Шәрқий түркистан маарип вә һәмкарлиқ җәмийити уйғур оқуғучиларни мукапатлаш мурасими өткүзди

2008 ‏ - Йили 6 ‏ - 15 ‏ - күни түркийидә паалийәт қиливатқан шәрқий түркистан маарип вә һәмкарлиқ җәмийити истанбулниң зәйтинбурну вә сафакөй районлирида уйғур өсмүрлири үчүн ачқан ана тил йәсли синиплириниң оқуғучилирини мукапатлаш мурасими өткүзди.
Мухбиримиз арслан хәвири
2008.06.19
Istanbul-maarip-derneg1-305 Истанбулниң зәйтинбурну вә сафакөй районлирида уйғур өсмүрлири үчүн ачқан ана тил йәсли синиплириниң оқуғучилирини мукапатлаш мурасими.
RFA Photo / Arslan

 Мурасим истанбул шәһриниң зәйтинбурну районлуқ һөкүмәт бинасиниң йиғин залида ечилди. Мурасимға истанбулда яшаватқан уйғурлардин 300 дин артуқ киши иштирак қилди. Мурасим, истанбулда яшаватқан уйғур һәмшәһәрләр вә уйғур өсмүрлириниң өз ара мунасивәтни қоюқлаштуруш, дини, милли мәдәнийәтни җанландуруш, бирлик, баравәрлик вә инақ иттипақлиқни техиму күчәйтиш үчүн истанбулда яшаватқан һәмшәһәрлиримизниң бир йәргә тоюнуп, өз ара учурушни мәқсәт қилидикән. Мурасимға шәрқий түркистан маарип вә һәмкарлиқ җәмийитиниң баш катипи доктур алимҗан риясәтчилик қилди. Мурасимда шәрқий түркистан маарип вә һәмкарлиқ җәмийитиниң мәсуллиридин абликимхан мәхсум, маарип вә тәлим ‏ - тәрбийә мәсули абдухалиқ әпәнди сөз қилди.

Абликимхан мәхсум маарип җәмийитиниң тәлим ‏ - тәрбийә инилири һәққидә тохтилип мундақ деди: "аллаһниң салами силәргә болсун. Бир йәргә топлишип бу гүзәл мурасимға уюштурушқа мувәппәқ қилған аллаһқа һәмди ейтимән, тәшәккүр ейтимән. Бизниң бу шәрқий түркистан маарип вә һәмкарлиқ җәмийити қурулғили икки йил болди. Бу җәмийәт хәлқимизни бирләштүрүш, хәлқимизниң илмий сапасини юқири көтүрүшни мәқсәт қилип паалийәт башлиған. Җәмийәттә хизмәт қиливатқанлар болсун, җәмийәтни мадди вә мәниви җәһәттин қоллап ‏ - қоввәтләватқанлар болсун, әң аввал өзимизни ислаһ қилиш, өзимизни йетилдүрүш, шуниң билән биргә 4 яштин 50 яшқичә болған һәмшәһәрлиримизгә билмигәнни өгитиш принсип бойичә хизмәт қиливатимиз. Хизмәт қилиш җәрянида нурғун қериндашлар имканийитиниң йетишичә күч чиқирип һәмкарлишип келиватиду, аллаһ бизгә мушундақ хизмәт қилишқа шәрт ‏ - шараит һазирлап бәрди, аллаһниң бу пәзли иһсаниға бинаән аллаһқа көп һәмди ейтимиз, шуниң билән биргә бизниң ихласмән, һәқиқәтпәрвәр, вәтәнпәрвәр қериндашлиримиз, қолидин келишичә паалийәтлиримизни һәр җәһәттин қолидин келишичә қоллап келиватиду, бу қериндашларға алладин рәһмәт бәрикәт тиләймән, вә хатирҗәмлик тиләймән, ахирәттә җәннәтниң алий орундин орун беришни алладин тиләймән."

Абликимхан мәхсум йәнә мундақ деди: " җәмийитимизниң маарип вә тәлим ‏ - тәрбийә ишлирини қилишқа наһайити қизғин, өзиниң йемәк ичмәк, кийим ‏ - кечәклирини ислаһ қилишни унутқан һалда хизмәт қиливатқан нурғун қериндашлиримиз бар. Нурғун ача сиңиллиримиз бар, улар бир йилниң ичидә аз әмәс әҗирләрни сиңдүрүп, мәлум миқдарда нәтиҗиләрни барлиққа кәлтүрди, шу түрдә хизмәт қиливатқан барлиқ қериндашлиримиз, мәйли оқутқучи қериндашлиримиз болсун, мәйли биз билән һәмкарлишиватқан башқа идарә һәйәтниң қериндашлиримиз болсун буларниң әҗригә аллаһтин рәһмәт, бәрикәт тиләймән, тенигә сағлиқ тиләймән. Бизниң мушу паалийәтлиримизни уюштуруш, һәмкарлишиш нийитидә, бизниң һәр бир паалийәтлиримизгә қатнишиватқан, мәктәпләргә балилирини әкилип бериватқан, барлиқ қериндашларға тәшәккүр ейтимән, аллаһ уларға дуня ‏ - ахирәттә бәхт ‏ - саадәт вә хатирҗәмлик ата қилсун, уларғиму алаһидә рәһмәт ейтимән. Бизниң нурғун қериндашлиримизниң мушу паалийәтләрни қоллуғуси, вә ярдәм қилишни халайдиған қериндашлиримиз бар, амма хитай залимлириниң зулумидин қорқуп, гәрчә 10 миң километир йирақта яшаватқан болсиму, мәлум тиҗарәт вә башқа сәвәбләр түпәйли, хитайлар билән тиҗарәт вә алақә қилишқа мәҗбур болғачқа, шу зулумидин қорқуп, бизгә қетилалмайватқан, амма паалийәтлиримизниң давам қилиши үчүн дуа тиләкләрдә боливатқан қериндашлиримизға аллаһтин һидайәт, вә хатирҗәмлик тиләймән."

Абликимхан мәхсум йәнә маарип җәмийитиниң маарип ишлириға мадди вә мәниви җәһәттин ярдәмдә болған шәхсләргә тәшәккүр билдүрүп мундақ деди: "бизниң асасий принсипимиз, өзимизни ислаһ қилиш, өзимизни йетиштүрүш, хәлқимизни ислаһ қилиш, хәлқимизни йетиштүрүш үчүн хизмәт қилимиз, мушу хизмәт җәрянида, аллаһ рази болсун, нурғун қериндашлар қолдин келишичә күч чиқирип, ярдәмлишип кәлди, мушу хизмәтлиримизни ишләшкә аллаһ таала нурғунлиған шәрт ‏ - шараит һазирлап бәрди. Шуниңға охшаш бизниң мушундақ паалийәтлиримизгә қатнишип бериватқан, мәктәпләргә балилирини әкилип бериватқан қериндашларға алладин дуня вә ахирәтлик бәхт саадәт тиләймән. Һәмдә уларға алаһидә рәһмәт ейтимән. Шуниң билән биргә мушу сафакөй вә зәйтинбурнуда ачқан мәктәпләрдә тәлим еливатқан өсмүрлиримизгә дуня ахирәтлик бәхт тиләймән. Мәһмут қәшқири, йүсүпхас һаҗипқа охшаш, имам бухари, имам әбу һәнийфигә охшаш ярамлиқ алимлардин болуп йетишип чиқишиға, өзиниң мәнпәәти үчүн шундақла муқәддәс динимиз үчүн хизмәт қилидиған, әхлақлиқ алим болуп йетишип чиқишиға тиләкдашмән."

Мурасимда йәнә өсмүр балилар номур көрсәтти, шеир дикламатсийә қилди. Нахша орунлиди. Мурасим ахирида истанбулда яшаватқан уйғур пишқәдәмлиридин сәләйһаҗим артуши, мәмәтели һаҗим, исмайил һаҗим қатарлиқ шәхсләр маарип җәмийитиниң тәлим - тәрбийә иш паалийәтлири һәққидә тохтилип, сөз қилди һәмдә маарип җәмийитиниң елип бериватқан паалийәтлири үчүн тәшәккүр ейтидиғанлиқини билдүрди. Һәмдә оқуғучиларға мукапат боюмлири тәқдим қилди. Мурасим наһайити һаяҗанлиқ ичидә ахирлашти.
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.