Hökümet da'iriliri maralbéshi déhqanlirining telipining orunluq ikenlikini étirap qildi

Ötken hepte maralbéshi nahiyisining sériqbuya baziridiki 50 din artuq déhqan, qeshqer wilayetlik wali mehkimisige bérip kolliktip naraziliq bildürgen. Ular naraziliqini wali mehkimisining qorusigha topliship jim olturuwélish sheklide élip barghan bolup, bu naraziliq da'irilerning we sheher xelqining küchlük diqqitini tartqan idi.
Muxbirimiz shohret hoshur
2010-10-28
Share
Dixan-awazi-yengisar-305 'Yéngisarda déhqan bolmaq tes' sin - alghusidin élinghan bu sürette, yéngisarliq uyghur déhqanliri özlirining shikayetnamisini oquwatqan körünüsh.
Oqurmenlirimiz ewetken 'yéngisarda déhqan bolmaq tes' namliq sin - alghudin élindi.

Bügün biz maralbéshi nahiyisi we sériqbuya baziridiki alaqidar da'irilerni téléfonda ziyaret qilip, mezkur déhqanlarning telipining qandaq bir terep qilin'ghanliq ehwali heqqide melumat igiliduq. Da'iriler déhqanlarning telipining orunluq ikenlikini, mesilini bir terep qilish üchün bu heqte tekshürüsh élip bériwatqanliqini bildürdi.

Maralbéshi nahiyisining sériqbuya baziridiki déhqanlar,  yillardin béri derdini ichige yütüp kelgen. Bu yil tunji qétim  herqandaq bir awarichiliqqa kökrek kérip, wali mehkimiside naraziliq bildürgen. Da'iriler déhqanlargha yélinip - yalwurup  nahiyige qayturup epketken we ular bilen söhbet ötküzüp, tunji qétim ularning teleplirige estayidilliq bilen qulaq salghan. Nöwette bu déhqanlar da'irilerning öz teleplirige béridighan jawabini teqezzaliq bilen kütmekte.

Biz mesilining hel qilinish jeryanini igilesh üchün, aldi bilen sériqbuya bazarliq erziyet ishxanisidin ehwal igiliduq. Igilishimizche, sériqbuya bazarliq  partkom we hökümiti mesilini hel qilishtin özini qachurmaqta, ular eger bu déhqanlarning teleplirini orundisa, u chaghda bashqa jaylardiki déhqanlarningmu heq telep qilip otturigha chüshüdighanliqidin, buning bilen mesilining chongiyip kétidighanliqidin endishe qilmaqta.

Igileshlirimizdin qarighanda, nahiyilik hökümetmu, naraziliq heriketlirining kéngiyip kétishidin endishe qilmaqta. Emma, ular mesilini yépiwétish yaki déhqanlargha tehdit sélish bilen emes, belki narazi boluwatqan déhqanlarning telipini qismen bolsimu orundap, ularning naraziliqini peseytishning yolini tutmaqta. Ular mushu qétimliq naraziliq weqesidin kéyin, nahiye boyiche omumyüzlük déhqanlarning telep - pikirlirini igilesh üchün, mexsus tekshürüsh pa'aliyiti élip barmaqta.

Melum bolushiche, bu bir türküm déhqanlarning köpinchisi  bu qétim  da'irilerning mesilini adil bir terep qilidighanliqigha  ishench bilen qarimaqta, yene bir türkümliri bolsa, yenila guman we endishe ichide bolup, eger bu qétim köngüldikidek jawabqa érishmise, naraziliqini dawamlashturudighanliqini, naraziliqini ipadiligendimu, téximu keskin we téximu jiddiy shekillerde ipadileydighanliqini bildürmekte.

Yuqiridiki awaz ulinishidin, bu heqtiki melumatimizning tepsilatini anglaysiler.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.