha chiqqan liwiyiliklerni ölüm tehditi bilen qorqutqan.

Mu'emmer kazafiy bir kün ilgiri, liwiyidin hergiz ayrilmaydighanliqini, namayishchilarni bolsa zorawan térrorchilar dep eyiblep, xelqni ulargha qarshi urushqa chaqirip, waqti kelgende özini shéhitlikke ataydighanliqini bildürgen idi.

Italiye tashqi ishlar ministiri franko fratinining bildürüshiche, axirqi bir hepte ichide liwiyide az dégende 1000 kishi ölgen we zéminning yérimidin köpreki hökümet kontrolluqidin chiqip ketken.

AFP

Amérikidiki liwiye kishilik hoquq pa'aliyetchiliri, peqet tripolida ikki kün ichide ölgen adem sani 62 ge yetkenlikini bildürmekte, liwiyide yene kazafiy hökümitige qarshiliq bildürüp, istépa qilghan eskerler arisigha, liwiye ichki ishlar ministiri abdul fettax yunus qoshulghan.

Liwiyide kündin-kün'ge ewj éliwatqan qalaymiqanchiliqlar tüpeyli, herqaysi döletler liwiyide turushluq puqralirini öz dölitige qayturup kélish üchün heriket élip bériwatqan bolup, türkiye hökümiti minglighan türk ishchilirini qutuldurush üchün paraxot we ayropilanlirini ishqa sélip, türk puqralirini türkiyige qayturup kelgen.

Nöwette istanbul ata türk ayrodromida, her küni liwiyidin élip kélin'gen türklerni uchratqanliqi bolidiken, ularning her biri ayropilandin chüshüpla qorqunchluq hékayilerni anglitidiken.

“Kéche nahayiti dehshetlik idi, oq awazlirini angliduq. Tumanlarni körduq. Pütün türkler endishe ichide”, “Biz sheherning merkizide turimiz, etrapta saqchi yaki eskerche kiyin'genler yoq, puqrache kiyin'gen kishiler qolliridiki késeklerni terep -terepke étip, sheherni topa ichige kömüwetti.”

Türkiye metbu'atlirining xewerlirige asaslan'ghanda, liwiyide 25 ming türk bolup, ularning köpinchisi qurulush saheside ishleydu. Elwette türkiyige qaytip kelgen türkler özlirining nahayiti teleylik ikenlikini bildürmekte.

Bulardin bashqa, liwiyining béyjingda turushluq diplomatliridin biri wezipisidin istépa bérip, liwiye hökümitining namayishchilarni qoralliq basturghanliqigha naraziliq bildürdi. Namayishchilargha oq chiqirish buyruqi alghan ikki neper pilot buyruqni ret qilip, parashuttin sekrigen, xewerlerdin melum bolushiche, liwiyining sherqi terepliride hoquqning hökümetke qarshi küchlerning qoligha ötkenlikige da'ir xewerler tarqalmaqta.