Натониң пакистанни бомбилиғанлиқи һәққидә америка билән пакистан йеңи испат елан қилди

Натониң пакистанни бомбилиғанлиқи һәққидә, бүгүн америка билән пакистан һәр икки тәрәп тәпсилий испат елан қилди. Хитай учур вастилири өзгичә көз қараш оттуриға қойди.
Мухбиримиз вәли
2011.12.02
nato-pakistan-305.png Сүрәттә пакистанлиқлар NATO һоҗумиға америкиниң байриқини көйдүрүп наразилиқини билдүрмәктә
AFP

Натониң пакистан чегра қисимлирини бомбилиғанлиқи һәққидә, бүгүн америка билән пакистан һәр икки тәрәп йеңи испат елан қилди. Исмини ашкарилашни халимиған бир америка әмәлдариниң бүгүн “волт стерит гезити”ниң соаллириға җаваб бәргәндә ейтишичә, америка пәвқуладдә қисимлириниң афғанистандики зәрбидар әтрити билән радикал талибанлар оттурисида, пакистанниң шималий вәзиристандики моһманд қәбилә райони тәвәсидә тосаттин тиркишиш йүз бәргәндә, америка пәвқуладдә қисимлири шу җайда бир һәрбий базиниң һуҗумиға учриған. Америка пәвқуладдә қисимлири бу һуҗумға инкас қайтуруштин бурун, әһвални өз тәрипиниң чегра мудапиә мәркизигә мәлум қилған, бу мәркәз пакистан тәрәп билән алақилашқандин кейин, бу җайда пакистан қисимлири йоқкән дәп уқтурған.

“волт стерит гезити”ниң баян қилишичә, пакистан тәрәп бүгүн америка тәрәп елан қилған бу испатни қобул қилмай, бәлки буниңға қариму - қарши испат көрсәткән. Пакистан даирилириниң чүшәндүрүшичә, әйни вақитта пакистан һәрбий қисимлириниң учур - алақә сестимисида кашила чиқип, өз қисимлириниң из - дерикини қилалмайдиған вә срт билән алақилишалмайдиған әһвал йүз бәргән икән.

Америка билән пакистан бүгүн елан қилған йоқириқи испатлардин қариғанда, натониң пакистан чегра қисимлирини бомбилиған вәқәдә, икки тәрәпниң һечқайсида җавабкарлиқ йоқ. Әмма һәр икки тәрәп бүгүн йәнила қарши тәрәпниң көрсәткән испатлирини қобул қилмиди.

Учур архиплириға қариғанда, афғанистандики нато қисимлири пакистанниң чегра мудапиә понкитини бомбилиған вәқә 11 - айниң 26 - күни йүз бәргән. Бу вәқәдә пакистан қисимлириниң 24 әскири өлгән, 13 әскәр яриланған. Вәқәдин кейин пакистан һәрхил чоң намайиш уюштуруп, америкиға қарши ғәзәп ипадиләп келиватиду. Бу җәрянда пакистан йәнә, пакистанниң он йилдин буян америкидин осама бинладинға қарши туруш үчүн ярдәм елип, әмәлийәттә осама бинладинни мәхпий күчләндүрүватқанлиқини ашкарилайдиған һөҗҗәтлик филим ишлигән б б с учур агентлиқиниң паалийәтлирини чәклиди.

Нато қисимлири пакистанни бомбилиған вәқә йүз бәргәндә, хитай билән пакистан бирликтә “шәрқий түркстан террорчилирини йоқитиш”ни җакарлап чоң һәрбий маневир елип бериватқан иди. Нато пакистанни бомбилиған һаман, хитай тәрәп пакистанда өткүзүватқан һәрбий маневирини йиғиштуруп қойған вә 11 - айниң 27 - күни ташқи ишлар миниситирлиқи арқилиқ “пакистанниң натониң һуҗумиға учриғанлиқиға һәйран қалдуқ” дәп баянат елан қилған.

Күнләрдин буян, гәрчә хитай һөкүмити натониң пакистан чегра қисимлирини бомбилиғанлиқи һәққидә ениқ инкас қайтурмиған болсиму, әмма хитай учур вастилири җим әмәс. Интернеттә хитайчә елан қилинған бәзи обзорларда, америкиниң пакистанни бомбилиши бирхил һәрбий развитка, мәқсити хитайни урушқа сөрәп кериш, дегән көз қарашни оттуриға қойған. Йәнә бәзи обзорларда, хитай әмди пакистанғиму, талибанларғиму илғар ракита, радар сетип берип, америкиға техиму көп баш ағриқи пәйда қилип, топилаңдин тоғач оғрилаш керәк, дегән. Йәнә бәзи обзорларда болса, хитай әмди чуқум пакистанға әскәр чиқириш керәк, дегән тәшәббусни оттуриға қойған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.