'Асам бирләшмә азадлиқ фронти' ниң қомандани тәслим болди вә хитайда һәрбий тәлим елип келиватқанлиқини иқрар қилди

Сүрәт, һиндистанниң әң чоң шәһири, пул - муамилә мәркизи болған бомбай шәһиридә, 11 ‏ - айниң 26‏ - күни кәч саәт 11 дин 23 минут өткәндә тосаттин етилған оқ билән башланған террор һуҗумидин бир көрүнүш.

Һинидстан даирилири һазир, мумбайда йүз бәргән террорлуқ делосидики җинайәт гумандарлирини сотлашқа тәйярлиқ көрүватиду. Мушундақ пәйттә, һинидистанда чиқидиған 'йеңи деһли хәвәрлири' бүгүн, 'асам бирләшмә азадлиқ фронти' дегән тәшкилатниң қомандани вә ярдәмчиси қатарлиқ йәттә кишиниң тәслим болғанлиқини хәвәр қилди. Һиндистанниң асам шитатиға чегридаш башқа шитатлар вә әтраптики дөләтләрдики учур вастилири вә 'асия вақти' гезити бу сәзгүр вәқәни дәрһал көчүрүп басти вә тәпсилатини техиму ениқ хәвәр қилишқа теришти. Бу хәвәрниң хитайчә тәрҗимиси алди билән хитайдики муназирә мунбәрлиридә тарқалди.

'Асам бирләшмә азадлиқ фронти' ниң рәиси вә қомандани арабида раҗкова тәслим болди

Бирләшмә агентлиқиниң баян қилишичә, һинидстан чегра бихәтәрлик қисимлириниң баянатчиси рави гәнди бүгүн, һинидстанниң асам шитатидики 'асам бирләшмә азадлиқ фронти' дегән бу тәшкилатниң рәиси вә қомандани арабида раҗкова, униң ярдәмчиси вә аилә тәвәлири болуп 7 адәм 12‏ - айниң 4 ‏ - күни тәслим болди, дәп җакарлиған.

Хәвәрдә ейтилишичә, 'асам бирләшмә азадлиқ фронти' дегән тәшкилат 1979‏ - йили қурулғандин кейин, асам шитатини һиндистандин бөлүп чиқиш үчүн қораллиқ һәрикәт қилишқа башлиған. 1990‏ - Йилларда, һинидстан чегра қисимлириниң 8 искадирони вә 4 девизийиси 'асам бирләшмә азадлиқ фронти' ға қарита қоршап йоқитиш һәрикити елип барған. Шуниңдин кейин, бу тәшкилат һиндистанниң асам шитатиниң мәлум җайлирида вә асам шитатиға чегридаш болған аруначалниң нагаланда, манирур, мизорам, мегалая районлирида шундақла әтраптики бенгал, секким, ботан, непал, берма вә хитай қатарлиқ дөләтләрдә юшурунуп йүрүп мәхпий қораллиқ һәрикәт билән шуғуллинип кәлгән.

'Асам бирләшмә азадлиқ фронти' ниң қомандани арабида раҗковани бенгал сақчилири тутувелип һинидстанға өткүзүп бәргән

'Йеңи деһли хәвәрлири' дә баян қилишичә, 'асам бирләшмә азадлиқ фронти' ниң қомандани арабида раҗковани бенгал сақчилири тутувелип һинидстанға өткүзүп бәргәндин кейин, у, асамдики телевизийә иситансилири арқилиқ өзиниң тәслим болғанлиқини җакарлиған. Шундақла 'асам бирләшмә азадлиқ фронти' ниң әзалири нәдә һәрбий тәлим алғанлиқини ашкарилиған. Асам шитатиниң башлиқи тарун гогой 'асам бирләшмә азадлиқ фронти' тәслим болуп, бу шитатта тинчлиқ әслигә кәлгәнликини алқишлиған.

'Асам бирләшмә азадлиқ фронти' ниң әзалири 30 йилдин буян хитайдин һәрбий тәлим елип вә қорал билән тәминлинип келиватқанлиқиниң нәқ дәлил -пакитлири дуняға ашкара болди

Бүгүн һинидистан гезитлиридә елан қилинған бу хәвәр, 'асам бирләшмә азадлиқ фронти' ниң қомандани тәслим болғанлиқи биләнла әмәс, бәлки 30 йилдин буян мәхпий қораллиқ һәрикәт қилип, бу җәрянда 10 нәччә миң бигуна хәлқни һаятидин айриған бу тәшкилатниң әзалири хитайдин һәрбий тәлим елип вә қорал билән тәминлинип келиватқанлиқиниң нәқ дәлил - пакитлири дуняға ашкара болғанлиқи билән һиндистанниң асам шитатини вә бу шитатқа чегридаш башқа шитатларни вә әтраптики чегридаш дөләтләрни зилзилигә кәлтүрди.