D u q türkiye b b partiyisi re'islikige yéngi saylan'ghan mustafa destichi ependini tebriklidi

Duq mu'awin re'isi séyit tümtürk ependi mustafa destichi ependini ziyaret qilip, yéngi wezipiside muweppeqiyetlik bolushini tilidi we rabiye qadir xanimning salimini yetküzdi.
Ixtiyariy muxbirimiz erkin tarim
2011-07-29
Share
bbp-bashliqi-mustafa-destichi-seyitni-qobul-qildi-305.jpg Türkiye büyük birlik partiyisi bashliqi mustafa destichi duq mu'awin re'isi séyit tümtürk ependini qobul qildi. 2011-Yili 28-iyul.
RFA/Erkin Tarim
Türkiyide burundin tartip Uyghur mesilisige izchil halda köngül bölüp kéliwatqan partiyilerdin biri büyük birlik partiyisi. Partiyining merhum re'isi muhsin yaziji'oghlu ependi köp qétim Uyghur mesilisini türkiye parlaméntining kün tertipige élip kelgen idi. Xitayning enqerede turushluq elchisi köp qétim bu partiyini ziyaret qilip, xitayning az sanliq millet siyasitining ewzelliklirini anglatqan bolsimu, ularni qayil qilalmighan idi. Türkiyidiki sherqiy türkistan ammiwi teshkilatliri jümlidin dunya Uyghur qurultiyimu dawamliq halda bu partiyini ziyaret qilip, xitayning bésim siyasiti heqqide doklat teyyarlap bu partiyige yetküzüp turmaqta. 7-Ayning 28-küni dunya Uyghur qurultiyi mu'awin re'isi séyit tümtürk ependi büyük birlik partiyisi re'islikige yéngi saylan'ghan mustafa destichi ependini partiye merkizidiki ishxanisida ziyaret qilip, uninggha aldi bilen rabiye qadir xanimning salimini yetküzgendin kéyin yéngi wezipiside muweppeqiyetlik bolushini tilidi, shundaqla xotende meydan'gha kelgen nawagh saqchi ponkitigha hujum qilish weqesi we béyjing da'irilirining bu weqedin kéyin xotende yürgüzüwatqan qanunsiz ijra'atliri heqqide melumat berdi.
bbp-bashliqi-mustafa-destichi-seyitni-qobul-qildi1-385.jpg
Türkiye büyük birlik partiyisi bashliqi mustafa destichi duq mu'awin re'isi séyit tümtürk ependini qobul qildi. 2011-Yili 28-iyul.
RFA/Erkin Tarim


Kéyin türkiye büyük birlik partiyisi re'isi mustafa destichi ependi söz qilip mundaq dédi:
-Büyük birlik partiyisining pelsepisi shu, partiyimiz peqetla türkiye xelqning partiyisi emes. Men ötken hepte üch siyasiy partiyining re'isi bilen uchrashtim. Ulardin bashqa türk dunyasigha mes'ul dölet ministiri békir bozdagh ependi bilenmu ikki kün burun körüshtüm, pikir almashturdum. Pütün dunya döletliri shuni bilidu, ghazzediki pelestinlikler, sherqiy türkistanliqlar, chéchenler, ezerbeyjanliqlar, qirim tatarliri, kosowo we makédoniyidiki türklermu qisqisi dunyadiki ézilgen milletlerning hemmisi türkiyining qoligha qaraydu, türkiyidin ümid kütidu. Partiyimizning merhum re'isi muhsin yaziji'oghlu ependi partiyimizni türk dunyasi üchün, ézilgen milletler üchün xizmet qilidu dep qurghan. Shunga biz burundin tartip türk dunyasining mesililirige, bolupmu sherqiy türkistan mesilisige alahide köngül bölüp kéliwatimiz, Uyghurlarning derdini türk jama'etchilikige, xitay hökümitige anglitiwatimiz. Bir yil ichide xitayning enqere elchisi 3 qétim partiyimizni ziyaret qildi. Biz xitay elchi wekili shyawgha béyjing da'irilirining Uyghurlargha élip bériwatqan bésim siyasitini pakitlar bilen anglattuq. Sherqiy türkistanliq qérindashlirimizgha élip bériwatqan assimilyatsiye siyasitini toxtitishini telep qilduq.

Büyük birlik partiyisi re'isi mustafa destichi ependi sherqiy türkistan xelqining uzun yillardin béri tartiwatqan derd-elemlirini yaxshi bilidighanliqini bayan qilip mundaq dédi:
-Bizning sherqiy türkistanliqlargha köngül bölüshimizdiki meqset, u yerde qalaymiqanchiliq chiqirish yaki u yerdiki milletler otturisida toqunush peyda qilish emes. Biz ularning bext-sa'adet ichide bixeter yashishini arzu qilimiz. Emma biz sherqiy türkistanliq qérindashlirimizning uzun yillardin béri qanchilik qéyin weziyette turmush köchürüwatqanliqini yaxshi bilimiz. Bu zulumning baldurraq tügishini arzu qilimiz. Xitay elchisi méni sherqiy türkistan'gha teklip qiliwatidu. Partiye merkiziy rehberlik komitéti bu heqte muzakire élip bérip qarar qilimiz.

Büyük birlik partiyisi türkiyidiki ongchi milletchi partiyilerdin biri bolup, bu partiyining qurghuchisi muhsin yaziji'oghlu ayropilan weqeside qaza tapqandin kéyin, partiye re'islikige yalchin topchu ependi saylan'ghan idi. Bu yil 7-ayning 2-küni chaqirilghan partiye qurultiyida partiyining sabiq bash katipi mustafa destichi ependi partiye re'islikige saylandi.

Büyük birlik partiyisining re'isi mustafa destichi ependi bilen dunya Uyghur qurultiyi mu'awin re'isi séyit tümtürkning uchrishishi bir sa'et etrapida dawamlashti. Uchrishish axirlashqandin kéyin mikrofonimizni séyit tümtürk ependige uzattuq.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet