Д у қ қатарлиқ хәлқаралиқ тәшкилатлар мәркил ханимға очуқ хәт язди

Хәлқара кәчүрүм тәшкилати, чеграсиз мухбирлар тәшкилати, хәлқара тибәт һәрикитини һимайә қилиш тәшкилати вә д у қ бирликтә германийә баш министири мәркил ханимға қарита очуқ хәт елан қилди.
Ихтиярий мухбиримиз әкрәм
2011.06.27
Angela-Merkel-305.jpg Германийә баш министири аңәла мәркил ханим. 2011-Йили 28-январ.
en.wikipedia.org

Германийә ахбарат агентлиқиниң 6-айниң 25-күни баян қилишичә, хитай баш министири вен җябавниң германийә зиярити мунасивити билән хәлқара кәчүрүм тәшкилати, чеграсиз мухбирлар тәшкилати, хәлқара тибәт һәрикитини һимайә қилиш тәшкилати вә д у қ қатарлиқ тәшкилатлар 24-июн күни бирликтә германийә баш министири мәркил ханимға қарита очуқ хәт елан қилип, хитай билән болған сөһбәттә очуқ-ашкара һалда кишилик һоқуқ мәсилисини оттуриға қоюшни тәләп қилған.

Хитай баш министири вен җябавниң явропадики үч дөләткә болған зияритиниң тунҗи күни елан қилинған бу хәт германийә мәтбуатлирида диққәтни қозғиди. Вен җябав зияритиниң биринчи бекити венгрийигә болуп, у 24-июн күни будапештқа кәлгән иди. 26-Июндин башлап әнглийидә зиярәттә болуп, ахирқи қәдәм 27-28-июнда германийә зияритини давамлаштуратти. Хәлқара кәчүрүм тәшкилати германийә шөбисиниң мәсули мая әпәнди германийә ахбарат агентлиқиниң зиярити қобул қилғанда, мәркил ханимниң хитай баш министири билән көрүшкәндә очуқ-ашкара һалда кишилик һоқуқ мәсилисини оттуриға қоюп, хитайға бесим ишлитиши керәкликини тәкитлигән. У сөзидә, йиллардин бери германийиниң хитай билән болған кишилик һоқуқ сөһбитиниң йепиқ һаләттә давамлишип кәлгәнликини, әмди пәрдини ечип, хитайни дуня җамаити алдида ашкара тәнқидлиши керәкликини ейтқан. У йәнә германийә һөкүмитиниң хитай билән болған кишилик һоқуқ сөһбитиниң әмәлий қәдәм басидиған басқучқа кәлгәнликини, сөһбәттә кишилик һоқуқ мәсилисини тилға елип қоюш биләнла чәкләнмәсликини, бәлки кишилик һоқуқ паалийәтчилирини қоғдайдиған һеқиқи түзүлмә бәрпа қилиш зөрүрлүкини әскәрткән.

Германийә долқунлири радиоси 26-июн күни елан қилған “германийә кишилик һоқуқ тәшкилати һөкүмәтниң хитайни очуқ тәнқидлишини тәләп қилди” намлиқ хәвиридә баян қилинишичә, кишилик һоқуқ тәшкилати мәркил һөкүмитидин хитай баш министири билән болған сөһбәттә кишилик һоқуқ мәсилисини мәркизи тема қилишини тәләп қилған. Хәвәрдә ейтилишичә, кишилик һоқуқ тәшкилатлири германийә һөкүмитиниң хитай билән болған сөһбәттә әгәр хитайдики кишилик һоқуқ мәсилисини шәкил җәһәттинла тилға алса, бу әмәлийәттә “апәт характерлик бир сигнал болиду” дегән.

Германийә баш министири мәркил ханимға очуқ хәт йезишни д у қ тәшкиллигән болуп, бу тоғрисида д у қ баш катипи долқун әйса әпәнди чүшәнчә берип өтти.

Вен җябав германийидики зияритидә германийә тәрәп билән иқтисадий вә мәдәний саһәләрдә бир йүрүш келишимләрни имзалимақчи болған. Германийә ахбарат агентлиқиниң 27-июндики хәвәрлиридә көрситилишичә, хитай баш министири вен җябавниң бу қетимқи германийә зиярити җәрянида йәнә, хитай тәрәп билән бир сүрә мәдәний һәмкарлиқлар орнитилидикән. Германийә вә хитайдики музейлар, кутупханилар, опера өмәклири оттурисидиму келишимләр түзилидикән. Германийә ташқи ишлар министирлиқиниң билдүрүшичә, икки дөләт оттурисида йәнә мәдәний саһәдики кәспий хадимларни өзара тәрбийиләш вә кино филимлири алмаштуруш саһәсидиму һәмкарлиқлар орнитилидикән. 2012-Йили германийидә “хитай мәдәнийәт йили паалийити” уюштурулидикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.