Мисирниң сабиқ рәиси мубарәкниң сотлиниши

Мисирниң сабиқ рәиси муһәммәд һөсни мубарәк билән униң икки оғли йолсизлиқ ишлири, намайишчиларни қәстән өлтүргүзүш вә намайишчиларни бастуруш җинайәтлири билән сотқа тартилмақчи.
Ихтиярий мухбиримиз өмәрҗан
2011.06.01
misir-namayish-saqchi-mashina-koyduruldi-305.jpg Мисирдики намайишчилар сақчи машинисини көйдүрүп, президент һөсни мубарәккә наразилиқини билдүрди. 2011-Йили 28-январ.
AFP

Мисирда чиқидиған “әл еһрам” гезитиниң 2011-йили 1-июн санида елан қилинған бир хәвәргә көрә, мисирда 30 йил һакимийәт бешида олтурған сабиқ рәис муһәммәд һөсни мубарәк билән икки оғли җамал вә әла мубарәкләр, қачқун капиталист һүсәйин салим, сабиқ ички ишлар министири һәбиб адили қатарлиқларниң мәһкимиси бу йил 3-авғуст күни рәсмий башлинидикән. Буларға артилған җинайәтләр көп болуп, асаслиқи мәнсәпни өзлириниң шәхсий мәнпәәтлири үчүн қоллиниш, йолсизлиқ қилип хәлқниң пули билән бай болуш, дөләтниң иқтисадини өзигә қаритивелиш, 25-январ тинчлиқ намайиши һарписида намайишчиларни қанлиқ бастуруш, уларни уруп, соқуп түрмиләргә ташлап қийнаш қатарлиқ җинайәтләр икән.

Мубарәкниң өлүмгә һөкүм қилиниш еһтимали чоң

Лондонда чиқидиған “әл һаят” гезитиниң хәвиригә асасланғанда, мисир әрәб җумһурийити искәндәрийә районлуқ сот мәһкимисиниң рәиси фикри хуруб мәзкур гезиткә телефон арқилиқ бәргән баянатида мундақ дегән: “сабиқ рәис муһәммәд һөсни мубарәк намайишчиларни қәстән өлтүрүш җинайити билән әйибләнмәктә. Чүнки намайишчиларни мубарәк өзи биваситә өлтүрмигән болсиму, шу вақиттики ички ишлар министири һәбиб адилиға намайишчиларға оқ чиқармаслиқ, өлтүрмәслик һәққидә пәрман чиқириш мәсулийити бар иди. Лекин қилмиди. Җәмийәттики оғри-қарақчи вә һәрхил җинайәтчиләргә пул һәм қорал тарқитип намайишчиларниң нурғунлириниң җениға замин болған мисирлиқ чоң капиталист һүсәйин салим мубарәкниң йолсизлиқлиридин пайдилинип келиватқанлардин бири болуп, униң хәлққә шунчилик яманлиқ қилишта күчни мубарәктин алғанлиқи испатланди. Мундин башқа мубарәкниң җамал вә әла дегән икки оғлиниң дадисиниң һоқуқидин пайдилинип қилған йолсизлиқлирини санап түгәткили болмайду. Бигунаһ хәлқниң қениға боғулған сабиқ ички ишлар министири һәбиб адили мисир тарихида әң көп қан аққузған җинайәтчи болуп тонулди. Бу җинайәтчиләрниң өлүм җазасиға һөкүм қилиниш еһтимали күчлүктур. Чүнки уларниң җинайәтлири шуни тәқәзза қилмақта.”

Қатарниң “әл җәзирә”телевизийә қанилиға баянат бәргән мисирлиқ һоқуқшунас адил әһмәд мундақ деди: “һакиммутләқләрниң һәммиси өзлиригә қарши чиққучиларни җазалайду. Һәтта тинчлиқ намайишлириму улар үчүн қорқунчлуқ инқилаб санилиду. Бүгүн мисир сот мәһкимиси сабиқ рәис һөсни мубарәкни сотлаш ишини бу йил 3-авғуст күнигә бекитти. Һазир мубарәк түрмидә әмәс, бәлки кесили еғир болғанлиқтин һазирчә шәрм шәйх районидики дохтурханида давалиниватиду. Мубарәккә өлүм җазаси берилиш еһтимали күчлүк көрүниду. Чүнки униңға артилған чоң җинайәтләрниң бирси қәстән адәм өлтүрүш җинайити иди.”

Мубарәккә җәриманә қоюлди

Мисирниң сабиқ рәиси муһәммәд һөсни мубарәк билән ички ишлар министири һәбиб адили вә баш министир әһмәд нәзиф қатарлиқларға уларниң 25-январ тинчлиқ намайиши әснасида телефон, интернет қатарлиқ учур васитилирини тохтитивәткәнлик қилмиши сәвәблик мисир сот мәһкимиси мундин бурун уларға маддий җаза бәлгилигән иди.

Мисирда чиқидиған “әл еһрам” гезитиниң 2011-йили28-май күнидики санида, сабиқ рәис муһәммәд һөсни мубарәккә 200 милйон җунәй, ташқи ишлар министири һәбиб адилиға 300 милйон җунәй вә баш министир әһмәд нәзифкә 40 милйон җунәй җәмий 90 милйон доллар җәриманә қоюлғанлиқ хәвири елан қилинған. Мисир сот мәһкимиси 2011-йил ахирғичилик бу җәриманиниң ашурулуши мумкин икәнликини сөзлигән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.