Мунапиқлар вә уларниң инсанийәткә болған хәтири

Мунапиқлар - икки йүзлимичи мәхлуқлар болуп, һәр қандақ бир милләттә тепилиду. Тарихларға нәзәр салидиған болсақ, көплигән милләтләрниң мустәмликичиләрниң төмүр тапанлири астиға кирип қелиши, инсанийәтниң зиянкәшликләргә учриши, сәлтәнәтләрниң қолдин кетиши, инсанийәт үчүн ярамлиқ кишиләрниң дүшмәнләр қолида набут болиши вә башқиму нурғунлиған бәхитсизликләр әнә әшу инсанийәт дунясиниң шум буйилири болған мунапиқларниң сатқунлиқи, хаинлиқи вә һәйярлиқи сәвәбтин болған.
Мухбиримиз өмәрҗан тохти хәвири
2008-06-12
Share

Мунапиқлар дунядики һәр қандақ бир җәмийәт, қанун вә дин нәзәридә әң рәзил вә әң пәскәш мәхлуқлар болуп, улар һәмишә аллаһ вә инсанларниң ләнитигә мәһкумдур. Қисқиси, җәмийәтни мунапиқлардин сақлаш шу җәмийәтниң тинчлиқ - аманлиқини, пуқраларниң бәхт - саадитини капаләтләндүридиған муһим иштур.

Абдулетип һаҗим билән сөһбәт

Сәуди әрәбистаниниң мәккә мукәррәмә шәһиридә турушлуқ яш алим абдулетип һаҗим мунапиқларниң рәзил мәхлуқлар икәнлики һәққидә тохтулуп мундақ деди:" аллаһ таала қуран кәримниң бешида инсанларни үч түргә айрийду: биринчиси, қуранниң растинла аллаһниң муһәммәд әләйһиссаламға вәһий қилған сөзлири икәнликигә ишәнгүчи мөминләр, иккинчиси, ишәнмәйдиғанлар, үчинчиси, динға ишәнмисиму өзлирини иман ейтқанлар қатаридин көрситиш арқилиқ мусулманларни алдимақчи болған икки йүзлимичи мунапиқлар болуп, буларниң мусулманларға вә инсанийәткә болидиған хәтири ашкара дүшмәндин әлвәттә ямандур. Шуңа аллаһ таала мунапиқлар тоғрулуқ13 айәттә тәпсили хәвәр бәргән вә улар тоғрулуқ: ' мунапиқлар дозахниң әң астинқи қетида азаблиниду ' дәп елан қилған. Айәтләрдики мунапиқлардин мәқсәт пәйғәмбәр әләйһиссаламниң заманидики мунапиқларла әмәс, бәлки һәр қандақ заман вә һәр қандақ маканлардики мунапиқларниң һәммисини өз ичигә алиду. Пәйғәмбәр әләйһиссалам бир һәдисидә: ' кишиләрниң әң ямини икки йүзлимичи мунапиқлар болуп, улар униңға бир йүзи билән буниңға йәнә бир йүзи билән көриниду ' дәп көрсәткән."

Мунапиқлар инсанийәтниң әшәддий дүшмәнлиридур

Абдулетип һаҗим мунапиқларниң хәтири һәққидә тохтулуп мундақ деди:" мәлумки, мунапиқлар қайси заманда вә қайси җайда болмисун, улар өз миллитиниң мәнпәәтигә зиян салидиған, өз вәтининиң зийини үчүн ишләйдиған зәһәрлик чаянлардур. Әгәр һәр қандақ адәм өзиниң ичидикилирини шу бойичә дадил ашкара қилидиған вә өз бурчини алдамчилиқсиз сәмимий орунлайдиған болса, бүгүнки инсанлар җәмийити бәхткә еришкән вә һәр дөләт өзиниң хоҗилиқини мустәһкәм тиклийәлигән болатти. Бизниң уйғур тарихимизға қарайдиған болсақму, мунапиқлиқниң миллитимизгә қанчилик көп зиян салғанлиқини, бәхтни шақавәткә, һөрлүкни мәһкумлуққа айландуруп қоюшқа сәвәб болғанлиқини, сансизлиған ярамлиқ, хәлққә мәнпәәтлик әзимәтлиримизниң набут болушиға сәвәбчи болғанлиқини көримиз. Абдуқадир дамолламдәк миллитимизни ақартқан мәрипәтпәрвәр затниң, абдухалиқ уйғурдәк хәлқни ойғатқан вә миллитимизни әркинликкә чақирған талантлиқ кишилиримизниң дүшмәнләр қолида шәпқәтсизләрчә қәтли қилинишиға биваситә сәвәбчи болғанларму бизниң милләттин чиққан вәһши мунапиқлар иди. Һазирму һәр саһәдики бир түркүм мунапиқлар миллитимизниң бәхтикә олтуруп кәлмәктә. Мунапиқлар һаман бир күни шәрмәндә болмай қалмайду. Ахирәттиму улар әң қаттиқ җазаға тартилиду. Аллаһ тааланиң қуран кәримдә мунапиқларниң намазлириниму оқумаслиққа буйриғанлиқиму мунапиқларниң қанчилик қәдирсиз, рәзил вә пәс мәхлуқлар икәнликини биливелишимиз үчүн йетәрлик."

Мунапиқларниң сүпәтлири

Абдулетип һаҗимниң ейтишичә, пәйғәмбәр әләйһиссалам мунапиқларниң әң асаслиқ сүпәтлирини баян қилип:" мунапиқларниң сүпити үч болуп, мунапиқ сөзлисә ялған сөзләйду, вәдә қилса вапа қилмайду, аманәт қоюлса хиянәт қилиду"дәп көрсәткән.

Бу һәдистин мәлумки, ялған сөзләш, вәдигә вапа қилмаслиқ вә аманәткә хиянәт қилиш әң рәзил қилиқлар болуп, мунапиқлар бу сүпәтләрниң әсли игилиридур. Чүнки мунапиқлар һәмишә залим бесимдарларниң алдиға берип, өз миллитидин чиққан яхши кишиләрни  ялған - явидақ сөзлири билән қарилайду, қәвм қериндашлири уларға ишинип ички сирлирини ейтса, кечикмәстин дәрһал берип залимларға уларни сетиветиду, хәлқ ишәнч қилип бәзи нәрсилирини вә гәп - сөзлирини уларға аманәт қилса, дәрһал униңға хиянәт қилиду. Чүнки улар шундақ рәзилликкә көнүп кәткән, пәскәш мәхлуқлардур. Шуңа улардин йирақ туруш, уларни җәмийәттин йәкләш вә уларға һечбир заман ишәнч қилмаслиқ тәләб қилиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт