Uyghur élide bu yilliq muqimliqni qoghdash xizmet nishani asasiy qatlamgha qaritildi

2012-Yili 28-dékabir, jang chünshyen, xitay kommunist partiyisining bu yil Uyghur élide muqimliqni qoghdashta qollinidighan istratégiyisi we yéngi bir yilliq muqimliq xizmitini qandaq élip bérish heqqide yolyoruq bergen idi. U bu yil muqimliqni qoghdash xizmitini yenimu bir baldaq kücheytish, milliy bölgünchilik heriketlirini aldini élishta ammining qollishigha érishishni birinchi amil qilish, asasiy qatlamni eng muhim orun'gha qoyush arqiliq jem'iyetning muqim omumi weziyitini yaritishni telep qilghan.

Jang chünshyen bu nöwet tekitligen oxshimaydighan nuqta shuki, u “Yighin pa'aliyetlirini addiylashturush yeni yighin istilini heqiqiy yaxshilap, yighin qétim sanini azaytip, yighin süpitini üstürüsh kérek” dep tekitligen. Her qétimliq muqimliq saqlash yighini xitayning chaghan bayrimi harpisida échilip kelmekte we yighindin kéyinla Uyghur élide muqimliqni saqlashta yenimu qattiq tedbirler élin'ghandin bashqa, pütün Uyghur élide yéngidin siyasiy öginish heriket pa'aliyetliri kücheytilidu. Xitayning Uyghur élidiki memuriy torlirining xewerliridin bu yilliq muqimliqni saqlash yolyoruqi bérilishi bilen her qaysi jaylarda muqimliq xizmitining, bolupmu asasiy qatlamlarni nishan qilip ipadisini tépiwatqanliqi melum.

Aqsu hökümet torining xewirige qarighanda, 4-yanwar küni aqsu wilayetlik partkom aqsu boyiche yéngi yildiki tunji nöwetlik merkezleshtürüp öginish yighini chaqirip, 18-qurultay rohini her bir nahiye, yéza, kentlerdiki her bir a'iligiche yetküzüsh, partiye siyasitini her bir kishining éngigha, yürikige singdürüshini telep qilghan.

Buning bilen aqsu wilayiti boyiche yéngi yildiki siyasiy öginish pa'aliyitining muqeddimisi bashlan'ghan. Aqsu partkomning orunlashturushi boyiche bu yil 3-ayning axirigha qeder 76 nuqtiliq yéza, kent we mehelle komitétini nishanliq teshwiqat obyékti qilip, her qaysi nahiyilerdin 3354 neper kadir bu jaylardiki déhqanlarning siyasiy öginish qilishigha yétekchilik we nazaretchilik qilishigha ewetilidiken. Bu öginish üch aydin artuq dawam qilidiken.

Qizilsu oblastining hökümet torining 5-yanwardiki xewirige qarighanda, qizilsuning her qaysi yéza-kentliridimu yéngi yil kirishi bilen 18-qurultay rohini öginish siyasiy öginishliri bashlan'ghan. Soghuq hawada kolléktip öginishke kélelmigen, qéri-chürilerning öylirige teshwiqat kadirliri ewetilip a'ilide siyasiy öginish qilishni ching tutqanliqini teshwiq qilghan.

6-Yanwardiki qizilsu tori xewiridin melum bolushiche, qizilsu oblasti yighin chaqirip, aptonom rayonning 2013-yildiki muqimliq xizmiti yighinining rohini we jang chünshyenning yolyoruqini yetküzgen we térrorluq we bölgünchilik heriketlirige zerbe bérishte yéngi bir nöwetlik küreshning bashlan'ghanliqi, bu küreshning muqimliqqa tesir yetküzidighan heriketlerni bash kötürmestin turup aldin basturush prinsipi boyiche élip bérilidighanliqi qizilsu partkom sékrétari rén zéngsün teripidin tekitlen'gen.

Qizilsuning melum nahiyilik hökümet ishxanisigha téléfon qilghinimizda, bir közetchi so'allirimizgha jawab bérip, yéqindin buyan ilgirikidinmu jiddiy tedbirler yolgha qoyulghanliqini bildürdi.

Qeshqer tinchliq torining 5-yanwar xewiride körsitishiche, poskam nahiyisi yéngi yil kirishi bilen nahiyining her qaysi yéza, kentliridiki muqimliqni qoghdash apparatliri qurulushini kücheytken bolup, ammini seperwer qilip 24 sa'etlik charlash we qoghdash tüzümini yolgha qoyghandin bashqa, poskamning ayköl yézisida her küni yéziliq partkom, saqchi, teptish we bashqa memuriy orunlardin birdin jem'iy 6 kishi künde nöwetchilikke qoyulup kentlerde kéchide aylinip, asasliq yol éghizlirini, muhim organ we nuqtilarni charlash we charlashtin doklat teyyarlap yuqiri derijilik nazaret orunlargha tapshurush tüzümini ornatqan. Bu xil muqimliqni qoghdash usuli her bir kentlergiche kéngeytilidiken.

Bu xil muqimliq tedbirliri we siyasiy öginishke orunlashturush ma'arip orunliridimu oxshashla kücheytilgen bolup, qeshqer tinchliq torining xewiride körsitishiche, poskamning ottura bashlan'ghuch mektepliride her jüme küni chüshtin kéyin oqutquchi oqughuchilarni bir sa'etlik muqim siyasiy idiyiwi öginishke orunlashturushqa bashlighan bolup, bir aydin kéyin bir qétim öginish tesirati yézish we bahalash élip bérish her pesilde bir qétim ögen'genliridin imtihan bérishtek qattiq tüzümler ornitilghan.

Poskamdiki bir ottura mektepning amanliq xadimi yuqirining buyruqi bilen mekteplerdimu siyasiy weziyet muqimliqigha munasip tedbirler élin'ghanliqini bildürdi.

Gerche, xitay kompartiyisining Uyghur élige qoyghan bash sékrétari jang chünshyen, kadirlargha xizmet istilini yaxshilash, amma bilen qoyuq munasiwet ornitish, yighin istilini yaxshilap yighin qétim sanini azaytish heqqide yolyoruq bergen bolsimu, buning Uyghur élide qéliplashqan siyasiy öginish we bashqa muqimliqni saqlash tedbirlirini islah qilishqa héchqandaq tesiri bolmighanliqi melum.

Bu heqte ötken hepte ziyaritimizni qobul qilghan bir Uyghur kadirning bildürüshiche, yéza, kentlerde déhqanlardin bashqa ishchi-xizmetchilermu oxshashla bihajet siyasiy öginishlerge yighiwélinip, qatnashmighanlardin jerimane élishtek yolsiz tedbirler dawamlashmaqta bolup, bu ünümni emes, peqet bashqurushni qoghlishidighan yighiwélishlar “Ammining déhqanchiliqning bosh waqtida ish chiqirip qoyushining aldini élish” üchün iken.