Онсу наһийисидә уйғурлар билән хитайлар растинла инақ ‏- иттипақму?

Сүрәт, 25 - сентәбир, хитайниң онсу наһийилик парткоми вә һөкүмити ачқан "онсу наһийилик милләтләр иттипақлиқи баш тема тәрбийиси паалийитини хуласиләш вә милләтләр иттипақлиқидики 'қош нәмуничилар'ни тәқдирләш" йиғинидин бир көрүнүш.

"Тәңри тағ тори" да елан қилинған мәзкур хәвәрдә, онсу наһийилик парткомниң "онсу наһийилик милләтләр иттипақлиқи баш тема тәрбийиси паалийитини хуласиләш вә милләтләр иттипақлиқидики" қош нәмуничилар" ни тәқдирләш" йиғини ечип, йиғинда 2010 ‏- йили наһийә бойичә мәйданға кәлгән наһийилик җамаәт хәвпсизлик идариси қатарлиқ 20 илғар коллектип, худабәрди имин қатарлиқ 40 нәпәр уйғурни асас қилған һәр милләттин сайланған илғар шәхсләрни мукапатлиғанлиқи тәкитләнгән.

Биз бу мунасивәт билән онсу наһийилик җамаәт хәвпсизлик идарисиниң нөвәтчи бөлүмигә телефон урдуқ. Зияритимизни қобул қилған аманлиқ бөлүминиң сақчиси билән қисқа бир сөһбәттә болдуқ. Соалимизниң әң муһим қисмиға кәлгәндә җаваб бериштин өзини қачурған сақчи "хапа болмай бир минут туруп туруң, машина келип қалди ишикни ечиветип андин қалған соаллириңизға җаваб берәй " дәп қоюп телефонни үзүвәтти.

AFP Photo

Әркин асия радиосиниң зияритини қобул қилғанлиқи үчүн, һөкүмәт тәрипидин җазаға тартилидиғанлиқини билдүргән онсу наһийисидики мәлум бир киши бизгә, онсу наһийисидә милләтләр иттипақлиқиниң интайин начар икәнликини, мәтбуатларда елан қилинған хәвәрләрниң сахта икәнликини билдүрүп, "наһийимиздә давамлиқ дегүдәк уйғурлар билән хитайлар оттурисида уруш - җедәл болуп туриду. 'Милләтләр өз ‏- ара инақ иттипақ' дегәнниң һәммиси ялған, булардин сирт һөкүмәтниң сияситигә қаршилиқ билдүрүш әһваллири интайин рошән ипадиләнмәктә. Һөкүмәт 'намаз оқумайсиләр', 'аяллар яғлиқ салмайсиләр', дәп тәләпни күчәйткәнсери, наһийимиздә өйлиридә йошурун һалда намаз оқуйдиған, йошурун роза тутидиған кишиләр вә бешиға яғлиқ салидиған аяллар наһайити көпийип кәтти. Кишиләрниң диний етиқади интайин күчлүк" деди, вә бизгә бир телефон номурини берип, "бу телефонға телефон уруң, у, сизгә һазир онсуда йолға қоюлуватқан сиясәтләр тоғрисида сөзләп бериши мумкин, у онсуниң башлиқи" деди.
 
Әмма, башлиқниң исми шуниңдәк қандақ вәзиписи барлиқи һәққидә учур бәрмиди. Биз өзини ашкарилашни халимиған бу киши тәминлигән телефон номуриға телефон қилдуқ. Өзиниң онсу наһийисиниң башлиқи икәнликини дәлиллигән бу киши, униңдин игилимәкчи болған әһваллардин толуқ хәвәрдар болғандин кейин "телефонни хата урупсиз" дәп соалимизға җаваб бериштин баш тартти.

Онсу наһийисидики "милләтләр иттипақлиқи нәмуничилири" вә коллектипниң мукапатлиниш әһвали, болупму "5 ‏- июл үрүмчи вәқәси" дин кейин көп санлиқ уйғурларни иттипақлиқ нәмуничиси қилип сайлаш мәсилиси вә бу һәқтики тәшвиқатларниң мәқсити үстидә америкидики сиясий мулаһизичи қутлуқ алмас әпәнди пикир баян қилди.

Юқиридики аваз улинишидин, бу һәқтики мәлуматимизниң тәпсилатини аңлайсиләр.