Oghlini élip qachqan xitay qaraqchi üstidin erz qiliwatqan nurun'gül toxti qamaqta

U kim? u néme ishlarni qilghan?

Oghlini xitay qaraqchining qolidin saqchilarning yardimisiz qutquzush, qaraqchini jazalimighan dalyen saqchi organliri üstidin béyjinggha erz sunush, uchturpan saqchiliri béyjingdin mejburiy élip mangghanda poyizdin sekrep qéchish, béyjingdiki dölet organliri erzige qulaq salmighanda, chet'el konsulxaniliri we b d t derwazisi aldida xitay döliti üstidin shikayet qilish, üchturpandiki yerlik da'irilerning chirikliki we yaramsizliqini yüzidin-yüzige eyiblep el-jama'etning aldida edipini bérish‏, mana bular, mehbus nurun'gül toxtining yéqinqi 3 yilliq hayatidiki untulmas menzirilerdur.

Bu menziriler nurun'gül toxtining el-jama'et ichidiki izzet-hörmitini yükseltken bolsa, béyjing we üchturpandiki alaqidar xitay da'irilirining oghisini qaynatqan. Shunga u 6 aydin béri qamaqta.

Jarangliq sözliri bilen radi'o anglighuchilirimizgha tonushluq bolghan nurun'gül toxtining 6 aydin béri uchuri élinmighandin kéyin, yerlik ahalilerge téléfon qilduq. Ahalilerdin biri uning bultur 6-ayning 4-küni tutup kétilgenlikini we tutulush sewebining a'ilisige bildürülmigenlikini éytti.

Biz bu uchurning toghra-xataliqini éniqlash üchün, nurun'gül toxtini béyjingdin tutup kétish we nazaret qilish ishlirigha arilashqan bir saqchi xadimigha téléfon qilduq. Saqchi xadimi deslepte so'alimizgha jawab bérishni ret qildi, arqidin nahiyilik j x idarisidin yolyoruq sorighandin kéyin, so'alimizgha qismen jawab berdi. Uning ashkarilishiche, nurun'gül toxti dölet bixeterlikige xewp yetküzüsh gumani bilen qolgha élin'ghan. U qolgha élin'ghinigha 6 aydin ashqan bolsimu, üstidin téxi sot échilmighan, soraq we tekshürüsh yenila dawamlashmaqta.

Saqchi xadimi nurun'gülning délosining tepsilati heqqide melumat bermidi. Emma nurun'gül toxti qolgha élinishtin burun igiligen uchurlirimizdin melum bolushiche, uchturpan nahiyilik saqchi idarisidin ikki kishi, bultur 5-ayning 25-küni uning bilen söhbet ötküzgen, söhbet dawamida ular, uning béyjingdiki bashqa erzdarlar bilen teshkiliy munasiwiti bar-yoqluqini sorighan we ular heqqide melumat igiligen؛ uning yene, béyjingdiki chet'el konsulxaniliri, b d t ishxanisigha bérish jeryani heqqidimu melumat igiligen we bu söhbettin 10 kün kéyin söhbetning xulasisini bildüridighanliqini éytqan.

Mana bu uchurlardin qarighanda, nurun'gülning merkizi intizam tekshürüsh idarisi aldida saqchilar bilen takallashqanliqi we b d t ishxanisi aldida erzdarlar bilen birlikte topliship shikayet éytqanliqi, uning atalmish jinayitige pakit hésablan'ghan. Yene bezi ehwaldin xewerdar kishilerning bildürüshiche, uchturpan nahiye rehberliri awarichiliktin qutulush üchün nurun'gülni türmige tashlash arqiliq jimiqturmaqchi bolghan we nahiye derijilik sotqa bu heqte buyruq chüshürgen, emma wilayetlik ottura sot mehkimisi nurun'gülning qilmishining jinayet ölchimige toshmaydighanliqini bildürüp nahiyilik sot hökümini ret qilghan.

Tepsilatini yuqiridiki awaz ulinishidin anglighaysiler.