Dalay lama: mesilini hel qilishning wastisi ‏- tinchliq

Dalay lama shiwétsariyidiki metbu'atlarning ziyaritini qobul qilghanda, aldi bilen budda dinida terghip qilin'ghan yaxshiliqlar heqqide alahide toxtalghandin kéyin": biz néme üchün yashaymiz, men dawamliq kishilerge meyli siz din'gha étiqad qiling yaki qilmang, choqum hayatingizni menilik ötküzüshingiz kérek dep tewsiye qilimen. Insan, yardem söyer, rastchil, mihir - shepqetlik we semimiy bolghanda, bashqilarning könglige azar bermigende pushaymansiz hayat kechüridu, buning eksiche yashighan kishiler bolsa axiri pushayman ichide qalidu," dégen.
Muxbirimiz eqide
2009-08-13
Share
Dalay lama Dalay lamaning yéqinqi süriti.
AFP Photo

Dalay lama, sözide yene, iqtisadiy tereqqiyatning éshishigha egiship, köpligen insanlarning maddi shey'ilerge bolghan qiziqishi kücheygenlikini we ularning xushalliqni sirttin izdeshke bashlighanliqini, biraq eslide heqiqiy xushalliqning ichki tuyghudin peyda bolidighanliqini tekitligen hemde xitay kommunistlirining türmisige 20 yil qamalghan bir tibetlikning hikayisini sözlep, azapliq türme hayatini béshidin kechürgen bu tibetlikning 20 yildin kéyin, dramsalagha saq - salamet yétip kelgenlikini,étiqad we ichki tuyghu uning hayatini saqlap qalghanliqini bildürgen.

Sürgündiki tibet hökümitining siyasitige nisbeten tibet yashlirining naraziliq inkasliri toghrisidiki mesililer heqqide ipade bildürgen dalay lama": sürgündiki tibet hökümiti démokratiye asasida qurulghan, shunga oxshash bolmighan köz - qarash we oxshash bolmighan pikirlerning meydan'gha kélishi müqerrer, mesilen, hindistan tibet yashlar qurultiyi izchil türde sürgündiki tibet hökümitining tutqan yollirining toghra bolmaywatqanliqini ipadilep kelmekte" dégen.

Dalay lama, shiwitsariyidiki metbu'at muxbirlirigha mundaq dégen": men ilgiri xitay dostlirimgha sabiq xitay rehbiri maw zédungning 50 ‏- yillarda éytqan sözini tekitligen idim, yeni maw zédung mundaq dégen idi: ' kommunistik partiye choqum bashqilarning tenqidige qulaq sélishi, shuning bilen birge yene öz - özini tenqid qilishi kérek, béliq sudin ayrilalmighan'gha oxshash partiye tenqidke we özini - özi tenqid qilishqa tolimu éhtiyajliq, eger undaq bolmaydiken, bu partiyining mewjüt bolup turushi uzun'gha barmaydu'. Emma yaman yéri shuki, xitay rehbiri maw zédungning bu sözliri héchqachan ijra qilin'ghini yoq, emma sürgündiki tibet hökümiti bu sözni nahayiti muwapiq bir idiye süpitide qobul qilip, izchil türde ijra qilip keldi."

Dalay lamaning bildürushiche, kishiler bilen kishiler otturisida exlaqning qimmiti tekitlinip turushi nahayiti muhim bolup, zorawanliq we toqunushtin xali bolghanda, andin mewjüt mesilini hel qilghili bolidiken. Dalay lama özining tibet yashlirigha hisyatini bésip, tinchliq usuli bilen mewjüt mesililerni hel qilish yolini öginish heqqide dawamliq terbiye béridighanliqini éytqan.

Dalay lama muxbirlargha yene mundaq dégen" : méning qarishimche, xitay hökümiti tibet xelqini zorawnliq yoligha méngishqa mejburlawatidu, xitay hökümitining meqsiti bolsa, tibetliklerni téximu köp basturush, chünki ghayet zor herbiy küchke ige xitay hökümiti üchün basturush élip bérish héchnerse hésablanmaydu, emma muhim bolghini, biz meyli xalayli yaki xalimayli, choqum xitay xelqi bilen ittipaqliqimizni kücheytishimiz shert, biz küreshni zorawansiz yol bilen élip bérishimiz kérek, bizning nishanimiz köpligen xitay yazghuchi we mütexessislirige ayan bolghachqa, biz ularning hésdashliqi we chüshinishige müyesser bo'olup kelduq."

Dalay lama shiwitsariyidiki ziyaritining axirida, ayallarning yüksek qimmetke ige ikenlikini sherhilep" : ayallar ezeldin mihir - shepqetlik yaritilghan, ular öz a'ilisige, jem'iyetke hetta dunyagha tinchliq élip kélish qudritige ige, shunga ayallarning bu dunyadiki wezipisi tolimu muhim," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet