Xitayning qarshiliqi emeliyette rabiye qadir xanim heqqidiki filimni téximu dangdar qilmaqta

Rabiye qadir xanim awstraliye ziyaritini ghelibilik axirlashturghandin kéyin, amérikigha qaytish aldida muxbirimizning ziyaritini qobul qilip, awstiraliye hökümiti we xelqige minnetdarliq bildürdi. Süret, rabiye xanimning 8 - awghust küni, "muhebbetning 10 sherti" namliq filim qyulghan zalda filimni körgili kelgen awstiraliye tamashibinliri arisida hayajanliq körünüshliridin biri.

Mezkur filim barghanche qarshi éliniwatqan bir peytte, shinjang xewer tori bügün eksiche "rabiye qadir heqqide ishlen'gen filimning dunyada tarqitilishi tosqunluqqa uchridi" dégen témida xewer élan qildi. Bu munasiwet bilen biz rabiye qadir xanimning washin'gitondiki ishxanisigha téléfon qilip "muhebbetning 10 sherti" filimining hazirghiche bolghan tarqitilish, qarshi élinish ehwalliri heqqide melumat alduq.

"Muhebbetning 10 sherti" din ibaret rabiye qadir xanimning hayati eks ettürülgen bir sa'et etrapidiki höjjetlik filim, gerche ishlinish süpiti, bedi'iy qimmiti jehette adettiki bir höjjetlik filim bolsimu, emma uning qozghighan ammiwi inkasi we tamashibinlargha élip kelgen meniwi qimmiti, axbarat saheside qozghighan tesiri ajayip zor bolmaqta.

Halbuki, xelq'ara jem'iyetning küchlük eyiblishi hemde tenqidige pisent qilmay mezkur filimni bayqut qilish herikitini toxtatmay kelgen xitay da'iriliri hazirgha qeder rabiye qadir xanim hem u heqqidiki höjjetlik filimgha qarshi tetür teshwiqatini dawamlashturmaqta. Xitay hökümiti bashqurushidiki shinjang xewer tori 29 ‏- öktebir sanida rabiye qadir xanim we u heqqide ishlen'gen filimning "dunyada tarqitilishi tosqunluqqa uchridi" dep xewer élan qildi. Shundaqla filim rézhissori johan " mezkur filimning xelq'arada bazar tapalmighanliqini étirap qildi," dep yazdi.

Shundaqla xewerde, "bölgünchi rabiye qadir heqqide ishlen'gen höjjetlik filim muhebbetning 10 sherti filimi hazirghiche xelq'arada héchqanche qiziqish qozghiyalmidi, uning mezmuni bek sezgür, ziddiyetlik bolghachqa, asasen alidighan héchqanche döletmu chiqmidi," dep yazghan.

Emeliyette buning del eksiche, wall strért zhurnilida buningdin bir kün burun yeni 28 ‏- öktebir küni "rabiye qadir filimi zor diqqet qozghidi" dégen témida maqale élan qilin'ghan idi. Mezkur maqalida del filim rézhissori johan léwisning sözini neqil alghan bolup, johan liwésning chüshendürüshige qarighanda, peqet teywendila mezkur filim alahide qiziqish qozghighanliqi üchün, yerlik filim tarqatquchilar mezkur filimni 45 qétim qoyushqa orunlashturghan, yene nurghun mektepler, oqughuchilargha bu filimni körsitishni orunlashturmaqchi iken.

Biz rabiye qadir xanim heqqide ishlen'gen höjjetlik filimning hazirghiche qanchilik qiziqish hasil qilghanliqi heqqide yenimu tepsiliy melumat élish üchün, rabiye qadir xanimning washin'gitondiki ishxanisi bilen alaqilashtuq, rabiye xanimning katipliridin zubeyre xanim bu heqtiki so'allirimizgha jawab berdi.

Én'giliz tilida chüshendürüsh bérilgen bir sa'et etrapida ishlen'gen höjjetlik filim "muhebbetning 10 sherti" hazirghiche, awstraliye, teywen kino filim féstiwallirida körsitilgendin bashqa, yéngi zélandiye ma'ori téliwiziyisi, islam téliwiziye qanili we wakaletsiz milletler teshkilatigha oxshash xelq'araliq insan heqliri teshkilatlirining tor betliri shuningdek yene nurghun dunyawi tor betlerge qoyulup, körüsh nisbiti, qarshi élinishi jehette dangdar filimlardin qélishmaydighan derijide qarshi élinmaqta hemde ghulghula qozghimaqta, buning bilen dunyada hazir nurghun dölet hemde kino filim, téléwiziye shirketliri mezkur filimgha qiziqmaqta.

Yuqiridiki awaz ulinishidin, bu heqtiki melumatimizning tepsilatini anglaysiler.