Natoning pakistanni bombilighanliqi heqqide amérika bilen pakistan yéngi ispat élan qildi

Sürette pakistanliqlar NATO hojumigha amérikining bayriqini köydürüp naraziliqini bildürmekte

Natoning pakistan chégra qisimlirini bombilighanliqi heqqide, bügün amérika bilen pakistan her ikki terep yéngi ispat élan qildi. Ismini ashkarilashni xalimighan bir amérika emeldarining bügün “Wolt stérit géziti”ning so'allirigha jawab bergende éytishiche, amérika pewqul'adde qisimlirining afghanistandiki zerbidar etriti bilen radikal talibanlar otturisida, pakistanning shimaliy weziristandiki mohmand qebile rayoni teweside tosattin tirkishish yüz bergende, amérika pewqul'adde qisimliri shu jayda bir herbiy bazining hujumigha uchrighan. Amérika pewqul'adde qisimliri bu hujumgha inkas qayturushtin burun, ehwalni öz teripining chégra mudapi'e merkizige melum qilghan, bu merkez pakistan terep bilen alaqilashqandin kéyin, bu jayda pakistan qisimliri yoqken dep uqturghan.

“Wolt stérit géziti”ning bayan qilishiche, pakistan terep bügün amérika terep élan qilghan bu ispatni qobul qilmay, belki buninggha qarimu - qarshi ispat körsetken. Pakistan da'irilirining chüshendürüshiche, eyni waqitta pakistan herbiy qisimlirining uchur - alaqe séstimisida kashila chiqip, öz qisimlirining iz - dérikini qilalmaydighan we srt bilen alaqilishalmaydighan ehwal yüz bergen iken.

Amérika bilen pakistan bügün élan qilghan yoqiriqi ispatlardin qarighanda, natoning pakistan chégra qisimlirini bombilighan weqede, ikki terepning héchqaysida jawabkarliq yoq. Emma her ikki terep bügün yenila qarshi terepning körsetken ispatlirini qobul qilmidi.

Uchur arxiplirigha qarighanda, afghanistandiki nato qisimliri pakistanning chégra mudapi'e ponkitini bombilighan weqe 11 - ayning 26 - küni yüz bergen. Bu weqede pakistan qisimlirining 24 eskiri ölgen, 13 esker yarilan'ghan. Weqedin kéyin pakistan herxil chong namayish uyushturup, amérikigha qarshi ghezep ipadilep kéliwatidu. Bu jeryanda pakistan yene, pakistanning on yildin buyan amérikidin osama binladin'gha qarshi turush üchün yardem élip, emeliyette osama binladinni mexpiy küchlendürüwatqanliqini ashkarilaydighan höjjetlik filim ishligen b b s uchur agéntliqining pa'aliyetlirini cheklidi.

Nato qisimliri pakistanni bombilighan weqe yüz bergende, xitay bilen pakistan birlikte “Sherqiy türkstan térrorchilirini yoqitish”ni jakarlap chong herbiy manéwir élip bériwatqan idi. Nato pakistanni bombilighan haman, xitay terep pakistanda ötküzüwatqan herbiy manéwirini yighishturup qoyghan we 11 - ayning 27 - küni tashqi ishlar minisitirliqi arqiliq “Pakistanning natoning hujumigha uchrighanliqigha heyran qalduq” dep bayanat élan qilghan.

Künlerdin buyan, gerche xitay hökümiti natoning pakistan chégra qisimlirini bombilighanliqi heqqide éniq inkas qayturmighan bolsimu, emma xitay uchur wastiliri jim emes. Intérnétte xitayche élan qilin'ghan bezi obzorlarda, amérikining pakistanni bombilishi birxil herbiy razwitka, meqsiti xitayni urushqa sörep kérish, dégen köz qarashni otturigha qoyghan. Yene bezi obzorlarda, xitay emdi pakistan'ghimu, talibanlarghimu ilghar rakita, radar sétip bérip, amérikigha téximu köp bash aghriqi peyda qilip, topilangdin toghach oghrilash kérek, dégen. Yene bezi obzorlarda bolsa, xitay emdi chuqum pakistan'gha esker chiqirish kérek, dégen teshebbusni otturigha qoyghan.