Уйғур нахшичиси мирзат алим сирлиқ һалда өлтүрүлди

Сүрәт, мирзат алимниң "тар коча" намлиқ нахшини орундаватқан көрүнүшлиридин бири.

Мирзат алимниң орунлишидики "тар коча " нахшисини аңлимиған уйғур йоқ бөлуши мумкин. Атақлиқ нахшичи мирзат алим үрүмчи шәһәрлик 5 - оттура мәктәпниң музика оқутқучиси болуп, у 90 - йилларда өзиниң юқири маһарәт билән орунлиған "тар коча", "аҗрашмаңлар ата - анилар"намлиқ нахшилири билән уйғур хәлқи арисида тонулушқа башлиған иди.

Һазир уйғурлар арисида мирзат алимниң сирлиқ өлүми һәққидә хилму - хил пәрәзләр болунмақта. Мирзат алимниң бир кәсипдишиниң билдүрүшичә, мирзат алимниң җәсити 4 - авғуст күни өз ойи әтрапидики бир кочиға башқилар тәрипидин тохтитип қоюлған аптомобили ичидин тепилған болуп, бу киши бизгә мирзат алимниң наһайити қәбиһ усуллар билән өлтүрүлгәнликини, сақчиларниң униң аяли вә уруқ - туғқанлириниң бу һәқтә көп сөзлишини чәклигәнликини, шуңа өзиниңму бу һәқтә коп сөзлийәлмәйдиғанлиқини баян қилди.

 Мирзат алимниң чәтәлдики бир туғқини өзиниң мирзат алимниң өлүми һәққидики хәвәрни башқилардин аңлиғанлиқини, әмма мәрһумниң немә сәвәбтин өлтүрүлгәнликини билмәйдиғанлиқини һәтта униң расттинла өлүп кәткәнликигә һелиғичә ишинәлмәйватқанлиқини баян қилди.

Чәтәлләрдики уйғур тор бәтлиридә мирзат алимниң өлүми һәққидә бир қәдәр тәпсилий хәвәр берилгән болуп, вәтиним тор бетиниң 8 - айниң 24 - күнидики хәвиридин ашкарилинишичә, мәрһум 2009 - йили 8 - айниң 2 - күни (йәкшәнбә) өйидин сиртқа чиқип кәткәнчә дерики болмиған, 8 - айниң 4 - күни мирзат алимниң өйигә йеқин бир кочида тохтитип қоюлған аптомобили ичидин мәрһумниң җәсити тепилған, бу чағда җәсәт сесишқа башлиған болуп, бешиға қара халта кийдүрүлгән һалда ташлап қоюлған, бир көзи чачрап чиқип кәткән, бәдинидә таяқ зәрбисиниң излири қалған. Мирзат алимниң аяли вә ачиси җәсәтни әдлийә дохтурлириға тәкшүрткән. Һөкүмәтниң әдлийә дохтурлири, "йүрәк кесили билән өлгән" дегән хуласини йезип бәргән. Мирзат алимниң аилиси өлүм сәвәби ашкара болмиса, мейитни йәрликидә қоймайдиғанлиқини билдүрүп җәсәтни 3 күн сақлиған болсиму, сақчиларниң тәһдит вә бесими билән 8 - айниң 7 - күни (җүмә) йәнән йолидики үзүмзар рестораниниң удулидики җигдилик мәсчитидә җүмә намизидин кейин мәрһумниң җиназа намизи оқулған.

Вәтиним тор бетидики хәвәрдә баян қилинишичә, җиназа намизиға қатнашқан уйғурларниң сани 4 - 5 миңға йәткән.Җиназини мәсчиттин елип чиқиватқан вақитта 10 дин артуқ сақчи аптомобили җамаәтни қоршивалған болуп, җамаәт қораллиқ сақчи вә әскәрләрниң назарити астида мейитни қәбристанлиққа елип маңған.

Мәрһумниң өлүм сәвәби һәққидә, уйғур тор бәтлиридә баян қилинишичә, 2 - авғуст күни кечидә мирзат алим бир ағинисигә телефон қилип, өзиниң аҗайип дәһшәтлик бир мәнзирини көрүп қалғанлиқини, қораллиқ сақчиларниң арқисидин қоғлаватқанлиқини дәватқинида, мәрһумниң телефони үзүлүп кәткән икән.

Һазир мирзат алимниң өлүм сәвәби һәққидә уйғурлар арисида түрлүк пәрәзләр болуватқан болсиму, лекин хитай һөкүмәт тәрәп бу һәқтә ениқ учур бәрмигән.

Радиомиз мәрһумниң өлүм сәвәби һәққидә әһвал игиләш мәқситидә үрүмчигә телефон қилған болсақму, лекин үрүмчи билән болған телефон алақиси техи әслигә кәлмигәнлики үчүн техиму ениқ учурға еришиш имканийити болмиди. Радио аңлиғучилиримиздин әһвални билидиғанларниң бизгә учур йәткүзүшини үмид қилимиз.