Маралбешида “мәдәнийәт инқилаби” дәвригә хас бир тутқун қилиш вәқәси

Маралбеши наһийисиниң сериқ буя базиридики бир деһқан яш, өйидә компютер сақлиғанлиқи вә чәтәлдики бир дости билән алақиләшкәнлики үчүн, бөлгүнчилик билән әйиблинип тутқун қилинған.
Мухбиримиз шөһрәт һошур
2011.06.29
Xitay-Internet-cheklesh-305.jpg Сүрәттә, хитайниң мәлум җайидики интернетханисида назарәтчилик қиливатқан интернет сақчилиридин бири мәлум интернет ишләткүчини тәкшүрмәктә.
AFP Photo

Йеқинда радио аңлиғучилиримиздин бири, маралбешиниң сериқбуя базиридики мәһмут аблимит исимлик бир тиҗарәтчиниң, бултур 11-айда намәлум сәвәб билән дадиси билән бирликтә тутқун қилинип һазирғичә ғайиб болуп кәткәнлики, бу дада-бала тутқунларниң әһвалидин аилә тавабиатлири вә мәһәллә җамаитиниң һечқандақ учур алалмайватқанлиқини радиомизға инкас қилған иди. Бирқанчә һәптилик әһвал игилишимиз нәтиҗисидә, мәһмут аблимитниң чәтәл билән алақиләшти дәп қарилип тутқун қилинғанлиқи вә униң нөвәттә қәшқәр вилайәтлик қамақханида тутуп турулуватқанлиқи ашкариланди. Әһвални мәлум қилған сақчи хадиминиң дело һәққидики баянлири, җүмлидин мәһмут аблимитниң аталмиш җинайити вә пакитлар һәққидики тәсвирлири алаһидә диққәттә сазавәрдур.

Мәһмут аблимит әслидә маралбешиниң сериқбуя базири, 16-кәнтидин болуп, у башланғуч мәктәпни пүттүргәндин кейин, оқушсиз қалған. У ялғуз деһқанчилиққа тайинип раһәт турмуш кәчүрәләйдиғанлиқиға көзи йәтмигәндин кейин, хитай өлкилиригә кирип ушшақ тиҗарәт билән шуғулланған. У бу йолдиму анчә көп илгири басалмиғандин кейин, чәтәлгә чиқип ишләш яки тиҗарәт қилишниң йоллири үстидиму издинип баққан. У тирикчилик йоли үчүн учур игиләш, мәлумат топлаш мәқситидә компютер сетивалған вә интернетни қоллинишни өгәнгән. Әмма мәһмут аблимитниң тирикчилик үчүн бу издинишлири маралбешидики сақчи хадимлириниң нәзиридә җинайәтниң аламәтлири болуп көрүлгән.

Мәһмут аблимитни йеқиндин билидиған бейҗиңдики достлириниң баян қилишичә, мәһмут аблимит тутқун қилинишниң алдида бейҗиңда бир мәзгил турған болуп, у бу җәрянда, чәтәлдә яшаватқан бир дости билән телефонда сөзлишип чәт ‘әлдә ишләш яки тиҗарәт қилиш йоллири һәққидә мәлумат сориған. Мәхмут аблимитниң дости униң соаллириға җаваб бәргәндин башқа, сөз арисида йәнә өзиниң шу күни уйғур миллий һәрикитиниң рәһбири рабийә қадир ханимни өзи туруватқан дөләттики телевизор хәвәрлиридә көргәнликини һаяҗанланған һалда дәп бәргән. Мәһмут аблимитниң достлириниң тәхмин қилишичә, мәһмут аблимитни чәтәлдики тәшкилатларға бағлинип әйиблинишиниң бирдин -бир пакити мушу болуши мумкин. Бу тәхминниң тоғрилиқини сақчи хадиминиң сөзлири дәлиллимәктә.

Мәһмут аблимитниң достлири, униң адәттә наһәқчиликкә чидимайдиған мәрданә миҗәзи барлиқини билидиғанлиқини, әмма сиясий паалийәтләргә арилишиш нийити яки яки қизиқиши барлиқини һеч байқимиғанлиқини билдүрүшмәктә.

Тәпсилатини юқиридики аваз улинишидин аңлиғайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.