Нурул исламниң хитай түрмиси һәққидә бир парчә мәхпий хәт қалдурғанлиқи мәлум

Хитай түрмисидә намәлум сәвәбләр билән өлүп кәткән нурул исламниң дадиси шәрбазханниң билдүрүшичә, нурул ислам өлүш алдида бир мәхпий хәт қалдурған.
Мухбиримиз җүмә
2011.12.05
nurul-islam-sherbaz-305.jpg Шәрбазхан билән оғли нурул ислам шәрбазниң ата-балилиқ испати.
RFA

Мәзкур хәттә униң қандақ қейин-қистақларға дучар болғанлиқи вә башқа уйғур мәһбусларниң әһвалиму оттуриға қоюлған икән.

Шәрбазханниң оғли нурул исламниң бу йил 13-ноябир хитай түрмисидә өлүп кәткәнлики вә униң җәситиниң аилә тавабиатлириға қайтуруп берилмигәнликини ашкариланған иди.

Шәрбазхан алдинқи күни уйғур кишилик һоқуқ программисиға йоллиған парчә хетидә, оғлиниң түрмидики вақтида бир парчә мәхпий хәт қалдуруп кәткәнлики мәхпий хәтниң мәзмунидин толуқ вақип болғанлиқи, хәттә хитай түрмә даирилириниң җинайи қилмишлириға аит тәпсилатлар барлиқини билдүргән.

У бүгүн зияритимизни қобул қилип, мәзкур мәхпий хәт һәққидики сөзләрниң растлиқини хәтниң нөвәттә өзиниң қолида әмәслики, әмма хәтниң мәзмунидин толуқ хәвәрдар икәнликни билдүрди.

Шәрбазханниң уйғур кишилик һоқуқ программисиға йоллиған хетидә адәмниң диққитини алаһидә җәлп қилидиған муһим бир нуқта болса, уйғур елидики түрмә даирилириниң мәһбусларниң ички әзалирини сетиш қилмишиға арилашқанлиқи һәққидики мәзмунлардур.

Хәттә мундақ дейилгән: түрмә башқуруш органлири бөрәк, көз вә қанларни қанунсиз сетиш содисиға арилашқан. Көплигән азсанлиқ милләт мәһбуслири җисманий җәһәттин кәмтүк болуп қалған.

Биз бу хәттә оттуриға қоюлған юқириқи мәзмунларни өз алдимизға дәлилләшкә һазирчә амалсиз. Һалбуки, илгири бәзи мәтбуатларда хитай түрмиләрдики адәм ички әзалирини қанунсиз сетиш қилмишиға аит хәвәр бесилған иди.

Баш штаби америка пайтәхти вашингтон алаһидә райониға җайлашқан “өлчәм” һәптилик журнилида “шинҗаңчә тәртип: бейҗиң сиясий мәһбуслардин орган йиғивалидиған йеңи чегра” намлиқ бир тәпсилий хәвәр берилди.

Хәвәрдә әйни чағда үрүмчидә сақчи болуп ишлигән ниҗат абдурәһим вә дохтур әнвәрләрниң әслимиси асасида хитай даирилириниң сиясий җинайәтчиләргә өлүм җазаси иҗра қилинғанда мәһбус җан үзүштин илгири бөрәк яки башқа ички әрзлирини оператсийә қилип еливелип дохтурханиға салидиғанлиқи илгири сүрүлгән.

Униңдин башқа хитайда “бидәт тәшкилат” дәп мәни қилинған фалуңоң тәшкилатиму хитай сақчи даирилириниң җаза һөкүм қилинған фалунгоңчилар әзалириниң ички әзалирини оператсийә қилип еливелип сатқанлиқини дуняға ашкарилиған иди.

“5-июл үрүмчи вәқәси” гә четилип өлүмгә буйрулған мәһбусларниң бу хил қисмәтләргә йолуққан яки йолуқмиғанлиқи һазирчә бизгә қараңғу.

Һалбуки, шәрбазхан америкидики уйғур кишилик һоқуқ программисиға йоллиған хетидә хитай даирилириниң уйғур тутқунларниң ички әзалириниму суғуруп елип сатқанлиқини илгири сүргән.

Шәрбазханниң оғли нурул ислам 2009-йили 27-июл “5-июл вәқәси” гә четилип қолға елинған вә 2010-йили 4-айда муддәтсиз қамақ җазасиға һөкүм қилинған иди.

Шәрбазханниң өткән һәптә радиомизға билдүрүшичә, униң оғли нурул ислам шәрбазхан бу йил 13-ноябир кәч саәт 10 да үрүмчидики “1-түрмә” дохтурханисида һаятидин айрилған.

Шәрбазханниң хәт һәққидә дәп бәргәнлиригә қариғанда, нурул ислам өлүш алдида қалдуруп кәткән мәхпий хетидә икки йерим йилға йеқин хитай түрмисидә йетиш җәрянида һәр хил қейин қистақларға елинғанлиқини язған.

Униң дейишичә йәнә, хәттә бу йиллиқ қурбан һейт мәзгилидә түрмидә һейт намизи оқушқа урунған уйғурларму қаттиқ таяққа бесилғанлиқи хатириләнгән икән.

Шәрбазхан 2010-йили 10-июн хитайдин мәҗбури чиқириветилгәндин кейин, нөвәттә пакистанниң пәнҗаб өлкиси равалпинди районида туруп оғлиниң дәвасини давамлаштурмақта. Биз бу һәқтә йәниму илгириләп мәлумат беришқа тиришимиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.