Мәктәп мудириниң хизмитидин қалдурулуш сәвәби

Һазир уйғур елидә һөкүмәт кадирлириниң, оқутқучи - оқуғучиларниң җүмә намизиға кириши чәкләнгән болуп, хитай һөкүмити идарә, органларда бу тоғрилиқ мәхсус һөҗҗәт тарқитиш билән биллә, һәр қайси наһийә, йезилардики мәсчитләрдә һәр җүмә күни җүмә намизиға киргән кадирларни һәм 18 яштин төвән мәктәп оқуғучилирини, шу йезилиқ сақчихана, йезилиқ һөкүмәт һәтта оқутқучилар тәшкиллинип тизимға елишқа һәм ашу тизимлик бойичә уларға өз хизмәт орунлирида чарә көрүшкә башлиған.
Мухбиримиз миһрибан
2009-06-22
Елхәт
Пикир
Share
Принт
Һейтгаһ мәсчитидә намаз оқуватқан уйғурлар.
Һейтгаһ мәсчитидә намаз оқуватқан уйғурлар.
AFP Photo

Биз өткән һәптә, уйғур тор бәтлиридин уйғур елидики мәлум башланғуч мәктәп мудириниң, наһийилик һөкүмәтниң өзини җүмә күни мәсчиткә киргәнләрни тизимлаш ишиға қойғанлиқини рәт қилғанлиқи үчүн, қолға елинғанлиқи һәққидики инкасларни көргәндин кейин, сүрүштүрүш арқилиқ бу вәқәниң һәқиқәтән болуп өткәнликини, әмма бу мәктәп мудириниң қолға елиниш әмәс, бәлки мәктәп мудирлиқ һәм оқутқучилиқ вәзиписидин елип ташланғанлиқи һәққидики әһвални игилидуқ.

Бу ишниң өз кәнтидә болуп өткәнликини баян қилған бир деһқан, бу кишиниң өз кәнтидики башланғуч мәктәп мудири болуп, бу йил 5 - айниң башлири, йезилиқ һөкүмәтниң шу йезидики җүмә намизиға киргән оқутқучи, оқуғучиларни намазға кириштин тосушни рәт қилғанлиқи үчүн, наһийилик һөкүмәт тәрипидин вәзиписидин елип ташланғанлиқини, бу ишни пүтүн йезидикиләрниң билидиғанлиқини инкас қилди.

Биз бу мәктәп мудири ишлигән мәктәпкә телефон қилғинимизда телефонимизни алған мәктәпниң партийә ячейка секретари,дәсләп мәктәп мудириниң бир нәччә күн рухсәт сориғанлиқини, һазир ишханида йоқлуқини ейтти, у бизниң әркин асия радио истансисидин телефон қиливатқанлиқимизни билгәндин кейин, мәктәп мудириниң хитай тили сәвийиси төвән болғанлиқи үчүн, наһийилик маарип идариси уни хизмәттин тохтатқанлиқини баян қилди. Бу киши бизниң һәқиқий әһвални билидиғанлиқимизни уққандин кейин, бу мәсилиниң бир қәдәр сәзгүр мәсилә икәнликини, өзини тәңқислиқта қоймаслиқимизни, әң яхшиси хизмитидин истепа бәргән ашу мәктәп мудириниң өзи билән сөзләшсәк техиму яхши болидиғанлиқини ейтти.

 Телефонимизни алған сабиқ мәктәп мудири бизниң телефонни әркин асия радио истансисидин уруватқанлиқимизни билгәндин кейин, наһайити сәзгүрлүк билән, өзиниң йеши тошуп қалғанлиқи үчүн өзлүкидин истепа сориғанлиқини ейтип, бу тоғрилиқ артуқ сөзлигүси йоқлуқини билдүрди.

Уйғур тор бәтлиридә, уйғур елидики зиялийларға чүшкән бесимниң наһайити еғирлиқи һәққидә бәс - муназириләр көпийиватқан болуп, һөкүмәт кадирлириниң, зиялийларниң болупму оқутқучиларниң һөкүмәтниң түрлүк әмир,пәрманлирини, өзи халимисиму орунлашқа мәҗбур икәнлики, буниңға бойсунмиғанларниң хитай һөкүмити тәрипидин һәр вақит җазалиниватқанлиқи һәққидики муназириләр берилмәктә.

Мәлум бир тор бетидә, наһийилик һөкүмәтниң җүмәгә киргәнләрни тизимлашқа қарши турғанлиқи учун, хизмитидин қалдурулған бу мәктәп мудириға охшаш ақивәткә қалған зиялийларниң наһайити көплүки, лекин уйғур зиялийлириниң һәқиқәт үчүн хәлқ тәрәптә турсила хәлқниң уларни қәдирләйдиғанлиқи баян қилинип, бу мәктәп мудириниң җасаритигә кишиләрниң һөрмити ипадиләнгән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикирләр (0)
Share
Толуқ бәт