'Муһәббәтниң 10 шәрти' уйғурларниң сиясий вәзийитини дуняға аңлатмақта

Америкиниң колорадо шитатиниң теллурид шәһиридә, 28 ‏- майдин 31 ‏- майғичә 4 күн давамлашқан хәлқаралиқ тағ кино фестивалида, уйғур миллий һәрикитиниң рәһбири рабийә қадир ханимниң һаяти һәққидә тәсвирләнгән һөҗҗәтлик филим, мукапатлинишқа тегишлик 10 чоң филим намзати қатариға киргүзүлди.
Мухбиримиз әқидә
2010.05.31
Share on WhatsApp
Share on WhatsApp
Rabiye-xanim-Muhebbetning-10-sherti-Tagh-festiwalida-305.jpg Сүрәт, 'муһәббәтниң 10 шәрти' ниң тағ фестивали гуруһи тор бетидә тонуштурулған көрүнүш.
www.mountainfilm.org Дин елинди.

Фестивалға қатнашқан рабийә қадир ханимниң қизи раһилә ханим вә америка уйғур аяллири комитетиниң башлиқи зубәйрә ханимлар бизни фестивал һәққидә тәпсилий учурлар билән тәминлиди.

Аниси рабийә қадир ханимға вакалитән, Мәшһур хәлқаралиқ тағ филим фестивалиға Қатнашқан раһилә ханим, "Муһәббәтниң 10 шәрти" намлиқ һөҗҗәтлик филимниң, фестивалда көрситилгәндин кейин күчлүк тәсир қозғиғанлиқидин интайин һаяҗанланған иди. Раһилә ханим сөзидә йәнә, һәтта филимни көргән 6 яшлиқ бир кичик балиниң, "сениң инилириңниң түрмидин чиқишиға йәнә қанчилик вақит қалди" дәп сорап кәткәнликини, униң аниси оғлиниң бәк һаяҗанлинип кәтмәслики үчүн, уни дәрһал елип кәткәнликини ейтип бәрди.

Баш шитаби америкиниң колорадо шитатиниң теллурид шәһиригә җайлашқан "тағ филим фестивали" гуруһи 32 ‏- йилиға қәдәм қойған мәшһур бир фестивал гуруһи һесаблиниду. Фестивални тәшкиллигүчи кино бурнис әпәнди, фестивал өткүзүлүштин бурун, мәзкур фестивалға пәқәт дунядики диққәт қилишқа тегишлик вәқә вә шәхсләргә аит ишләнгән әһмийәтлик филимләрниң қатнаштурулидиғанлиқини билдүргән иди.

Һәқиқәтән, фестивалда алаһидә вәқә вә пәрқлиқ сәргүзәштиләр баян қилинған филимләр көрситилгән болуп, америка уйғур аяллири комитетиниң башлиқи зубәйрә ханим нәқ мәйдандин фестивал паалийәтлирини тонуштурди.

4 Күнлүк фестивал җәрянида, раһилә вә зубәйрә ханимлар мухбирларниң зияритини қобул қилғандин сирт, филим тамашибинлириниң соаллириға җаваб бәргән. Филимни көргүчиләр раһилә ханимни тонувалған вә "биз сини һазир кинода көрдуқ, сениң анаң немә дегән гүзәл, немә дегән җасарәтлик бир аял" дәп рабийә қадир ханимни тәрипләшкән.

Бу қетимқи филим фестивалиға қатнишиш пурситидә, филимни толуқ көрүп чиққанлиқини билдүргән раһилә ханим, " мән филимни көрүп һәммидин ваз кәчтим, вәтиним, миллитим үчүн хизмәт қилиш мениң әң улуғвар ғайәмгә айланди" деди.

Фестивал давамида, рабийә қадир ханим һәққидики "әҗдәрһа билән елишқан аял" намлиқ китаб пүтүнләй сетилип болған болуп, китабхана игиси раһилә ханимға нәччә миңдин артуқ китабниң сетилип кәткәнликини, китабни техиму көп әкәлмигәнликидин қаттиқ пушайман қилғанлиқини ейтқан.

Раһилә ханим сөзидә йәнә "муһәббәтниң 10 шәрти" намлиқ филим VCD си билән "әҗдәрһа билән елишқан аял" намлиқ китабни һәр бир уйғур аилисиниң сетивелиши керәкликини билдүрди.

"Муһәббәтниң 10 шәрти" намлиқ һөҗҗәтлик филим 2009 ‏- йили тунҗи қетим австралийидә өткүзүлгән мелбурн хәлқара филим фестивалиға қатнаштурулғандин кейин, бу йил тәйвәндә өткүзүлгән филим фестивалида, голландийидики "әһмийәтлик филимләр" хәлқара фестиваллирида көрситилгәндин сирт, америка дөләт мәҗлисидә америка вә яврупа парламент әзалириға көрситилди вә юқири баһаға еришти.

17 Дөләттә көрситилгән бу филим, дуня әһлиниң уйғурларниң нөвәттики сиясий вәзийитини тонушида, интайин муһим рол ойнимақта.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт