Нато дөләтлири ташқи ишлар министирлири йиғини естонийидә ечилди

Шималий атлантик әһди тәшкилатиға әза дөләтләрниң ташқи ишлар министирлири йиғини естонийиниң пайтәхти талинда өткүзүлди. Пәйшәнбә күни башлиған мәзкур йиғинда һәрқайси дөләтләрниң ташқи ишлар министирлири афғанистан мәсилиси һәққидә музакирә елип барди.
Мухбиримиз ирадә
2010.04.23
Share on WhatsApp
Share on WhatsApp
NATO-teshkilati-tashqi-ishlar-ministirliri-yighini-2010-Talin-305.jpg Сүрәт, 2010- йили 22- апрел күни, естонийиниң пайтәхти талинда өткүзүлгән шималий атлантик әһди тәшкилатиға әза дөләтләрниң ташқи ишлар министирлири йиғинидин бир көрүнүш болуп, бу сүрәт, әза дөләтләрниң ташқи ишлар министирлири хатирә рәсимгә чүшүватқан көрүнүш.
AFP Photo

Игилинишичә, йиғинда афғанистандики тинчлиқни сақлаш хизмитини афғанистан һөкүмити вә хәвпсизлик күчлиригә қачан вә қандақ қилип өткүзүп бериш мәсилиси нуқтилиқ музакирә қилинған.

Б б с ниң хәвәр қилишичә, талинға йиғилған нато дөләтлири ташқи ишлар министирлири йиғин ахирида афғанистанға даир йеңи истратегийә бәлгиләш һәққидә вә шундақла хәвпсизлик, башқуруш вә афғанистанни тәрәққи қилдуруш қатарлиқ бир йүрүш мәсилиләр үстидә музакирә елип қарар мақуллайдикән.

Бундин илгири америка президенти барак обама америкиниң афғанистандин 2011 - йилидин етибарән әскәр чекиндүрүшкә башлайдиғанлиқини елан қилған. Әмма, нато баш секретари андирес рамуссин афғанистанда ғәлибини қолға кәлтүрмигичә әскәр чекиндүрмәйдиғанлиқини билдүрүп, : "әскәр чекиндүрүдиған вақит 2011 - йили болуши натайин " дегән иди.

Америка авазиниң баян қилишичә, бүгүнки йиғин ахирида, нато башчилиқидики тинчлиқ қисимлири бу йил ичидә афғанистандики тинчлиқни сақлаш қисимлирини чекиндүрүшкә башлашни қарар қилған. Әмма америка афғанистандин келәр йили 7 - айдин башлап әскәр чекиндүрүдиғанлиқини, нато қисимлири чекинип чиқиштин бурун чоқум афған армийиси вә қораллиқ қисимлирини тәрбийиләп бериши керәкликини тәләп қилған.

Афғанистанда һазир 40 дөләтниң җәмий 80 миң әскири нато тинчлиқини сақлаш қисимлири тәркибидә вәзипә өтәватқан болуп, нато қисимлири чекиништин бурун тинчлиқни сақлаш вәзиписини афғанистан қисимлириға өткүзүп бериши керәк икән.

Андирес рамуссин афғанистан қисимлирини тәрбийиләп йетиштүрүш үчүн йәнә аз дегәндә 450 һәрбий теринергә еһтияҗи барлиқини билдүргән. Бундин илгири натоға әза дөләтләрниң истанбул вә германийиләрдә ачқан йиғинлиридиму охшаш мәсилә күн тәртипкә кәлгән болуп, бу һәқтики хәвәрләрдә афғанистандики әскәр тәрбийиләш вәзиписини түркийидин тәләп қилғанлиқи билдүрүлгән иди.

Бу нөвәтлик йиғинда америка ташқи ишлар министири һилларий килинтонниң натоға әза дөләтләрдин афғанистан армийиси вә сақчи қисимлирини тәрбийиләш үчүн техиму көп теринер әвәтиш тәлипини қайта оттуриға қойидиғанлиқи билдүрүлмәктә.

Әркин явропа радиосиниң хәвәр қилишичә, андирес рамуссен афған армийисигә вәзипини өткүзүп бәргән тәқдирдиму уларниң хели бир мәзгилгичә хәлқара тенчлиқни сақлаш қисимлириниң ярдимигә еһтияҗи болидиғанлиқини билдүргән әмма у йәнә натониң афғанистанда мәңгүлүккә қалмайдиғанлиқиниму тәкитлигән.

Хәвәрләрдин мәлум болушичә естонийиниң пайтәхти талиндә өткүзүлгән йиғинда йәнә ядро қораллири мәсилисиму музакирә қилинған болуп, нато баш секретари андирес рамуссен ядро қораллириға игә болған бир қисим "өз бешимчи" дөләтләрни контрол қилип туруш үчүн натониң чоқум ядро күчигә игә болуши керәкликини ейтқан. У террор тәшкилатлириниңму ядро қораллириға игә болуш еһтимали барлиқини нәзәрдин сақит қилмаслиқ керәкликини тәкитлигән.
 
Йиғинда йәнә русийиниң шималий атлантик әһди тәшкилати билән болған мунасивәтлириму тилға елинған болуп, нато секретари рамуссен бу һәқтә тохтилип: "росийә һазирму соғуқ уруш мәзгилидидәкла натони дүшмән дәп қарайду. Әмәлийәттә бу пүтүнләй вақти өткән, орунсиз бир әнсирәш" дегән.

Рамуссен русийиниң афғанистан мәсилисидә нато билән һәмкарлишиши керәкликини ейтқан вә башқурулидиған бомба қалқан системиси мәсилисидә росийә билән бир келишим һасил қилиш керәкликини билдүргән.

Юқиридики аваз улинишидин, бу һәқтики мәлуматимизниң тәпсилатини аңлайсиләр.

 
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.