Журналист муһәммәтҗан абдулланиң муддәтсиз кесилгәнлик хәвири хәлқара мәтбуат вә тәшкилатларниң диққитини тартти

Түнүгүн вашингтон почтиси гезити, вақит журнили қатарлиқ гезит, журналлар, бүгүн франсийә ахбарат агентлиқи вә бирләшмә агентлиқ қатарлиқ 50дин артуқ ахбарат васитилири журналист муһәммәтҗан абдулланиң муддәтсиз кесилгәнлик вәқәси һәққидә хәвәрләр елан қилди. Хәвәрләрдә омумйүзлүк һалда уйғурларниң пикир әркинликиниң қаттиқ чәклимигә учраватқанлиқи, болупму бу вәзийәтниң 5 ‏-июл вәқәсидин кейин техиму еғирлашқанлиқи, ипадә әркинликидин ибарәт әң әқәллий инсаний һәққини қолланғанларниң вәһший җинайәтчиләргә берилидиған еғир җазалар билән җазалиниватқанлиқи баян қилинған.

Хәвәрләрдә, муһәммәтҗан абдулла үстидин ечилған сотниң мәхпий болғанлиқи вә бу вәқәниң 8 айға қәдәр дуняға ашкариланмиғанлиқи вә берилгән җазаниң ишәнгүсиз дәриҗидә еғирлиқи алаһидә тәкитләнгән. Мәзкур хәвәр йәнә чеграсиз мухбирлар тәшкилати, дуня кишилик һоқуқни көзитиш тәшкилати қатарлиқ көплигән хәлқара тәшкилатларниң тор бәтлиригә қоюлди.

Франсийә ахбарат агентлиқиниң хәвиридә, дуня уйғур қурултийи баянатчиси дилшат ришитниң төвәндики сөзлиригә йәр берилгән. " Муһәммәтҗан абдулла үстидин чиқирилған һөкүм атилишта сотчиниң һөкүми болсиму, әмәлийәттә даириләрниң һөкүмидур; йәни һөкүм сиясий бир һөкүмдур." Бирләшмә агентлиқниң хәвиридә дилшат ришитниң төвәндики сөзлиригә йәр берилгән: "муһәммәтҗан абдулла һечқандақ җинайәт өткүзгән әмәс, у әгәр растинила шавгүән вәқәси һәққидә хәвәр язған вә хәвәр тәрҗимә қилған болса, ундақта у өзиниң һәқиқий журналистлиқ мәсулийитини ада қилған, журналистлиқ әхлақини намаян қилған. Биз һөкүм чиқарған сотниң җәряни вә һөкүмниң тәпсилатини елан қилишни тәләп қилимиз."

RFA/Shohret Hoshur

Мәзкур җәмийәтниң рәиси қәйсәр абдурусул, уйғур қәләмкәшлири бүгүн дунядики башқа диктатор дөләтләрдики қәләмкәшләргә нисбәтән ейтқанда, көп дәриҗидә еғир бесимға учраватқан болсиму, учур-алақиниң йетәрсизлики сәвәбидин дуняға йетәрлик дәриҗидә билинмәй келиватқанлиқини әскәртти.

Йеқинда радиомизға кәлгән йәнә бир инкаста баян қилинишичә, сәлкин тор бетидә халисанә башқурғучилиқ вәзиписини өтәватқан 300 гә йеқин қәләмкәш вә йезиқчилиқ һәвәскарлири бар болуп, буларниң һәммиси 5 ‏-июлдин кейин тутқун қилинған. Бу хәвәрни һазирғичә испатлаш мумкин болмай кәлмәктә. Қәйсәр абдурусул әпәндиниң қаришичә, муһәммәтҗан абдулланиң муддәтсиз кесилиши, тор башқурғучилири һәққидә җәмийәттә тарқалған әнсиз хәвәрләрниң асассиз әмәсликини көрситиду.