Камбоджадин қайтурулған уйғурлардин муса муһәммәд 17 йиллиқ қамаққа һөкүм қилинди

Хитай һөкүмити 20 нәпәр уйғур сиясий панаһланғучини, 2009-йили 12‏-айниң 19-күни камбоджадин қайтуруп әкәткән.
Мухбиримиз шөһрәт һошур
2012-01-25
Share
musa-muhemmed-305.jpg Камбоджадин қайтурулған уйғурлардин муса муһәммәд 17 йиллиқ қамаққа һөкүм қилинған. 2012-Йили январ.
RFA/Shohret Hoshur

Шуниңдин кейин, хәлқара инсан һәқлири тәшкилатлири мәзкур 20 уйғурниң ақивити һәққидә хитай һөкүмитидин көп қетим мәлумат тәләп қилған болсиму, хитай буниң һәммисигә қулақ йопуруп кәлмәктә. Мухбиримизниң бүгүнки ениқлишида, 20 киши ичидики муса муһәммәд һәққидә қисмән мәлуматлар ашкариланди. Мәлум болушичә, ақсуниң учтурпан наһийисидин болған муса муһәммәд 17 йиллиқ кесилгән.

Йәрлик аһалиләрдин игилишимизчә, муса муһәммәд учтурпанниң ақяр йеза 15-кәнтидин. Бу йил 25 яшқа киргән муса муһәммәд камбоджадин қайтурулғандин кейин алди билән учтурпан қамақханисиға соланған. Униңдин кейин қәшқәр янбулақ түрмисигә йөткәлгән. Толуқсиз мәлуматлардин қариғанда, қәшқәр оттура сот мәһкимиси өткән йили 10-айниң 20-күни сот ечип униңға 17 йиллиқ қамақ җазаси бәргән. Муса муһәммәдниң қолум-қошнилириниң ашкарилишичә, униң аилә-тавабати, муса муһәммәдни сүрүштә қилип қәшқәр янбулақ түрмисигә икки қетим барған. Түрмә сақчилири муса муһәммәдниң түрмидә барлиқини билдүргән; әмма уларни көрүштүрмигән; улар елип барған кийим-кечәк вә йимәк-ичмәкниму қобул қилмиған.

Муса муһәммәдниң аилә-тавабати униң 17 йиллиқ кесилгәнлики һәққидә җәмийәттин хәвәр тапқандин кейин, қәшқәр вилайәтлик сотқа берип, сотниң һөкүм қәғизини тәләп қилған. Сот хадимлири сот һөкүминиң муса муһәммәдниң өзигә берилгәнликини билдүргән, әмма аилисигә бу һәқтә язма уқтуруш беришни рәт қилған. Сотчилар мәзкур аилигә муса муһәммәдниң 17 йил кесилгәнлики вә турпанниң дахийән түрмисигә йөткәлгәнликини ағзаки уқтуруп қойған. Мәлум болушичә, муса муһәммәд нөвәттә турпанниң дахийән түрмисидә җаза муддитини өтимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт