Onsu nahiyiside Uyghurlar bilen xitaylar rastinla inaq ‏- ittipaqmu?

Süret, 25 - séntebir, xitayning onsu nahiyilik partkomi we hökümiti achqan "onsu nahiyilik milletler ittipaqliqi bash téma terbiyisi paaliyitini xulasilesh we milletler ittipaqliqidiki 'qosh nemunichilar'ni teqdirlesh" yighinidin bir körünüsh.

"Tengri tagh tori" da élan qilin'ghan mezkur xewerde, onsu nahiyilik partkomning "onsu nahiyilik milletler ittipaqliqi bash téma terbiyisi pa'aliyitini xulasilesh we milletler ittipaqliqidiki" qosh nemunichilar" ni teqdirlesh" yighini échip, yighinda 2010 ‏- yili nahiye boyiche meydan'gha kelgen nahiyilik jama'et xewpsizlik idarisi qatarliq 20 ilghar kolléktip, xudaberdi imin qatarliq 40 neper Uyghurni asas qilghan her millettin saylan'ghan ilghar shexslerni mukapatlighanliqi tekitlen'gen.

Biz bu munasiwet bilen onsu nahiyilik jama'et xewpsizlik idarisining nöwetchi bölümige téléfon urduq. Ziyaritimizni qobul qilghan amanliq bölümining saqchisi bilen qisqa bir söhbette bolduq. So'alimizning eng muhim qismigha kelgende jawab bérishtin özini qachurghan saqchi "xapa bolmay bir minut turup turung, mashina kélip qaldi ishikni échiwétip andin qalghan so'alliringizgha jawab bérey " dep qoyup téléfonni üzüwetti.

AFP Photo

Erkin asiya radi'osining ziyaritini qobul qilghanliqi üchün, hökümet teripidin jazagha tartilidighanliqini bildürgen onsu nahiyisidiki melum bir kishi bizge, onsu nahiyiside milletler ittipaqliqining intayin nachar ikenlikini, metbu'atlarda élan qilin'ghan xewerlerning saxta ikenlikini bildürüp, "nahiyimizde dawamliq dégüdek Uyghurlar bilen xitaylar otturisida urush - jédel bolup turidu. 'Milletler öz ‏- ara inaq ittipaq' dégenning hemmisi yalghan, bulardin sirt hökümetning siyasitige qarshiliq bildürüsh ehwalliri intayin roshen ipadilenmekte. Hökümet 'namaz oqumaysiler', 'ayallar yaghliq salmaysiler', dep telepni kücheytkenséri, nahiyimizde öyliride yoshurun halda namaz oquydighan, yoshurun roza tutidighan kishiler we béshigha yaghliq salidighan ayallar nahayiti köpiyip ketti. Kishilerning diniy étiqadi intayin küchlük" dédi, we bizge bir téléfon nomurini bérip, "bu téléfon'gha téléfon urung, u, sizge hazir onsuda yolgha qoyuluwatqan siyasetler toghrisida sözlep bérishi mumkin, u onsuning bashliqi" dédi.
 
Emma, bashliqning ismi shuningdek qandaq wezipisi barliqi heqqide uchur bermidi. Biz özini ashkarilashni xalimighan bu kishi teminligen téléfon nomurigha téléfon qilduq. Özining onsu nahiyisining bashliqi ikenlikini delilligen bu kishi, uningdin igilimekchi bolghan ehwallardin toluq xewerdar bolghandin kéyin "téléfonni xata urupsiz" dep so'alimizgha jawab bérishtin bash tartti.

Onsu nahiyisidiki "milletler ittipaqliqi nemunichiliri" we kolléktipning mukapatlinish ehwali, bolupmu "5 ‏- iyul ürümchi weqesi" din kéyin köp sanliq Uyghurlarni ittipaqliq nemunichisi qilip saylash mesilisi we bu heqtiki teshwiqatlarning meqsiti üstide amérikidiki siyasiy mulahizichi qutluq almas ependi pikir bayan qildi.

Yuqiridiki awaz ulinishidin, bu heqtiki melumatimizning tepsilatini anglaysiler.