Londondiki “Muhajirettiki yazghuchilar qelimi” orunlashturghan pa'aliyette Uyghurlar we Uyghur yazghuchiliri tonushturuldi

Bu pa'aliyetke london Uyghur ansambili qatnashqan bolup, ular pa'aliyette yene Uyghur naxsha, muzikisidin konsért bérish bilen birge, xelq'ara qelemkeshler Uyghur merkizining élip barghan pa'aliyetlirini, Uyghur we Uyghur yazghuchilirining bügünki ehwalini hemde söyün'gül xanimning “Köz yéshida nemlen'gen zémin” namliq romanining in'gliz tiligha terjime qilin'ghan örnek nusxisini tonushturdi.

exiledwriters.co.uk

Londondiki muhajirettiki yazghuchilar qelimi namidiki teshkilat, her xil sewebler bilen chet'ellerdin kélip, en'gliyide olturaqliship qalghan muhajirettiki yazghuchi, sen'etkarlarning eserlirini shundaqla oxshimighan milletlerning örp-aditi, weziyiti qatarliqlarni en'gliye xelqige tonushturush üchün pa'aliyet élip bériwatqan ammiwi teshkilat.

Biz bu qétimqi pa'aliyet we pa'aliyetni orunlashturghan muhajirettiki yazghuchilar qelimi namidiki teshkilat heqqide téximu tepsiliy melumat élish üchün london Uyghur ansambilining ezaliridin rehime xanimni ziyaret qilduq.

Rehime xanimning bildürüshiche, “Muhajirettiki yazghuchilar qelimi” bu yil orunlashturghan pa'aliyitige london Uyghur ansambilini teklip qilghan bolup, pa'aliyetke ansambildin nizamidin semetow, doktor rachel harris we rehime mexmut qatarliqlar qatniship, Uyghur naxsha, muqamlirini orunlash bilen bille, Uyghurlarning nöwettiki ehwalini we Uyghur yazghuchilirining ijadiyet örneklirini tonushturghan.

Rehime xanimning bildürüshiche, bu qétimqi pa'aliyette Uyghur yazghuchilirining ehwali we Uyghurlarning nöwettiki weziyiti tonushturulghandin bashqa, yene süyün'gül xanimning “Köz yéshida nemlen'gen zémin” namliq tarixi romanining in'glizche nusxisi tonushturulghan.

Rehime xanim yene, bu qétimqi pa'aliyetni orunlashturghan “Muhajirettiki yazghuchilar qelimi” teshkilatining ehwalini we pa'aliyetke qatnashqan yazghuchi, sen'etkarlarning Uyghurlar we Uyghur yazghuchi, sen'etkarlirining ehwaligha qiziqqanliqini bayan qildi.

Rehime xanim nöwette en'gliye qatarliq yawropa döletliride Uyghurlarning ehwaligha qiziqidighan we köngül bölidighan xelq'ara teshkilatlarning barghanche köpiyiwatqanliqini ilgiri sürüp, chet'ellerde muhajirette yashawatqan Uyghurlarning özi üchün qulayliq bolghan shara'itlardin paydilinip, Uyghurlarning ehwalini dunya jama'etchilikige anglitish yolining bundin kéyin téximu kéngiyidighanliqini bildürdi.