Бейҗиңдики әрздар нургүл тохти дуня уйғур қурултийиниң әзаси дәп тутулуп 38 күн қамақта ятқан

Бейҗиңдики уйғур әрздарлардин нургүл тохти, бу йил 7-айда, дуня уйғур қурултийи бейҗиң шөбисиниң башлиқи дегән гуман билән тутулуп, ақсу учтурпанға елип кетилгән вә учтурпанда 38 күн қамақта ятқан.
Мухбиримиз шөһрәт һошур
2011.12.22
Share on WhatsApp
Share on WhatsApp
Beyningdiki-erzdarlar-305.jpg Хитай коммунист хәлқ қурултийи йепилиш мәзгилидә, әрздарлар сот мәһкимиси алдида. 2011-Йили 19-өктәбир, бейҗиң.
www.boxun.com

Нургүл тохти бейҗиңда тутулуш, елип меңилиш вә сорақ қилиниш җәрянида баштин-ахир сақчилар билән қаршилашқан. Нургүл тохтиниң дуня уйғур қурултийи билән четишлиқи һәққидә һечқандақ пакитқа еришәлмигән хитай сақчилири, нургүл тохтиниң қәтий вә кәскин қаршилиқи нәтиҗисидә, уни қоюветишкә мәҗбур болған.

Икки йилниң алдида, нургүл тохтиниң 7 яшлиқ оғли хитай қарақчилири тәрипидин әпқечип кетилгән. Вәқә у тиҗарәт қиливатқан далйән шәһиридә йүз бәргән. Гәрчә нургүл тохти оғлини елип қачқан хитай қарақчини өзи байқап вә тәһдит селип қутқузувалған болсиму, оғлидики бинормаллиқини байқиғандин кейин, бейҗиңға берип әрз қилған вә хитай қарақчини тутуп җазалашни тәләп қилған. Тәлипи әмәлгә ашмиғандин кейин, у бу йилниң бешида бир гуруппа әрздарлар билән бирликтә б д т алдида намайиш өткүзүп, уйғурларниң миллий тәңсизликкә учраватқанлиқини паш қилған. У йәнә бу әһвалларни радиомиз арқилиқ дуняғиму ашкарилиған. У бу йил 7-айда далйәндин тутуп кетилгән.

У сәпәр үстидә сақчилар ухлап қалған чеғида бир қетим қачқан болсиму, әтиси йәнә тутулған вә айропилан билән ақсуға елип кетилгән.

Қамақханида 38 күн ятқан нургүл тохти, өзиниң немә үчүн қамап қоюлғанлиқи һәққидә ениқ җавабқа еришәлмигән. У пәқәт кепилликкә қоюп берилип назарәт астида туруватқан мәзгилидила, өзиниң мәлум бир тәшкилатқа, йәни дуня уйғур қурултийиға четишлиқ дәп қарилип тутқун қилинғанлиқини билгән.

Нургүл тохти, тутулған, елип меңилған, нәзәрбәнд қилинған мәзгилләрдә, хитай сақчилириниң тәһдит вә зораванлиқлиридин қорқмиған. Баштин-ахир өзиниң һәқлиқ бир дәвагәр икәнликини оттуриға қойған, хитай сақчилириниң вә әмәлдарларниң йолсизлиқини вә чирикликини йүзидин-йүзигә тәнқид қилған.

Нургүл тохти өткән һәптә нәзәрбәнд астида туруватқан мәзгилидә, оғлини мәктәпкә апириш баһаниси билән өйидин айрилип, бейҗиңға қайта йетип кәлгән.

Юқирида, әрздар нургүл тохтиниң хитай сақчилириға тутулуш вә қечиш җәрянлири һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.