Osloda olimpik yighinigha qarshi daghdughiliq namayish ötküzüldi

Tünügün chüsh sa'et üchte norwigiyining paytexti oslo shehiride daghdughiliq namayish pa'aliyiti ötküzüldi.Namayishni norwégiye Uyghur komitéti orunlashturghan bolup namayishning meqsiti pat yéqinda xitayda ötküzülmekchi bolghan olimpik tenheriket yighinini bayqut qilishtin ibaret.
Muxbirimiz aygul yüsüp xewiri
2008-06-26
Share

 Bu qétimqi namayishqa 100 ge yéqin Uyghurlar hem norwégiye insan heqliri orginining xadimliri,norwégiye tibet komitéti we bashqa norwéglarmu teklipke bina'en ishtirak qildi.

Er - ayal we balilardin teshkil tapqan daghdughiliq namayishchilar qoshuni qollirigha sherqiy türkistanning ay - yultuzluq kök bayriqini we xitaylar diktator, olimpik yighinini bayqut qilayli, Uyghurlargha démokratiye, siyasiy mehbuslar qoyup bérilsun dégendek türlük shu'arlar yézilghan lozunka - pilakatlarni kötürüp jarangliq shu'ar towlap paytext osloning adem eng köp yighilidighan dangliq kochisi bolghan karl johan kochisidin ötkende, norwéglar we bashqa chet'ellik ziyaretchiler alahide diqqet bilen namayishni kördi. Uyghurche en'eniwiy kiyim - kécheklerni kiygen kichik dostlar bir qolida ay - yultuzluq kök bayraqni kötürüp yene bir qolida namayish wereqilirini etraptiki her millet kishilirige tarqatti.

Namayishchilar qoshuni sheher merkizidiki parlamént binasining aldigha kélip toxtighanda teshkilat rehberliri,Uyghurlar duch kéliwatqan siyasi, iqtisadi we diniy bésimlar, qizlarning xitay ölkilirige yötkilishi, ana til mesilisi shundaqla xitay hökümitining olimpikning bixeterlik mesilisini bahane qilip yüzligen bigunah Uyghurlarni tutup türmilerge tashlighanliqini, olimpik tenheriket yighinining Uyghurlargha küch,inaqliq we ishench élip kelmey, eksiche weyranchiliq we balayi ‏ - apetlerni élip kéliwatqanliqini emeliy misallar arqiliq körsitip nutuq sözlidi.

Nutuq axirlashqanda ay - yultuzluq kök bayraqning nusxisi we olimpik yighinini bayqut qilish heqqidiki resim chushurulgen sharlar namayishchilarning erkinlik - erkinlik dep towlighan sadasi ichide asman'gha qoyup bérilip namayishni téximu yuqiri ewjige köterdi.

Parlamént binasi aldidiki pa'aliyet axirlashqanda, barliq namayishchilar xitay elchixanisining aldigha kélip toplinip sherqiy türkistan'gha musteqilliq, Uyghurlargha erkinlik, xitaylar wetinimizdin yoqalsun, weten bizning dégendek türlük shu'arlarni towlap özlirining xitay hökümitige bolghan küchlük ghezep - nepritini bildürüp ötti.

Ishikliri taqalghan, derize qapqaqliri him étilgen, hetta bayraqliri éliwitilgen xitay elchixanisining aldidiki Uyghurlarning heywetlik namayishi saqchi aptomobilliri we saqchilarning himayiside intayin tertiplik ötti, namayishchilar yene bir qétim erkinlik, erkinlik dep shu'ar towlap hörlükke simwol qilin'ghan sharlarni asman'gha quyuwétip sa'et 6 din ötkende namayishni ghelibilik axirlashturdi. Bügünki namayishqa qatnashqan bir nechcheylen muxbirimizning ziyaritini qobul qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet