Misirning sabiq re'isi mubarekke höküm élan qilindi

Misirning sabiq prézidénti muhemmed hüsni mubarek bilen sabiq ichki ishlar ministiri hebib adili ikkisi üchün menggülük türme jazasi bérildi.

Melumki, misirdiki 25-yanwar namayishi ghelibe qilip, 30 yilliq diktator texttin chüshken we xelq ghelibining tentenisini qilghan'gha bir yérim yilgha yéqin waqit ötken bolsimu, lékin diktatorlar jazasini tapmighan idi.

Londonda chiqidighan “Ottura sherq” gézitining 2012-yili 3-iyun künidiki sanida, “Mubarek üchün axirqi höküm élan qilindi” dégen témida bir maqale élan qilin'ghan bolup, maqalide mundaq yézilghan:
“2012-Yili2-iyun shenbe küni misirning sabiq re'isi muhemmed hüsni mubarek bilen sabiq tashqi ishlar ministiri hebib adili ikkisi üchün menggülük türme jazasi élan qilindi. Emma mubarekning ikki oghli bilen hebib adilining 6 neper yardemchisi aqlinip chiqti. Bularning aqlinip chiqishi misir xelqining ghezipini tashurghanliqtin, misirda keng kölemlik naraziliq namayishi élip bardi. Emma ular chiqirilip bolghan hökümni özgertelmidi. Mubarek sherm sheyx shehiridiki qarargahidin ayrilip, qahire shehiridiki turre türmisige élip kélindi. Mubarekke artilghan asasliq jinayet namayish waqtida 850 ademning ölümige seweb bolghanliq déyilgen. Emma uning misirda yürgüzgen 30 yilliq herbiy halet jeryanida qanchilighan ademning iz-déreksiz yoq bolushigha, qanchilighan bigunah puqraning türmilerde nabut bolushigha seweb bolghanliqini héchkim sürüshte qilmidi. Shundaq turup bu ikkisi heqqide élan qilin'ghan türme jazasini naraziliq bilen qobul qildi. Undaqta ularni mukapatlash kérekmidi yaki qoyup bérish kérekmidi?”.

Mustebit texttin chüshken bilen istibdat tüzüm dawam qilmaqta

Maqalide yene mundaq dep yézilghan: “Mustebit hakimmutleqni texttin chüshürüsh asan bolghini bilen yérim esirdin köprek waqittin biri dawam qilip kelgen istibdat tüzümini bir anda yoq qilghili bolmaydu. Mubarek bilen hebib adili menggülük türmige mehkum bolghini bilen ular dawam qildurup kelgen istibdat tüzümi özgergini yoq. Misirdiki herbiy hakimiyitining axirqi qilmishliri buni ispatlidi. Chünki ular mubarek bilen hebib ikkisini qurban qilish bedilige mubarekning tüzümini dawam qildurush xam xiyalida bolmaqta. Mubarekke sot élan qilinidighan sa'ette tashqiridiki xelq qattiq hayajan bilen ular we ularning shéhit bolghan perzentliri razi bolidighan birer höküm chiqirilishini kütüp alqishlarni yaghdurghan idi. Emma bir qanche minuttin kéyinla ularning hayajini we xushalliqi ghezep nepretke aylandi. Démek, misirda esker istibdati xuddi burunqidek dawam qilmaqta.”