Лопта йәр тәврәш апитиниң зийини барғанчә артмақта

Хотән вилайитидә 9-март сәһәрдә йүз бәргән 6 бал әтрапидики йәр тәврәш, хотәнниң лоп наһийиси вә ақсу, хотән қатарлиқ 15 наһийә, шәһәр вә йезиларғичә тәсир көрсәткән.
Мухбиримиз гүлчеһрә
2012-03-12
Share
Uyghur-yer-tewresh-305.jpg Уйғур елидики илгирики йәр тәврәшләрдин бир көрүнүш.
AFP Photo

Хитай хәлқ ишлири министирлиқи ториниң ашкарилишичә,хәлқ ишлири министирлиқи 3-айниң 10-күни, җиддий уқтуруш чүшүрүп, төтинчи дәриҗилик апәттин қутқузуш буйруқи билән, хотәнгә апәтни тәкшүрүш хизмәт гурупписи әвәткән. Буниңға 9-март хотәнниң лоп наһийисини мәркәз қилип йүз бәргән йәр тәврәш апити сәвәб болған.

Мунасивәтлик учурларға қариғанда, хотән вилайитиниң лоп наһийисидә 3-айниң 9-күни шу җай вақти сәһәр 4:50 өткәндә 6 бал йәр тәвригән. Тәврәш мәнбә чоңқурлуқи 30 километир. Бу йәр тәврәшниң тәсири хотән, ақсу, қәшқәр, корла, или қатарлиқ 16 наһийә, шәһәр вә йезиларға қәдәр охшимиған дәриҗидә көрүлгән.

Һазирғичә уйғур ели даирилириниң ашкарилиған учурлириға асасланғанда, апәт әң еғир болған җайлар, хотәнниң лоп наһийисидики дол вә ават, бостан йезилири, хотән наһийисиниң бир қисим җайлири вә қариқаш наһийисиниң бәзи йезилири болуп,апәт әһвали һәққидә -11март тарқитилған статистикиларға қариғанда, бу йәр тәврәштә апәткә учриғанлар 30миң 764 аилә, 144 миң 201 кишигә йәткән.

Йәр тәврәшниң тәсиридә 5267 еғиз өй өрүлгән, 84миң 679 еғиз өйгә охшимиған дәриҗидә дәз кәткән. Апәт еғир җайлардин җиддий тарқақлаштурушқа тегишлик киши 36 миңдин ашиду. Бир қисим мәктәп, ятақ, дохтурхана вә деһқанларниң парниклири өрүлүп вәйран болған. Һәтта су өтмәс өстәңләрниң бир қисмиму вәйран қилинған, даириләр гәрчә һазирғичә өлүм ‏-йетим әһвалиниң мәлум әмәсликини елан қилған болсиму, бу йәр тәврәшниң кәлтүрүп чиқарған зиянлириниң техи толуқ статистика қилинип болмиғанлиқини бәзи җайларда апәтниң кәлтүргән зиянлириниң барғанчә артиватқанлиқини тәкитлиди.

Хитай ахбаратлириниң бу йәр тәврәш апитигә даир тарқитиватқан хәвәрлиридә йәнила бурунқидәк даирилириниң апәттики хәлқни қутқузуш үчүн җиддий һалда һәрбий вә кадирларни әвәткәнлики, хәлқниң һаятиниң хәвп астидин пүтүнләй қутулдурулуп, апәттики хәлқниң бир қисминиң бихәтәр җайларға кәпиләргә орунлаштурулуп хатирҗәм қилинғанлиқи тәшвиқ қилинмақта. Биз лоп наһийисидики апәт еғир болған йезиларға телефон қилған болсақму, апәттә телефон һәм ток симлири охшимиған дәриҗидә кашилиға учриған болғачқа у җайлар билән алақә уланмиди.

Хотән вилайәтлик йәр тәврәш идарисиниң хадими амал бар бу йәр тәврәшни кичиклитип көрситип, хотәнгә тәсири болмиди, асасән шизаңға йеқин алар тағлиқ райони вә қумлуқта йүз бәрди деди.

Лоп наһийә базири ичидики бир яш, йәр тәврәш тәсириниң хели зор болғанлиқини, наһийә базар ичидики өйләрниңму охшимиған дәриҗидә вәйранчилиққа учриғанлиқини өзиниңму вә қошнилириниңму өйлиригә дәз кәткәнликини, мунасивәтлик даириләр техи тәкшүрүшкә кәлмигәчкә, һазирчә амал йоқ хәтәрлик өйләрдә давамлиқ турушқа мәҗбур болуватқанлиқини, йәрлик радио узулиниң 9 миңчә кишиниң яриланғанлиқини аңлатқанлиқини билдүрди.

Хитай һөкүмитиниң хотәндә йүз бәргән бу йәр тәврәш апити һәққидики хәвәрлири һазирғичә адәм өлүш, ярилиниш әһвали көрүлмигәнликини билдүрмәктә. Һазирғичә мәлум болған биваситә иқтисадий зиян 623 милйон 483 миң йүәнгә йәткән. Уйғур елиниң җәнубидики деһқанлар асасән лай кесәклик өйләрдә олтурушлуқ, адәттә лай кесәк өйләр 5 балдин юқири болған йәр тәврәш һадисилиригә бәрдашлиқ берәлмәйду, һазирғичә бу җайларда йүз бәргән бәш бал әтрапидики йәр тәврәшләрниң кәлтүргән апәтлири зор болуп кәлмәктә. Бу қетим 16 шәһәр, наһийә вә йезиларғичә тәсири көрүлгән бу йәр тәврәшниң дәриҗиси 6 бал.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт