Béyjingdiki erzdar nurgül toxti dunya Uyghur qurultiyining ezasi dep tutulup 38 kün qamaqta yatqan

Nurgül toxti béyjingda tutulush, élip méngilish we soraq qilinish jeryanida bashtin-axir saqchilar bilen qarshilashqan. Nurgül toxtining dunya Uyghur qurultiyi bilen chétishliqi heqqide héchqandaq pakitqa érishelmigen xitay saqchiliri, nurgül toxtining qet'iy we keskin qarshiliqi netijiside, uni qoyuwétishke mejbur bolghan.

Ikki yilning aldida, nurgül toxtining 7 yashliq oghli xitay qaraqchiliri teripidin epqéchip kétilgen. Weqe u tijaret qiliwatqan dalyen shehiride yüz bergen. Gerche nurgül toxti oghlini élip qachqan xitay qaraqchini özi bayqap we tehdit sélip qutquzuwalghan bolsimu, oghlidiki binormalliqini bayqighandin kéyin, béyjinggha bérip erz qilghan we xitay qaraqchini tutup jazalashni telep qilghan. Telipi emelge ashmighandin kéyin, u bu yilning béshida bir guruppa erzdarlar bilen birlikte b d t aldida namayish ötküzüp, Uyghurlarning milliy tengsizlikke uchrawatqanliqini pash qilghan. U yene bu ehwallarni radi'omiz arqiliq dunyaghimu ashkarilighan. U bu yil 7-ayda dalyendin tutup kétilgen.

U seper üstide saqchilar uxlap qalghan chéghida bir qétim qachqan bolsimu, etisi yene tutulghan we ayropilan bilen aqsugha élip kétilgen.

Qamaqxanida 38 kün yatqan nurgül toxti, özining néme üchün qamap qoyulghanliqi heqqide éniq jawabqa érishelmigen. U peqet képillikke qoyup bérilip nazaret astida turuwatqan mezgilidila, özining melum bir teshkilatqa, yeni dunya Uyghur qurultiyigha chétishliq dep qarilip tutqun qilin'ghanliqini bilgen.

Nurgül toxti, tutulghan, élip méngilghan, nezerbend qilin'ghan mezgillerde, xitay saqchilirining tehdit we zorawanliqliridin qorqmighan. Bashtin-axir özining heqliq bir dewager ikenlikini otturigha qoyghan, xitay saqchilirining we emeldarlarning yolsizliqini we chiriklikini yüzidin-yüzige tenqid qilghan.

Nurgül toxti ötken hepte nezerbend astida turuwatqan mezgilide, oghlini mektepke apirish bahanisi bilen öyidin ayrilip, béyjinggha qayta yétip kelgen.

Yuqirida, erzdar nurgül toxtining xitay saqchilirigha tutulush we qéchish jeryanliri heqqide melumat berduq.